.jpg)
លោក យួង សូដា ត្រូវតុលាការកំពូលជំនុំជម្រះ នៅថ្ងៃទី ១៤ កុម្ភៈ។ រូបថត ហ្វេសប៊ុក
ប៉ៃលិនៈ តុលាការកំពូលនៅថ្ងៃទី ១៤ កុម្ភៈបានបើកសវនាការ ជម្រះក្ដីគ្រូបង្រៀនម្នាក់ពាក់ព័ន្ធនឹងការសរសេរសារបង្ហោះតាមបណ្តាញសង្គមហ្វេសប៊ុកកាលពីឆ្នាំ ២០២០ ដោយបានធ្វើការរិះគន់ការសង់ស្តូបមិត្តភាពកម្ពុជា-វៀតណាម នៅខេត្តប៉ៃលិន ដែលសំណុំរឿងនេះត្រូវបានតុលាការថ្នាក់ក្រោមផ្តន្ទាទោសដាក់ពន្ធនាគារ ១ ឆ្នាំ។
នៅក្នុងបន្ទប់សវនាការនៃតុលាការកំពូលនៅថ្ងៃទី ១៤ កុម្ភៈ លោកចៅក្រម ឃឹម ប៉ុណ្ណ ប្រធានក្រុមប្រឹក្សាជំនុំជម្រះក្នុងចំណោមសមាសភាព លោកចៅក្រម ៥ រូប និងមានលោក អ៊ុក គឹមសិទ្ធិ ជាតំណាងមហាអយ្យការនោះបានអានអង្គហេតុថា ជនជាប់ចោទឈ្មោះ យួង សូដា ភេទ ប្រុស អាយុ ២៣ ឆ្នាំជាគ្រូបង្រៀននៅ ក្រុងខេត្ត ប៉ៃលិន បានសរសេរសារបង្ហោះតាមបណ្តាញសង្គមហ្វេសប៊ុក រិះគន់ការសាងសង់ស្តូបកម្ពុជា-វៀតណាមនៅខេត្តប៉ៃលិន ប្រព្រឹត្តកាលពីថ្ងៃទី ៦ កញ្ញា ឆ្នាំ ២០២០។
លោកចៅក្រមបន្តថា សំណុំរឿងនេះត្រូវបានសាលាដំបូងខេត្តប៉ៃលិនបើកសវនាការ ជំនុំជម្រះកំបាំងមុខជនជាប់ចោទកាលពីថ្ងៃទី ២៩ ខែមីនា ឆ្នាំ ២០២១ និងប្រកាសសាលក្រមនៅថ្ងៃទី ៧ ខែមេសា ឆ្នាំ ២០២១ ផ្តន្ទាទោសដាក់ពន្ធនាគារ ១ ឆ្នាំ ចោទពីបទញុះញង់ឱ្យប្រព្រឹត្តបទឧក្រិដ្ឋជាអាទិ៍តាមមាត្រា ៤៩៥ នៃក្រមព្រហ្មទណ្ឌ។ ដោយមិនសុខចិត្តនឹងសាលក្រមនេះ ជនជាប់ចោទបានប្តឹងមកសាលាឧទ្ធរណ៍ខេត្តបាត់ដំបង ហើយត្រូវសាលាឧទ្ធរណ៍ខេត្តបាត់ដំបងបើកសវនាការជំនុំជម្រះកាលពីថ្ងៃទី ១០ កញ្ញា ឆ្នាំ ២០២១ និងប្រកាសសាលដីកានៅថ្ងៃទី ២៨ កញ្ញា ឆ្នាំ ២០២១ សម្រេចតម្កល់ទោស ១ ឆ្នាំ តាមសាលក្រមរបស់សាលាដំបូងខេត្តប៉ៃលិនទុកជាបានការដដែល។
