.jpg)
អ្នកផ្ទុកមេរោគអេដស៍នៅឃុំរកា ពេលទទួលជំនួយឧបត្ថម្ភកាលពីថ្ងៃទី ៩ កុម្ភៈ។ រូបថត ក្រសួងព័ត៌មាន
បាត់ដំបងៈ នៅពេលនេះមានសប្បុរសជនមួយចំនួនបានបន្តផ្ដល់អំណោយមនុស្សធម៌ជាស្បៀង និងសម្ភារមួយចំនួនដល់ប្រជាពលរដ្ឋ ១០០ គ្រួសារដែលឆ្លងមេរោគអេដស៍នៅឃុំរកាក្នុងស្រុកសង្កែ ខេត្តបាត់ដំបង ខណៈដែលរហូតមកដល់ពេលនេះមានអ្នកឆ្លងមេរោគអេដស៍ ៤០ នាក់ហើយបានស្លាប់ ក្នុងចំណោមអ្នកឆ្លង ២៧៥ នាក់។
លោក ស៊ូ សានិត អនុប្រធានមន្ទីរសុខាភិបាលខេត្តបាត់ដំបងបានប្រាប់ភ្នំពេញប៉ុស្តិ៍ថា ខណៈអ្នកជំងឺអេដស៍ចំនួន ១០០ គ្រួសារក្នុងឃុំរកា កំពុងមានការខ្វះខាតក្នុងជីវភាពរស់នៅប្រចាំថ្ងៃដែលបណ្ដាលមកពីការរាតត្បាតនៃជំងឺឆ្លងជាសកលកូវីដ-១៩ សប្បុរសជនមួយចំនួនបានចូលរួមផ្ដល់អំណោយជាស្បៀង និងសម្ភារប្រើប្រាស់មួយចំនួន ដូចជាទឹកត្រី ទឹកស៊ីអ៊ីវ ត្រីខកំប៉ុងអង្ករ ម៉ាស់ សាប៊ូសម្លៀកបំពាក់ និងថវិកាដល់ពួកគេជាបន្តបន្ទាប់ ដើម្បីជួយសម្រាលបន្ទុកជីវភាពរស់នៅប្រចាំថ្ងៃរបស់ពួកគេ។
លោកថ្លែងថា៖ «អំណោយដែលសប្បុរសជនបានផ្ដល់សម្រាប់ចែកជូនដល់អ្នកជំងឺអេដស៍ចំនួន ១០០ គ្រួសារក្នុងឃុំរកានៅថ្ងៃទី ៩ ខែកុម្ភៈ មិនខុសគ្នាពីអំណោយដែលបានផ្ដល់ជូនកាលពីមុនៗនោះទេ គឺ ក្នុង ១ គ្រួសារទទួលបានត្រីខ ១ យួរ ទឹកស៊ីអ៊ីវ ១ យួរ ទឹកត្រី ១ យួរ ម៉ាស់ ១ ប្រអប់ សាប៊ូសម្លៀកបំពាក់ថវិកា ១ ម៉ឺនរៀល និងអង្ករ ២០ គីឡូក្រាម»។
លោកបានបន្តថា អំណោយនេះគឺជាផ្នែកមួយនៃការចូលរួមចំណែកជាមួយរដ្ឋបាលថ្នាក់ក្រោមជាតិក្នុងសកម្មភាពឆ្លើយតបការងារអេដស៍ក្នុងសហគមន៍។ គិតមកទល់បច្ចុប្បន្ននេះ បងប្អូនរងគ្រោះនៅឃុំរកាគឺបានរស់នៅជាមួយមេរោគអេដស៍ អស់រយៈពេល ៧ ឆ្នាំមកហើយ។ ទន្ទឹមនឹងនេះ លោកបានអំពាវនាវដល់គ្រួសារអ្នកជំងឺទាំងនេះត្រូវធ្វើការថែទាំសុខភាពលេបថ្នាំឱ្យបានទៀងទាត់ ដើម្បីរក្សាជីវិតរស់នៅបន្តទៅទៀត ដោយអនុវត្តឱ្យបាននូវវិធានអនាម័យដើម្បីសុខភាព និងវិធាន ៣ កុំ ៣ ការពារ ដើម្បីទប់ស្កាត់ការឆ្លងរីករាលដាលនៃជំងឺកូវីដ ១៩។
លោក លឹម គឹមសេង មន្ត្រីកម្មវិធីអេដស៍នៃគម្រោង EpiC នៃអង្គការ FHI360 និងជាតំណាងសមាជិកដែលបានចូលរួមផ្តួចផ្តើមកម្មវិធីសប្បុរសធម៌នេះបានប្រាប់ភ្នំពេញប៉ុស្តិ៍ថាដរាបណាគម្រោងនានារបស់អង្គការសង្គមស៊ីវិលនៅតែមិនទាន់ទទួលបានថវិកា សម្រាប់គាំទ្រដល់អ្នកផ្ទុកមេរោគអេដស៍ទាំងនេះសប្បុរសជន គឺជាផ្នែកមួយដ៏សំខាន់ដែលមិនអាចខ្វះបានក្នុងការចូលរួមចំណែកជួយដោះស្រាយភាពខ្វះខាតក្នុងជីវភាពរស់នៅរបស់ពួកគេក្នុងអំឡុងគ្រាដ៏លំបាកនេះ។
