.jpg)
លោក ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ថ្លែងកាលពីថ្ងៃទី ១០ កុម្ភៈ។ រូបថត ក្រសួងមហាផ្ទៃ
ភ្នំពេញៈ សេចក្ដីព្រាងព្រះរាជក្រឹត្យ និងការរៀបចំលិខិតបទដ្ឋានគតិយុត្តស្ដីពីឧកញ៉ាអាចបញ្ចប់នៅឆ្នាំ ២០២២ នេះ ហើយដែលឧកញ៉ាមួយចំនួនបង្ហាញការគាំទ្រសេចក្តីព្រាងនេះដោយចាត់ទុកថា នឹងជួយលើកតម្លៃឧកញ៉ាឡើងវិញ ស្របពេលឧកញ៉ាខ្លះបានយកគោរមងារទៅប្រព្រឹត្តអំពើខុសឆ្គង។
នាឱកាសអញ្ជើញជាអធិបតីក្នុងពិធីពិសាអាហារ សាមគ្គីជាមួយថ្នាក់ដឹកនាំ សមាគមមូលនិធិ «សម្ដេចតេជោ ដើម្បីអភិវឌ្ឍន៍សហគ្រាសធុនតូច និងមធ្យមនៅកម្ពុជា» នាថ្ងៃទី ១០ កុម្ភៈ ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លោក ស ខេង ឱ្យដឹងថា លោកកំពុងដឹកនាំរៀបចំសេចក្តីព្រាងនេះ ហើយអាចនឹងបញ្ចប់នៅត្រឹមឆ្នាំ ២០២២ នេះ។ លោកថា ក្នុងដំណើរការសិក្សារៀបចំសេចក្ដីព្រាងនេះ ក៏នឹងមានការជជែកពិភាក្សារវាងតំណាង រាជរដ្ឋាភិបាលជាមួយសមាគមឧកញ៉ាផងដែរ។ លោកថ្លែងថា៖ «នៅក្នុងការរៀបចំសេចក្ដីព្រាងព្រះរាជក្រឹត្យថ្មីអាចនឹងមានចែងកំណត់អំពីការផ្ដល់គោរមងារ ការកំណត់អំពីកាតព្វកិច្ចរបស់ឧកញ៉ា និង លក្ខខណ្ឌនៃការសម្រេចដកគោរមងារក្នុងន័យ ដើម្បីលើកតម្កើងតម្លៃនៃគោរមងារជាឧកញ៉ា ហើយបន្ទាប់ពីរៀបចំព្រះរាជក្រឹត្យនេះហើយនោះ សមាគមឧកញ៉ាក៏ត្រៀមលក្ខណៈរៀបចំខ្លួនឱ្យបានសមស្របទៅនឹងខ្លឹមសារព្រះរាជក្រឹត្យថ្មីផងដែរ»។
ស្ថាបនិកប្រធានក្រុមប្រឹក្សាភិបាល និង អគ្គនាយកប្រតិបត្តិនៃក្រុមហ៊ុន ម៉េងលី ជេ. គួច អេឌ្យូខេសិន លោកឧកញ៉ា គួច ម៉េងលី ប្រាប់ភ្នំពេញប៉ុស្តិ៍ នាថ្ងៃទី ១៣ កុម្ភៈ ថានៅប្រទេសណាក៏ដូចប្រទេសណាដែរ គឺមានឥស្សរិយយសមុខងារមួយចំនួនដែលគេផ្តល់តួនាទីទៅឱ្យបុគ្គលក្នុងនាមមានភាពថ្លៃថ្នូរ ដែលបានចូលរួមជួយសង្គមជាតិជួយប្រជាពលរដ្ឋ តាមរយៈការស្ម័គ្រដោយបរិសុទ្ធ ដែលប្រជាពលរដ្ឋទទួលស្គាល់។ ប៉ុន្តែប្រទេសខ្លះបានគោរមងារដោយបក្ខពួក ដោយលុយធ្វើឱ្យបាត់តម្លៃនៃគោរមងារជាឧកញ៉ា។