លោក ឈឹម ច័ន្ទសត្យានន្ទ ជាមេធាវី ការពារសិទ្ធិឱ្យជនជាប់ចោទឈ្មោះ យួង សូដា បានធ្វើសេចក្តីសន្និដ្ឋាននៅក្នុងបន្ទប់សវនាការនៃតុលាការកំពូលនៅថ្ងៃទី ១៤ កុម្ភៈថា កូនក្តីរបស់លោក មិនត្រូវបានគេចខ្លួនហើយក៏ត្រូវបានសាលាដំបូងខេត្តប៉ៃលិនផ្តន្ទាទោសដាក់ពន្ធនាគារ ១ ឆ្នាំ។ ចំពោះការចោទប្រកាន់លើកូនក្តីរបស់លោកក្នុងបទញុះញង់ឱ្យប្រព្រឹត្តបទឧក្រិដ្ឋជាអាទិ៍នេះ គឺមិនស្របតាមច្បាប់រដ្ឋធម្មនុញ្ញត្រង់មាត្រា ៤១ ទេ។
លោកបានថ្លែងថា៖ «ធម្មតាគាត់ជាគ្រូបង្រៀនមានចំណេះដឹងហើយការសរសេររបស់គាត់ក្នុងនាមប្រជាពលរដ្ឋសម្តែងមតិប៉ុណ្ណោះ។ តាំងពីគាត់បង្ហោះសារមកដល់ពេលនេះ មិនឃើញមានបញ្ហាអ្វីកើតឡើងផង ហើយការធ្វើកំណត់ហេតុរបស់នគរបាលយុត្តិធម៌ខេត្តប៉ៃលិនថា ជាការញុះញង់នោះគឺជាការបំភ្លៃអង្គហេតុ»។
បើតាមលោកមេធាវី ច័ន្ទសត្យានន្ទ កូនក្តីរបស់លោកគ្មានចេតនាញុះញង់អ្វីទេ ហើយលោកស្នើសុំក្រុមប្រឹក្សាជំនុំជម្រះតុលាការកំពូល មេត្តាច្រានចោលសាលដីការបស់សាលាឧទ្ធរណ៍បាត់ដំបងទុកជាឥតបានការ និងបង្វិលសំណុំរឿងទៅសាលាឧទ្ធរណ៍ខេត្តបាត់ដំបងជម្រះឡើងវិញ។
លោក អ៊ុក គឹមសិទ្ធិ តំណាងមហាអយ្យការនៃតុលាការកំពូលបានសន្និដ្ឋាន ដោយលើកឡើងថា សាររបស់ជនជាប់ចោទដែលបានបង្ហោះនៅលើហ្វេសប៊ុកនោះបានសរសេរថា អ្នកប៉ៃលិន ទំនេរៗជិះកាត់ស្ពានតារាបហើយងាកទៅទិសខាងលិចផង។ លោកអានសាររបស់ជនជាប់ចោទបន្តទៀតថា «ឥឡូវយើងមានស្តូប (មិត្តភាពកម្ពុជា-វៀតណាម) សឹងគ្រប់ខេត្តហើយ អ៊ីចឹងសង្ឃឹមថា ថ្ងៃខាងមុខ យើងនឹងមានទង់ជាតិ ២ បង្ហូតក្នុងពេលតែ ១ ដូចឡាវ។ ដូច្នេះនេះជាការបង្ហាញពីបទល្មើសហើយ ហើយខ្ញុំស្នើសូមក្រុមប្រឹក្សាជំនុំជម្រះតម្កល់សាលដីការបស់សាលាឧទ្ធរណ៍បាត់ដំបងទុកជាបានការដដែល»។
ក្រោយពីបានចំណាយពេលធ្វើការជំនុំជម្រះរយៈពេលជិត ១ ម៉ោងមក លោកចៅក្រម ឃឹម ប៉ុណ្ណ ប្រធានក្រុមប្រឹក្សាជំនុំជម្រះបានថ្លែងថា សាលដីកានៃសំណុំរឿងនេះនឹងប្រកាសនៅថ្ងៃទី ២១ កុម្ភៈ៕
វីដេអូ៖
