សៀមរាបៈ អាជ្ញាធរខេត្តសៀមរាបបានសម្របសម្រួលធ្វើការដោះស្រាយបញ្ចប់ ការតវ៉ារបស់កម្មករជិត ៣០ នាក់ ដែលជាកម្មករចូលរួមធ្វើផ្លូវ ៣៨ ខ្សែក្នុងក្រុងសៀមរាប បន្ទាប់ពីកម្មករបានប្រមូលផ្តុំគ្នាតវ៉ា ខណៈដែលមេការមិនបានបើកប្រាក់ខែជាច្រើនខែដល់ពួកគេ។
កាលពីថ្ងៃទី ១២ កុម្ភៈឆ្នាំ ២០២២ កម្មករធ្វើផ្លូវ ៣៨ ខ្សែក្នុងក្រុងសៀមរាបប្រមាណជិត ៣០ នាក់បាននាំគ្នាប្រមូលផ្តុំតវ៉ាទាមទារបើកប្រាក់ខែពីមេការម្នាក់ឈ្មោះ សេង ពេជ្រ ដែលទទួលបានសិទ្ធិសាងសង់បន្តពីរដ្ឋក្នុងការសាងសង់ផ្លូវ ៣៨ ខ្សែក្នុងក្រុមសៀមរាប។
លោក សុខ ថុល នាយករដ្ឋបាលសាលាខេត្តសៀមរាបបានប្រាប់ភ្នំពេញប៉ុស្តិ៍នៅថ្ងៃទី ១៤ កុម្ភៈ ថា ករណីនេះគឺកើតឡើង បន្ទាប់ពីមេការដែលទទួលបានសិទ្ធិសាងសង់បន្តក្នុងការសាងសង់ផ្លូវនេះ មិនព្រមបើកប្រាក់ខែជូនកម្មកររបស់ខ្លួន ហើយកម្មករគ្មានជម្រើសក៏មកប្រមូលផ្តុំគ្នាតវ៉ា។
ក្រោយការតវ៉ាដោយមានការសម្របសម្រួលពីអាជ្ញាធរពាក់ព័ន្ធ ការតវ៉ានេះក៏ត្រូវបានបញ្ចប់ដោយមានការសម្របសម្រួលក្នុងការផ្តល់ប្រាក់ទៅឱ្យកម្មករ ហើយមន្ត្រីជំនាញនឹងបន្តចរចាបន្តទៀតជាមួយមេការឈ្មោះ សេង ពេជ្រ។ លោកបញ្ជាក់ថា៖ «រឿងនេះ មកពីអ្នកម៉ៅការ គាត់បើកលុយគ្រប់ចំនួនពីក្រុមហ៊ុនហើយ ប៉ុន្តែគាត់មិនបានបើកឱ្យកម្មករ ព្រោះជាធម្មតា កម្មករគាត់មានមេការរបស់គាត់ជាអ្នកទទួលខុសត្រូវ តែមេការយកលុយហើយមិនបើកឱ្យកម្មករ។ យ៉ាងណារឿងនេះគេបានហៅមកសម្របសម្រួលអស់ហើយ»។
កម្មករដែលបានប្រមូលផ្តុំគ្នាតវ៉ា តែមិនបានបញ្ចេញឈ្មោះបានអះអាងប្រាប់អ្នកសារព័ត៌មានកាលពីថ្ងៃទី ១២ កុម្ភៈថា៖ «ក្រុមខ្ញុំមានគ្នាជិត ៣០ នាក់ ទទួលបន្ទុកធ្វើផ្លូវ ៥ ខ្សែនៅជុំវិញផ្សារចាស់ក្នុងភូមិមណ្ឌល ១ សង្កាត់ស្វាយដង្គំ។ កន្លងមកលោក សេង ពេជ្រ ជាមេការមិនដែលបើកប្រាក់ខែឱ្យទេ គាត់តែងឱ្យកម្មករខ្ចីលុយ អ្នកខ្លះខ្ចីបាន ៤០ ម៉ឺនរៀល ឬ ៦០ ម៉ឺន ឬ ១ លានរៀលតាមចិត្តដែលគាត់ឱ្យខ្ចី។ ឥឡូវនេះពួកខ្ញុំបានធ្វើផ្លូវរួចរាល់ហើយ ប៉ុន្តែឈ្មោះ សេង ពេជ្រ មិនបើកលុយឱ្យទេហើយថា ខាងក្រុមហ៊ុនមិនទម្លាក់លុយឱ្យ»។
ការមិនបើកប្រាក់ខែនេះគឺមានកម្មករខ្លះបានបាត់ប្រាក់ខែ ៣ ខែ និងខ្លះទៀតដល់ទៅ ៥ ខែ ហើយក្នុង ១ ខែ ចន្លោះពី ៣០០$ ទៅ ៥០០$។ នេះបើតាមការអះអាងរបស់កម្មករ។
ភ្នំពេញប៉ុស្តិ៍មិនអាចស្វែងរកប្រភព ដើម្បីទាក់ទងលោក សេង ពេជ្រ ជាមេការដែលទទួលបានសិទ្ធិសាងសង់ផ្លូវ ៥ ខ្សែនៅជុំវិញផ្សារចាស់នេះបានទេកាលពីថ្ងៃទី ១៤ កុម្ភៈ។
លោកហាយ យង់ ប្រធានការិយាល័យ សាធារណការដឹកជញ្ចូន អនាម័យបរិស្ថាន និងសណ្តាប់ធ្នាប់សាធារណៈក្រុងសៀមរាបបានប្រាប់ភ្នំពេញប៉ុស្តិ៍ថា ជម្លោះនេះគឺមិនមែនកើតឡើងជាមួយក្រុមហ៊ុនណានោះទេគឺកម្មករទាំងនោះ ស្ថិតក្រោមការគ្រប់គ្រងរបស់មេការ ដែលទទួលកិច្ចការបន្តពីកងវិស្វកម្មក្នុងការសាងសង់ផ្លូវ ៣៨ ខ្សែ។ ក្រោយមានតវ៉ានេះ អាជ្ញាធរបានសម្រេចផ្តល់ថវិកាដែលមេការមិនព្រមផ្តល់ឱ្យកម្មករគ្រប់ចំនួន ហើយកម្មករក៏បានយល់ព្រម និងបញ្ឈប់ការតវ៉ាដែរ។
លោកបញ្ជាក់ថា៖ «កម្មករទាំងនេះគឺសុទ្ធតែជាក្រុមជាងដែលទទួលការងារពីកងវិស្វកម្ម ព្រោះការសាងសង់ផ្លូវនេះគឺមានក្រុមវិស្វកម្មមួយៗទទួលខុសត្រូវពីក្រសួងដើម្បីយកទៅអនុវត្ត ហើយករណីមិនបើកប្រាក់ជូនកម្មករនេះក៏ព្រោះមានកម្មករមួយចំនួន គាត់ធ្វើឈប់ៗ ហើយគេក៏មិនបានបើកឱ្យគាត់ តែដល់ពេលនេះយើងសម្របសម្រួលដោះស្រាយចប់ហើយ»៕