.jpg)
លោក ឌួង ងៀប ថ្លែងនៅមុខពន្ធនាគារព្រៃសនាពេលកន្លងមក។ រូបថត ហ្វេសប៊ុក
ភ្នំពេញៈ តុលាការរាជធានីភ្នំពេញនៅថ្ងៃទី ១៤ កុម្ភៈសម្រេចឃុំខ្លួនលោកឧកញ៉ា ឌួង ងៀប ជាអគ្គលេខាធិការរងនៃក្រសួងមហាផ្ទៃនៅពន្ធនាគារ PJ បន្ទាប់ពីនគរបាលរាជធានីភ្នំពេញចាប់ខ្លួនតាមដីកាពាក់ព័ន្ធបទឆបោកប្រាក់ក្នុងជំនួញដីធ្លី។
លោក អ៊ី រិន្ទ អ្នកនាំពាក្យតុលាការរាជធានីភ្នំពេញបានប្រាប់ ភ្នំពេញ ប៉ុស្តិ៍ នៅថ្ងៃទី ១៤ កុម្ភៈថា ចៅក្រមស៊ើបសួរនៃតុលាការរាជធានីភ្នំពេញនៅថ្ងៃទី ១៤ កុម្ភៈបានសម្រេចឃុំខ្លួនលោកឧកញ៉ា ឌួង ងៀប នៅក្នុងពន្ធនាគារ PJ ក្នុងរាជធានី។
លោកប្រាប់ថា៖ «សមត្ថកិច្ចឃាត់ខ្លួនតាមដីកា ហើយសមត្ថកិច្ចបាននាំមកតុលាការរាជធានីភ្នំពេញ។ បន្ទាប់ពីត្រូវស៊ើបសួរបន្ថែមចៅក្រមស៊ើបសួរបានសម្រេចឃុំខ្លួនគាត់នៅពន្ធនាគារ PJ»។
ពាក់ព័ន្ធនឹងការឃាត់ខ្លួនលោកឧកញ៉ា ឌួង ងៀប និងជាមន្ត្រីនគរបាលជាន់ខ្ពស់ដែលជាអគ្គលេខាធិការរងនៃក្រសួងមហាផ្ទៃរូបនេះ ភ្នំពេញ-ប៉ុស្តិ៍នៅថ្ងៃទី ១៤ កុម្ភៈត្រូវបានលោក ប៊ុន សត្យា នាយការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលរាជធានីភ្នំពេញឱ្យដឹងថា កម្លាំងសមត្ថកិច្ចនៃការិយាល័យនគរបាលព្រហ្មទណ្ឌកម្រិតស្រាលបានចាប់ខ្លួនលោកឧកញ៉ា ឌួង ងៀប នៅថ្ងៃទី ១៤ កុម្ភៈតាមដីកាបង្គាប់ឱ្យចាប់ខ្លួនរបស់សាលាដំបូងរាជធានីភ្នំពេញ។
លោកថ្លែងថា៖ «ស្នងការដ្ឋាននគរបាលរាជធានីភ្នំពេញបានអនុវត្តតាមដីកាចាប់ខ្លួនដែលមានកម្លាំងការិយាល័យនគរបាលព្រហ្មទណ្ឌកម្រិតស្រាលខ្ញុំអនុវត្ត។ ហ្នឹងហើយករណីខាងខ្ញុំចាប់គាត់»។
តាមសេចក្តីថ្លែងការណ៍របស់អ្នកនាំពាក្យសាលាដំបូងរាជធានីភ្នំពេញនៅថ្ងៃទី ១០ កុម្ភៈ ឆ្នាំ ២០២២ បានសរសេរថា កាលពីថ្ងៃទី ៧ ខែកុម្ភៈ ឆ្នាំ ២០២២ ឈ្មោះ ឌួង ងៀប បានបង្ហោះឃ្លីបវីដេអូមួយ និងមានការចែកចាយតៗគ្នា ក្រោមការចោទប្រកាន់សាលាដំបូងរាជធានីភ្នំពេញថា បានចាត់ការសំណុំរឿងរបស់គាត់ប្រែពីសទៅខ្មៅ និងចោទប្រកាន់រូបគាត់ថាបានឆបោកជនជាតិតៃវ៉ាន់។
