ភ្នំពេញៈ កម្ពុជាកំពុងសិក្សាពីគម្រោងសាងសង់ប្រព័ន្ធខ្សែកាបអុបទិក ក្រោមបាតសមុទ្រ ហុងកុង-ព្រះសីហនុ ដែលមានប្រវែងជាង ៣០០ គីឡូម៉ែត្រ ដើម្បីជួយពង្រឹងវិស័យទូរគមនាគមន៍របស់កម្ពុជា និងប្រព័ន្ធអ៊ីនធឺណិតឱ្យកាន់តែប្រសើរឡើងមួយកម្រិតថែមទៀត។
ក្រសួងបរិស្ថានកាលពីថ្ងៃទី ១០ ខែកុម្ភៈ ឆ្នាំ ២០២២ បានដឹកនាំកិច្ចប្រជុំអន្តរក្រសួង ដើម្បីពិនិត្យ និងផ្តល់យោបល់លើរបាយការណ៍វាយតម្លៃលើផលប៉ះពាល់បរិស្ថាន និងសង្គមពេញលេញ (ESIA) សម្រាប់គម្រោងសាងសង់ប្រព័ន្ធខ្សែកាបអុបទិក ក្រោមបាតសមុទ្រ ហុងកុង-ព្រះសីហនុ និងហេដ្ឋារចនាសម្ព័ន្ធពាក់ព័ន្ធ ដែលឆ្លងកាត់តាមដែនសមុទ្រ-កម្ពុជាមានប្រវែង ៣២៣,៥ គីឡូម៉ែត្រ រួមទាំងស្ថានីយខ្សែកាបអុបទិក ស្ថិតក្នុងភូមិសាស្ត្រ ភូមិគគីរ ឃុំបិតត្រាំង ស្រុកព្រៃនប់ ខេត្តព្រះសីហនុរបស់ក្រសួងប្រៃសណីយ៍ និងទូរគមនាគមន៍។
ក្នុងកិច្ចប្រជុំនោះ ក្រសួងបរិស្ថានបានស្នើដល់ក្រុមហ៊ុន ដែលទទួលបន្ទុកក្នុងការសាងសង់នេះ ត្រូវធ្វើយ៉ាងណាកុំឱ្យប៉ះពាល់ដល់បរិស្ថានធ្ងន់ធ្ងរ និងជីវចម្រុះក្នុងបាតសមុទ្រ។ ក្រសួងក៏បានស្នើក្រុមហ៊ុនត្រូវធ្វើការកាត់បន្ថយការសាយភាយកករល្អក់ នៅពេលជីកកប់ខ្សែកាបអុបទិកនេះ ចៀសវាងប៉ះពាល់ជីវចម្រុះសមុទ្រ និងត្រូវមានផែនការគ្រប់គ្រងសំណល់រឹង និងសំណល់រាវឱ្យបានត្រឹមត្រូវតាមលក្ខណៈបច្ចេកទេស។
ក្រសួងបញ្ជាក់ថា ក្រុមហ៊ុនត្រូវសិក្សាឱ្យបានច្បាស់លាស់ទាក់ទងនឹងផ្កាថ្មនៅតំបន់គម្រោងក្នុងករណីពេលជីកកប់ខ្សែកាបអុបទិកប៉ះពាល់ដល់ផ្កាថ្ម ក្រុមហ៊ុនត្រូវផ្អាកសកម្មភាពសាងសង់ ហើយធ្វើការបញ្ចៀស ដើម្បីកាត់បន្ថយការប៉ះពាល់ផ្កាថ្មទាំងអស់នេះ។ ក្រសួងបរិស្ថានក៏បានស្នើឱ្យក្រុមហ៊ុនម្ចាស់គម្រោងសហការជាមួយក្រុមហ៊ុនទីប្រឹក្សាបញ្ចូលនូវមតិយោបល់វិជ្ជមានរបស់អង្គប្រជុំទៅក្នុងរបាយការណ៍ ESIA ឱ្យបានត្រឹមត្រូវ។
អនុរដ្ឋលេខាធិការក្រសួងប្រៃសណីយ៍ និងទូរគមនាគមន៍ លោក លីវ សុផាណារិទ្ធ ប្រាប់ភ្នំពេញប៉ុស្តិ៍ កាលពីថ្ងៃទី ១៣ ខែកុម្ភៈ ថា គម្រោងនេះស្ថិតក្នុងដំណាក់កាលសិក្សានៅឡើយ ដោយកំពុងប្រមូលធាតុចូលពីភាគីពាក់ព័ន្ធដើម្បីបម្រើឱ្យការសាងសង់ប្រព្រឹត្តទៅដោយរលូន។
លោកបានបញ្ជាក់ទៀតថា៖ «គម្រោងនេះ នឹងផ្តល់ផលប្រយោជន៍ច្រើនសម្រាប់ប្រទេសជាតិយើង ក្នុងវិស័យទូរគមនាគមន៍ ធ្វើឱ្យបណ្តាញទូលំទូលាយជាងមុន ជួយដល់សេដ្ឋកិច្ច និងទាក់ទាញអ្នកវិយោគបរទេសផងដែរ»។
ក្រសួងបរិស្ថានឱ្យដឹងថា គម្រោងនេះ សាងសង់ដោយក្រុមហ៊ុន CRCC Harbour & Channel Engineering Bureau Group Co., Ltd. ព្រមទាំងសិក្សា និងរៀបចំរបាយការណ៍វាយតម្លៃហេតុប៉ះពាល់បរិស្ថាន និងសង្គមពេញលេញ (ESIA) ដោយក្រុមហ៊ុនទីប្រឹក្សា Creative Green Research Co., Ltd.។
សូមជម្រាបថា បច្ចុប្បន្នកម្ពុជាមានក្រុមហ៊ុនចំនួន ២ កំពុងដំណើរការគម្រោងខ្សែកាបអុបទិកបាតសមុទ្រ។ ក្រុមហ៊ុនទី ១ ភ្ជាប់តាមប្រព័ន្ធ MCT (ម៉ាឡេស៊ី-កម្ពុជា-ថៃ) មានប្រវែង ១ ៣០០ គីឡូម៉ែត្រ។ រីឯ ប្រវែងនៅប្រទេសកម្ពុជាមាន ៤៧០ គីឡូម៉ែត្រ ដែលភ្ជាប់ពីម៉ាឡេស៊ីមកក្រុងព្រះសីហនុ និងបានដាក់ឱ្យដំណើរការនៅ ២០១៧។ ក្រុមហ៊ុនទី ២ ភ្ជាប់តាមប្រព័ន្ធ AAE-1 (អាស៊ី-អាហ្វ្រិក-អឺរ៉ុប ទី ១) មានប្រវែងសរុប ២៥ ០០០ គីឡូម៉ែត្រដែលដាក់ឱ្យដំណើរការនៅឆ្នាំ ២០១៧ ដូចគ្នា៕
វីដេអូ៖