លោកបញ្ជាក់ថា៖ «កន្លងមក គ្រួសារអ្នកភូមិដែលមានផ្ទុកមេរោគអេដស៍ទាំងនោះ ជួបការលំបាកស្រាប់ទៅហើយដល់ឥឡូវថែមទាំងមានជំងឺកូវីដ ១៩ អូមីក្រុងទៀតនោះជីវភាពរបស់ពួកគាត់កាន់តែលំបាកថែមទៀតព្រោះមិនអាចចេញទៅរកអ្វីបាន។ គ្មានប្រាក់ចំណូល គឺគ្មានអាហារគ្រប់គ្រាន់នោះទេ អ៊ីចឹងពួកគាត់ងាយប្រឈមគ្រោះថ្នាក់ដល់ជីវិត ព្រោះតែជំងឺប្រចាំកាយរបស់គាត់»។
កាលពីចុងឆ្នាំ ២០១៤ មានករណីផ្ទុះការឆ្លងមេរោគអេដស៍ដ៏ច្រើននៅក្នុងឃុំរកា ស្រុកសង្កែ ខេត្តបាត់ដំបង មានសរុបចំនួន ២៧៥ នាក់ក្នុងនោះមានកុមារចំនួន ៦៨ នាក់ ដែលបានឆ្លងជំងឺអេដស៍ តាមរយៈការចាក់ថ្នាំព្យាបាលជំងឺពីគ្រូពេទ្យនៅក្នុងឃុំ ឈ្មោះ យ៉ែម ជ្រិន ក្នុងអំឡុងពីឆ្នាំ ១៩៩៦ ដល់ឆ្នាំ ២០១៤។ សាលាដំបូងខេត្តបាត់ដំបងកាលពីថ្ងៃទី ៣ ធ្នូ ឆ្នាំ ២០១៥ ក៏បានផ្ដន្ទាទោសគ្រូពេទ្យរូបនោះឱ្យជាប់ពន្ធនាគារ ២៥ ឆ្នាំក្រោមបទចោទចំនួន ៣ ករណី គឺបទបើកកន្លែងព្យាបាលជំងឺដោយគ្មានការអនុញ្ញាតបទអំពើឃោរឃៅពាក់ព័ន្ធនឹងឃាតកម្ម និងបទចម្លងមេរោគអេដស៍ទៅអ្នកដទៃដោយចេតនា។
បើតាមលោកស្រី ស៊ឹម ពៅ មេឃុំរកាគិតមកទល់ពេលនេះ អ្នកជំងឺអេដស៍ចំនួន ៤០ នាក់ ក្នុងចំណោមអ្នកផ្ទុកមេរោគអេដស៍សរុប ២៧៥ នាក់នៅឃុំរកាបានស្លាប់។
លោកស្រីបញ្ជាក់ថា៖ «ចាប់តាំងពីមានការរីករាលដាលនៃជំងឺកូវីដ ១៩ មក អាជ្ញាធរយើងពុំសូវបានផ្ដល់ស្បៀងអាហារជួយដល់ពួកគាត់ឱ្យបានគ្រប់គ្រាន់ដូចកាលពីមុននោះទេ ព្រោះត្រូវចែករំលែកដល់គ្រួសារប្រជាពលរដ្ឋដែលខ្វះខាតដោយសារការរងផលប៉ះពាល់ពីជំងឺកូវីដ ១៩ ផងដែរ»។
យោងតាមរបាយការណ៍ពីអង្គការ FHI360 នៅក្នុងខេត្តបាត់ដំបង បច្ចុប្បន្នមានអ្នកផ្ទុកមេរោគអេដស៍ទាំងចាស់ទាំងក្មេងប្រមាណ ៥ ០០០ នាក់ដោយពួកគេតែងតែមកទទួលសេវាប្រឹក្សា និងព្យាបាលនៅតាមមណ្ឌលសុខភាពទាំង ៦ របស់ខេត្ត។
អ្នកភូមិម្នាក់ក្នុងឃុំរការ ដែលមានផ្ទុកមេរោគអេដស៍អាយុ ៣២ ឆ្នាំ បានប្រាប់ភ្នំពេញប៉ុស្តិ៍ថា ចាប់តាំងពីមានការរីករាលដាលនៃជំងឺកូវីដ ១៩ មក ក្រុមគ្រួសាររបស់គាត់ក៏ដូចជាគ្រួសារអ្នកផ្ទុកជំងឺអេដស៍ទូទាំងឃុំរកាជួបបញ្ហាប្រឈមជាខ្លាំងក្នុងជីវភាពរស់នៅដោយពួកគាត់ មិនអាចទៅប្រកបមុខរបរអ្វីផ្សេងទៀត ក្រៅពីធ្វើស្រែនោះទេ ខណៈអង្គការសង្គមស៊ីវិល ដែលធ្លាប់ជួយឧបត្ថម្ភជាថវិកា និងស្បៀងដល់ពួកគាត់ត្រូវបានផ្អាកសកម្មភាពហើយជំនួយទាំងនោះ ក៏ត្រូវបានគេផ្ដាច់ផងដែរ។ «ពួកយើងជាអ្នកផ្ទុកមេរោគអេដស៍ បើសិនជាមិនប្រយ័ត្ន ឆ្លងជំងឺកូវីដ ១៩ ទៀតនោះ គឺពិតជាមិនអាចព្យាបាលជានោះទេ ដូច្នេះហើយទើបពួកយើងមិនហ៊ានចេញទៅប្រកបការងារអ្វីផ្សេងទៀត ក្រៅពីធ្វើស្រែនោះទេ ហើយឥឡូវយើងមានការខ្វះខាតក្នុងជីវភាព»។ អ្នកស្រីបានឱ្យដឹងថា ក្រុមគ្រួសារសាច់ញាតិរបស់គាត់ មានអ្នកផ្ទុកជំងឺអេដស៍ ១៩ នាក់ហើយមកដល់ពេលនេះស្លាប់អស់ ៣ នាក់ហើយ៕
