ភ្នំពេញៈ សមត្ថកិច្ចខេត្តស្វាយរៀងបានឃាត់ខ្លួនគ្រូពេទ្យឯកជនម្នាក់ និងបានបញ្ចូនទៅតុលាការ ដើម្បីចាត់ការបន្តតាមនីតិវិធី បន្ទាប់ពីគ្រូពេទ្យរូបនេះបានចាក់ថ្នាំបណ្តាលឱ្យក្មេងប្រុសម្នាក់ប្រកាច់បែកពពុះមាត់ស្លាប់ភ្លាមៗ។
ហេតុការណ៍នេះបានកើតឡើងកាលពីថ្ងៃទី ១២ ខែកុម្ភៈ ឆ្នាំ ២០២២ ស្ថិតនៅភូមិកណ្ដាល ឃុំស្វាយចេក ស្រុករំដួល។ បុរសជាគ្រូពេទ្យរូបនេះមានឈ្មោះ វ៉ាត់ ចន្ថន អាយុ ៣៦ ឆ្នាំមុខរបរគ្រូពេទ្យរស់នៅក្នុងភូមិឃុំកើតហេតុ។ ចំណែកក្មេងប្រុសរងគ្រោះមានឈ្មោះ ជៀក ណាដេត អាយុ ៧ ឆ្នាំជាសិស្សរស់នៅ ភូមិថ្មី ឃុំស្វាយចេក ស្រុករំដួល ហើយត្រូវបានក្រុមគ្រួសារយកទៅធ្វើបុណ្យតាមប្រពៃណីក្រោយកើតហេតុភ្លាម។
លោក សូរ អាត អធិការរងទទួលបន្ទុកផែនយុត្តិធម៌ ស្រុករំដួលបានប្រាប់ភ្នំពេញប៉ុស្តិ៍នៅថ្ងៃទី ១៤ កុម្ភៈថា ក្រោយសមត្ថកិច្ចចុះទៅដល់កន្លែងកើតហេតុ និងបានធ្វើកោសល្យវិច័យក៏ឈានទៅធ្វើការឃាត់ខ្លួនជនសង្ស័យជាគ្រូពេទ្យខាងលើ។ កាលពីថ្ងៃទី ១៣ កុម្ភៈ អធិការដ្ឋានស្រុកបានបញ្ចូនគ្រូពេទ្យរូបនេះ ទៅតុលាការហើយពាក់ព័ន្ធនឹងបទល្មើសមនុស្សឃាតដោយអចេតនាដែលលោកអះអាងថា ចំណាត់ការបន្តគឺអាស្រ័យលើការសម្រេចរបស់តុលាការ។
លោកបញ្ជាក់ថា៖ «ខាងយើងបានធ្វើការស្រាវជ្រាវស៊ើបអង្កេតរហូតដល់មានការឃាត់ខ្លួនដោយសុំគោលការណ៍ពីព្រះរាជអាជ្ញា។ ចំពោះសំណុំរឿងនេះ គឺខ្ញុំបានបញ្ចូនទៅតុលាការហើយតាមរយៈស្នងការដ្ឋាននគរបាលខេត្ត ហើយមានចំណាត់ការបន្តយ៉ាងណាទៀតនោះ គឺអាស្រ័យលើតុលាការជាអ្នកសម្រេច»។
ជាមួយនឹងការឃាត់នេះលោក សូរ អាត បានឱ្យដឹងថា តាមការសាកសួរពីសាច់ញាតិជនរងគ្រោះនៅពេលមានរឿងកើតឡើងជនសង្ស័យឈ្មោះ វ៉ាត់ ចន្ថន បានពិនិត្យ និងចាក់ថ្នាំឱ្យកុមារាឈ្មោះ ជៀក ណាដេត បន្ទាប់ពីគ្រួសារបាននាំក្មេងរងគ្រោះទៅពិនិត្យព្យាបាល។ នៅពេលដែលជនសង្ស័យរូបនោះបានដកម្ជុលចាក់រួចស្រាប់តែក្មេងរងគ្រោះមានសភាពប្រកាច់ខាំអណ្ដាតបែកពពុះមាត់ បណ្ដាលឱ្យស្លាប់ភ្លាមៗ ហើយបង្កការភ្ញាក់ផ្អើលដល់ក្រុមគ្រួសារតែម្ដង។
លោក កែវ រដ្ឋា ប្រធានមន្ទីរសុខាភិបាលខេត្តស្វាយរៀងប្រាប់ភ្នំពេញ-ប៉ុស្តិ៍នៅថ្ងៃទី ១៤ កុម្ភៈដោយបានទទួលស្គាល់ថា ពិតជាមានករណីបែបនេះកើតឡើងប្រាកដមែន ហើយមន្ទីរសុខាភិបាលខេត្តក៏បានចាត់ឱ្យមន្ត្រីចុះទៅធ្វើកោសល្យវិច័យ ដើម្បីបញ្ជាក់ពីករណីស្លាប់របស់កុមាររងគ្រោះផងដែរ។
បន្ថែមពីនេះលោកបានបញ្ជាក់ថា៖ «គ្រូពេទ្យដែលបានចាក់ថ្នាំបណ្តាលឱ្យក្មេងស្លាប់នេះគឺគាត់មានការទទួលស្គាល់ និងមានសញ្ញាបត្រត្រឹមត្រូវ។ ដូច្នេះយើងបានចាត់ឱ្យក្រុមគ្រូពេទ្យ និងគណៈពេទ្យខេត្តចុះទៅធ្វើការស្រាវជ្រាវហើយករណីនេះ។ តែយើងមិនអាចសន្និដ្ឋានបានទេថា ករណីនេះមកពីកំហុសគ្រូពេទ្យនោះឬយ៉ាងណា យើងរង់ចាំការធ្វើការបន្តសិន»៕