បើតាមអង្គហេតុក្នុងសេចក្តីថ្លែងការណ៍នោះកាលពីថ្ងៃទី ៤ ខែវិច្ឆិកា ឆ្នាំ ២០២០ អយ្យការអមសាលាដំបូងរាជធានីភ្នំពេញបានបើកការស៊ើបសួរលើឈ្មោះ ឌួង ងៀប តាមដីកាសន្និដ្ឋាន បញ្ជូនរឿងឱ្យស៊ើបសួរ ចុះថ្ងៃទី២១ ខែមិថុនា ឆ្នាំ២០២១ ពីបទឆបោក និងមិនបំពេញកាតព្វកិច្ចចំពោះឧបករណ៍អាចជួញដូរបាន លើអង្គហេតុពាក់ព័ន្ធនឹងការលក់អចលនវត្ថុមួយកន្លែង។
នៅក្នុងសំណុំរឿងនេះមាន អ្នកទិញដីជាដើមបណ្តឹងរដ្ឋប្បវេណីឈ្មោះ CHIH YU YEN និងឈ្មោះ YAO CHING KING បានប្រគល់ប្រាក់ថ្លៃដីគ្រប់ចំនួន ៧ ៣០៥ ០០០ ដុល្លារឱ្យទៅជនត្រូវចោទឈ្មោះ ឌួង ងៀប រួចរាល់ ប៉ុន្តែជនត្រូវចោទពុំមានដីនោះឡើយ។
សេចក្តីថ្លែងការណ៍បន្តថា ក្នុងការសម្របសម្រួលដោះស្រាយទំនាស់នេះឈ្មោះ ឌួង ងៀប បានចេញមូលប្បទានបត្រចំនួន ៣ សន្លឹកដែលសន្លឹកទី ១ មានតម្លៃ ១ ៦៥០ ០០០ ដុល្លារអាមេរិក សន្លឹកទី ២ មានតម្លៃ ៣ ៦៥៥ ០០០ ដុល្លារអាមេរិក និងសន្លឹកទី ៣ មានតម្លៃ ២ ០០០ ០០០ ដុល្លារអាមេរិកទៅឱ្យដើមបណ្តឹងរដ្ឋប្បវេណី។
សេចក្តីថ្លែងការណ៍បន្តថា បន្ទាប់មកដើមបណ្តឹងរដ្ឋប្បវេណីបានយកមូលប្បទានបត្រទាំង ៣ សន្លឹកនោះទៅបើកប្រាក់នៅធនាគារ ប៉ុន្តែខាងធនាគារបញ្ជាក់ថា មូលប្បទានបត្រទាំង ៣ សន្លឹកនោះគ្មានសាច់ប្រាក់ទេ។
សេចក្តីថ្លែងការណ៍បន្តទៀតថា ក្នុងដំណាក់កាលស៊ើបសួរគឺ ចៅក្រមស៊ើបសួរបានពិនិត្យផ្ទៀងផ្ទាត់ភ័ស្តុតាង និងសួរចម្លើយជនត្រូវចោទឈ្មោះ ឌួង ងៀប ហើយបានសម្រេចមិនឃុំខ្លួនជនត្រូវចោទទេ។ ដោយជំនួសមកវិញនូវការដាក់ជនត្រូវចោទឱ្យនៅក្រោមការត្រួតពិនិត្យ តាមផ្លូវតុលាការ តាមរយៈដីកាសម្រេចចុះថ្ងៃទី ១៣ ខែសីហា ឆ្នាំ ២០២១ ដែលមានកាតព្វកិច្ចតម្រូវឱ្យជនត្រូវចោទ ដាក់ប្រាក់ធានាមិនឃុំខ្លួននេះចំនួន ៥ ៣០៥ ០០០ ដុល្លារ មកតម្កល់នៅក្នុងគណនីរបស់សាលាដំបូងរាជធានីភ្នំពេញក្នុងរយៈពេល ១ ខែ។ តែជនត្រូវចោទពុំបានយកប្រាក់ធានាខ្លួននេះមកតម្កល់តាមការកំណត់ក្នុងដីកាសម្រេចនោះឡើយ។ ដោយជនត្រូវចោទឈ្មោះ ឌួង ងៀប បានគេចវេះពីកាតព្វកិច្ចនៃការត្រួតពិនិត្យតាមផ្លូវតុលាការ។ ហេតុដូច្នេះ ចៅក្រមស៊ើបសួរក៏បានចាត់វិធានការបន្តតាមនីតិវិធី ស្របតាមបញ្ញត្តិមាត្រា ២៣០ នៃក្រមនីតិវិធីព្រហ្មទណ្ឌ៕
វីដេអូ៖