លោកថ្លែងថា៖ «អ៊ីចឹងខ្ញុំគិតថា ការព្រាងឡើងវិញនេះ មិនថា ឧកញ៉ា អ្នកឧកញ៉ា គួរតែពិចារណា ព្រោះឧកញ៉ាខ្លះយកគោរមងារទៅប្រព្រឹត្តប្រាសចាកពីក្រមសីលធម៌ធ្វើឱ្យប្រជាជនក្តៅក្រហាយ។ យើងដឹងហើយថា ឧកញ៉ាខ្លះប្រព្រឹត្តអំពើហិង្សា ប្រព្រឹត្តគ្រឿងញៀន ឬរកស៊ីមិនប្រក្រតី ប៉ះទង្គិចដល់ជាតិ ការកាប់ព្រៃឈើ។ អ៊ីចឹងអ្នកកាន់តួនាទីនេះធ្វើឱ្យប៉ះពាល់ដល់អង្គព្រះមហាក្សត្រដែលទ្រង់ផ្តល់គោរមងារជូន»។
ទោះយ៉ាងណា លោកសង្ឃឹមថា នៅពេលសេចក្តីព្រាងព្រះរាជក្រឹត្យចូលជាធរមាននឹងជួយលើកតម្លៃកិត្តិយសអ្នកទទួលបានគោរមងារឧកញ៉ាពិតប្រាកដ។
អនុប្រធានសភាពាណិជ្ជកម្មកម្ពុជាលោកឧកញ៉ា លឹម ហេង គាំទ្រសេចក្តីព្រាងនេះ ដើម្បីរៀបចំក្រមសីលធម៌របស់ឧកញ៉ាឱ្យប្រព្រឹត្តទៅមានតម្លៃក្នុងសង្គម។
លោកថ្លែងថា៖ «ធម្មតាទេមនុស្សតែងមានល្អ មានអាក្រក់ មិនមែនតែឧកញ៉ាទេ ឯកឧត្តមមួយចំនួនគាត់ល្អ មួយចំនួនក៏មិនល្អដែរ។ ឧកញ៉ាដូចគ្នាឱ្យតែមនុស្សតែងមានកំហុស ប៉ុន្តែភាគច្រើនឧកញ៉ាគឺធ្វើល្អ ព្រោះឧកញ៉ាមិនបានទទួលប្រាក់បៀវត្សរ៍ពីរាជការទេ មានតែជួយឧបត្ថម្ភសង្គម»។
លោកថា៖ «សម្រាប់ទស្សនៈខ្ញុំ ឧកញ៉ាកាន់តែច្រើន កាន់តែល្អសម្រាប់សង្គមជាតិក្នុងការអភិវឌ្ឍសង្គម។ គ្រាន់តែថាឱ្យមានក្រមសីលធម៌នៃឧកញ៉ា ខ្លួនឯងជាឧកញ៉ាហើយត្រូវមានក្រមសីលធម៌»។ លោកបន្តថា ពាក្យថា ឧកញ៉ា ១ ម៉ាត់មិនមែនសំដៅលើអ្នកមាននោះទេ គឺសំដៅលើអ្នកដែលជួយសង្គមជាតិ ជួយទាំងចំណេះ ជំនាញ និងថវិកា ដូច្នេះការធ្វើសេចក្តីព្រាងនេះជារឿងល្អ ដើម្បីរៀបចំឱ្យមានសណ្តាប់ធ្នាប់ និងក្រមសីលធម៌។
ក្រុមការងារអន្តរក្រសួងត្រូវបានរាជរដ្ឋាភិបាលបង្កើតនាថ្ងៃទី ៩ មេសា ២០២១ ដើម្បីសិក្សា ផ្តួចផ្តើម រៀបចំលិខិតបទដ្ឋានគតិយុត្ត សម្រាប់គ្រប់គ្រងឧកញ៉ា ការផ្តល់គោរមងារឧកញ៉ា ការដកហូតគោរមងារឧកញ៉ា និងសិក្សាស្រាវជ្រាវច្បាប់ លិខិតបទដ្ឋានគតិយុត្តនានា៕
