កោះកុងៈ រដ្ឋបាលខេត្តកោះកុងបានបើកកិច្ចប្រជុំពិភាក្សាលើការរៀបចំគម្រោងអភិវឌ្ឍន៍សម្រាប់ឆ្នាំ ២០២២ ដោយបានដាក់ទិសដៅលើការកសាងហេដ្ឋារចនាសម្ព័ន្ធ និងវិស័យសំណង់ ខណៈខេត្តជាប់សមុទ្រមួយនេះកំពុងទទួលបានការចាប់អារម្មណ៍ពីសំណាក់វិនិយោគិន។
រដ្ឋបាលខេត្តកោះកុងកាលពីថ្ងៃទី ១០ ខែកុម្ភៈ បានបើកកិច្ចប្រជុំពិភាក្សាលើការរៀបចំគម្រោងអភិវឌ្ឍន៍ខេត្តនេះសម្រាប់ឆ្នាំ ២០២២ ស្របតាមផែនការវិនិយោគ ៣ ឆ្នាំរំកិល ដែលទទួលបានការអនុម័តពីក្រុមប្រឹក្សាខេត្ត។
អភិបាលរងខេត្ត និងជាអនុប្រធាននៃគណៈកម្មការរៀបចំគម្រោងអភិវឌ្ឍន៍ខេត្តកោះកុង លោក សំឃិត វៀន ដែលបានដឹកនាំកិច្ចប្រជុំនោះថ្លែងថា ក្នុងនាមសមាជិកគណៈកម្មាធិការរៀបចំគម្រោងអភិវឌ្ឍន៍ខេត្តត្រូវយកចិត្តទុកដាក់ខ្ពស់ ក្នុងការគ្រប់គ្រងគម្រោង ចាត់ចែង ការសិក្សា និងរៀបចំគម្រោង និងសំណើគម្រោង ព្រមទាំងពិនិត្យអនុម័តសំណើគម្រោងផងដែរ។ កិច្ចប្រជុំនេះ គឺមានគោលបំណង ដើម្បីពិភាក្សាជ្រើសរើសគម្រោងអភិវឌ្ឍន៍ ដោយប្រើថវិកាអភិវឌ្ឍន៍ខេត្តកោះកុង ឆ្នាំ ២០២២។
លោកថា៖ «ចំពោះគម្រោងទាំងអស់សម្រាប់ឆ្នាំ ២០២២ និងឥណទានបន្ថែមត្រូវបានទទួលការគាំទ្រ និងអនុម័តពីសមាជិកគណៈកម្មការរៀបចំគម្រោងជាផែនការតម្រង់ទិសសម្រាប់អភិវឌ្ឍខេត្តកោះកុង ស្របតាមផែនការវិនិយោគ ៣ ឆ្នាំរំកិល ដែលបានអនុម័តពីក្រុមប្រឹក្សាខេត្តកោះកុង។
លោក សំឃិត វៀន ឱ្យដឹងថា សម្រាប់ខេត្តកោះកុងមានសក្តានុពលច្រើនវិស័យក្នុងការវិនិយោគ ជាពិសេសវិស័យទេសចរណ៍ ដែលកំពុងទទួលបានការចាប់អារម្មណ៍ខ្លាំងពីអ្នកទេសចរ និងវិនិយោគិន។
លោកថា៖ «ទី ១ វិស័យទេសចរណ៍ គឺជាសក្តានុពលមួយកំពុងតែមានភាពទាក់ទាញខ្លាំងទី ២ សក្តានុពលលើវិស័យកសិកម្ម សម្រាប់កិច្ចការបង្កបង្កើនផល និងកសិឧស្សាហកម្ម ដែលជាកត្តាមួយជំរុញដល់ការអភិវឌ្ឍនៅខេត្ត»។ ប៉ុន្តែលោកថា ដោយឡែកការវិនិយោគលើរោងចក្រនៅមានចំនួនតិចនៅឡើយ ខណៈគិតត្រឹមឆ្នាំ ២០២២ នេះមានរោងចក្រប្រហែល ២ ឬ ៣ ប៉ុណ្ណោះ គឺរោងចក្រកាត់ដេរ និងរោងចក្រឧស្សាហកម្ម និងមានសហគ្រាសមួយចំនួន។
អភិបាលខេត្តកោះកុង លោកស្រី មិថុនា ភូថង ប្រាប់ ភ្នំពេញ ប៉ុស្តិ៍ នៅថ្ងៃទី ១៣ ខែកុម្ភៈថា ចំពោះផែនការអភិវឌ្ឍន៍ឆ្នាំ ២០២២ ខេត្តផ្តោតសំខាន់ទៅលើហេដ្ឋារចនាសម្ព័ន្ធទាំងផ្លូវក្រុង ស្រុក និងតាមបណ្តាភូមិ ដែលមានការខូចខាត។
លោកស្រីថា៖ «ក្រៅពីនោះ មានការអភិឌ្ឍទៅលើវិស័យសំណង់ដែរ ព្រោះក្រុមហ៊ុនមួយចំនួនមានចំណាប់អារម្មណ៍នៅខេត្តនេះ»។ យ៉ាងណាមិញសម្រាប់ព័ត៌មានលម្អិតពីការអភិវឌ្ឍនៅក្នុងខេត្ត លោកស្រី មិនទាន់អាចជម្រាបជូនបានទេ។
ពាក់ព័ន្ធនឹងការអភិវឌ្ឍខេត្តជាប់សមុទ្រនេះដែរ កាលពីចុងឆ្នាំ ២០២១ អាជ្ញាធរខេត្តកោះកុងបានរៀបចំទិន្នន័យលម្អិតអំពីចំនួនកោះនៅលើលម្ហសមុទ្រនៅក្នុងខេត្តនេះចំនួន ២៣ ដើម្បីបង្កលក្ខណៈក្នុងការអភិវឌ្ឍកោះ ខណៈមានការកើនឡើងនូវចំនួនភ្ញៀវទេសចរ និងមានក្រុមហ៊ុនជាច្រើន បន្តវិនិយោគលើដែនកោះ៕