.jpg)
បុរសឡាវ និងគ្រឿងញៀនជិត ១០ គីឡូត្រូវបានបង្ក្រាបពីថ្ងៃទី ១៣ កុម្ភៈ នៅស្ទឹងត្រែង។រូប ប៉ូលិស
ស្ទឹងត្រែងៈ បុរសជនជាតិឡាវម្នាក់ និងគ្រឿងញៀនប្រមាណ ១០ គីឡូក្រាម ត្រូវបានកម្លាំងនគរបាលនៃមន្ទីរប្រឆាំងគ្រឿងញៀនក្រសួងមហាផ្ទៃសហការជាមួយកម្លាំងការិយាល័យនគរបាលបង្ក្រាបគ្រឿងញៀនខេត្តស្ទឹងត្រែងចាប់ឃាត់ខ្លួនកាលពីថ្ងៃទី ១៣ ខែកុម្ភៈ ខណៈកំពុងដឹកជញ្ជូនចូលមកក្នុងប្រទេសកម្ពុជាតាមច្រករបៀង។ នេះបើតាម មន្ត្រីនគរបាលខេត្តស្ទឹងត្រែង។
លោក ចែម ផានិត ប្រធានការិយាល័យបង្ក្រាបបទល្មើសគ្រឿងញៀននៃស្នងការដ្ឋាននគរបាលខេត្តស្ទឹងត្រែងប្រាប់ភ្នំពេញប៉ុស្តិ៍នៅថ្ងៃទី ១៤ កុម្ភៈ ថា បុរសជនជាតិឡាវ ឈ្មោះ ភីបម៉ាន់ ចាន់កាន់ អាយុ ២៤ ឆ្នាំ មានស្រុកកំណើតនៅភូមិថាកាំង ស្រុកមួន ខេត្តចំប៉ាសាក់ ប្រទេសឡាវ ត្រូវបានអាជ្ញាធរកម្ពុជាចាប់ខ្លួន កាលពីព្រឹកថ្ងៃទី ១៣ កុម្ភៈ ឆ្នាំ ២០២២ ខណៈកំពុងធ្វើសកម្មភាពដឹកជញ្ជូនគ្រឿងញៀនចូលមកក្នុងប្រទេសកម្ពុជាតាមច្រករបៀងមួយស្ថិតក្នុងភូមិសាស្ត្រ ស្រុកបុរីអូរស្វាយសែនជ័យ ខេត្តស្ទឹងត្រែង។
លោកបញ្ជាក់ថា៖ «ជនសង្ស័យត្រូវបានចាប់ខ្លួនក្នុងបទល្មើសជាក់ស្ដែង ខណៈកំពុងធ្វើសកម្មភាព ស្ពាយគ្រឿងញៀនប្រភេទ Ice-Methamphetamine ចំនួន ១០ កញ្ចប់ធំ មានទម្ងន់សរុបជាង ៩,៨៦ គីឡូក្រាម ចូលមកក្នុងប្រទេសកម្ពុជាយើងតាមច្រករបៀងមួយ ស្ថិតក្នុងស្រុកបុរីអូរស្វាយសែនជ័យ»។
បើតាមលោក ផានិត មុនពេលឃាត់ខ្លួនជនសង្ស័យខាងលើនេះ កម្លាំងបង្កប់នៅតាមជួរព្រំដែនកម្ពុជា-ឡាវ បានរាយការណ៍ថា មានពលរដ្ឋឡាវដ៏គួរឱ្យសង្ស័យ ១ ក្រុមបាននាំគ្នាដើរលុកចូលមកក្នុងព្រៃនៃតំបន់ព្រំដែនឡាវ-កម្ពុជា។ បុរសម្នាក់ក្នុងចំណោមគ្នា ៤ នាក់បានស្ពាយការុងពណ៌ខៀវមួយដោយមានផ្ទុកវត្ថុគួរឱ្យសង្ស័យនៅក្នុងនោះ បានដើរគេចវេះពីគេ ហើយបានលួចឆ្លងចូលមកក្នុងប្រទេសកម្ពុជាតាមច្រករបៀងដោយខុសច្បាប់។
បន្ទាប់ពីទទួលបានសេចក្ដីរាយការណ៍នោះកម្លាំងរបស់លោកបានសហការជាមួយកម្លាំងមន្ទីរប្រឆាំងគ្រឿងញៀនក្រសួងមហាផ្ទៃបានចុះប្រតិបត្តិការស្រាវជ្រាវលើករណីនេះ ហើយបានប្រទះឃើញបុរសជនជាតិឡាវ ដែលគួរឱ្យសង្ស័យនោះ ក៏ធ្វើការចាប់ឃាត់ខ្លួន ហើយឆែកឆេររកឃើញវត្ថុតាងគ្រឿងញៀនចំនួន ១០ កញ្ចប់ធំ។
លោកបន្ថែមថា៖ «ក្រោយពីសាកសួរ ជនសង្ស័យបានសារភាពថា ខ្លួនគ្រាន់តែជាអ្នកស៊ីឈ្នួលស្ពាយទំនិញឆ្លងកាត់ព្រំដែនឱ្យគេប៉ុណ្ណោះ។ បច្ចុប្បន្ន ជនសង្ស័យ និងវត្ថុតាងគ្រឿងញៀនជិត ១០ គីឡូក្រាមនោះ ត្រូវបានសមត្ថកិច្ចយើងកសាងសំណុំរឿងបញ្ជូនទៅកាន់សាលាដំបូងខេត្តស្ទឹងត្រែង ដើម្បីចំណាត់ការបន្តតាមនីតិវិធី»។
ពាក់ព័ន្ធនឹងសំណុំរឿងគ្រឿងញៀនឆ្លងដែនពីប្រទេសឡាវនេះលោក ឈុំ ស៊ាងហាក់ អ្នកនាំពាក្យសាលាដំបូងខេត្តស្ទឹងត្រែងប្រាប់ភ្នំពេញប៉ុស្តិ៍ថា សំណុំរឿងគ្រឿងញៀន និងជនសង្ស័យជនជាតិឡាវនោះ បានបញ្ជូនមកដល់តុលាការហើយកាលពីរសៀលថ្ងៃទី ១៤ ខែកុម្ភៈ។
លោកថ្លែងថា៖ «បច្ចុប្បន្នជនសង្ស័យកំពុងស្ថិតក្រោមនីតិវិធីស៊ើបសួរចម្លើយ ដោយតំណាងអយ្យការអមសាលាដំបូងខេត្តស្ទឹងត្រែង»។
ប៉ុន្មានឆ្នាំចុងក្រោយនេះ បទល្មើសគ្រឿងញៀនបានផ្ទុះឡើងពាសពេញផ្ទៃប្រទេសកម្ពុជាបង្កឱ្យមានក្ដីព្រួយកង្វល់យ៉ាងខ្លាំងដល់ដំណើរការអភិវឌ្ឍន៍សេដ្ឋកិច្ច និងសង្គមនៅកម្ពុជា។ នេះបើតាមការលើកឡើងរបស់លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ៕
