ពោធិ៍សាត់/កោះកុងៈ ក្រុមអង្គការប្រឆាំងអំពើពុករលួយ ទប់ស្កាត់ការបំផ្លាញធនធានធម្មជាតិ និងការពារសិទ្ធិពលរដ្ឋ (ACNCIPO) បានអះអាងថា នាពេលបច្ចុប្បន្នបទល្មើសព្រៃឈើកំពុងកើតមានយ៉ាងពេញបន្ទុកនៅក្នុងតំបន់ដែនជម្រកសត្វព្រៃជួរភ្នំក្រវាញ។ មន្ត្រីបរិស្ថានថា ខ្លួនបាននិងកំពុងបន្តសហការជាមួយអង្គការដៃគូក្នុងការចុះបង្ក្រាប ដោយបានចាប់ខ្លួនជនសង្ស័យ ២ នាក់បញ្ជូនទៅតុលាការផងដែរ។
លោក ជា ហ៊ានប្រធានអង្គការ ACNCIPO បានប្រាប់ភ្នំពេញ-ប៉ុស្តិ៍នៅថ្ងៃទី ១៣ កុម្ភៈថា ក្នុងរយៈពេល ៣ ថ្ងៃកន្លងមកនេះ លោក និងក្រុមការងារបានចុះល្បាតស្រាវជ្រាវបទល្មើសធនធានធម្មជាតិក្នុងតំបន់ដែនជម្រកសត្វព្រៃជួរភ្នំក្រវាញ ហើយបានប្រទះឃើញមានករណីដឹកជញ្ជូនឈើចល័តតាមគោយន្តជាច្រើនគ្រឿងចេញពីក្នុងព្រៃនៃភូមិសាស្ត្រស្រុកភ្នំក្រវាញ ខេត្តពោធិ៍សាត់ និងស្រុកថ្មបាំងខេត្តកោះកុងក្នុងទិសដៅនាំយកទៅលក់បន្តទៅឱ្យឈ្មួញឈើក្នុងស្រុកឱរ៉ាល់ ខេត្តកំពង់ស្ពឺ។
លោកបញ្ជាក់ថា៖ «បើតាមចម្លើយរបស់ក្រុមអ្នកដឹកឈើដែលក្រុមការងារយើងខ្ញុំទទួលបានឈើទាំងនោះជាប្រភេទឈើរាជផ្កុល ដែលពួកគេបានកាប់ និងដឹកចេញពីក្នុងព្រៃនៃតំបន់ជួរភ្នំក្រវាញកណ្ដាល។ ពួកគេបានចំណាយលុយទៅឱ្យក្រុមមន្ត្រីបរិស្ថាន រដ្ឋបាលព្រៃឈើ កម្លាំងប្រដាប់អាវុធទាំង ៣ ប្រភេទ រួមទាំងអ្នកសារព័ត៌មានមួយចំនួនផងដែរសរុបពី ២០ ម៉ឺនទៅ ២៥ ម៉ឺនរៀលក្នុង ១ គោយន្ត ដែលមានបរិមាណឈើជិត ១ គុប»។
លោក ជា ហ៊ាន ដែលពេលនេះ កំពុងបន្តចុះស្រាវជ្រាវ និងស៊ើបអង្កេតលើករណីនេះជាមួយក្រុមការងាររបស់លោកនៅក្នុងស្រុកថ្មបាំង ខេត្តកោះកុងបានថ្លែងថា៖ «ទោះយ៉ាងណាវាគ្រាន់តែជាការអះអាងរបស់ក្រុមអ្នកដឹកជញ្ជូនឈើខុសច្បាប់ប៉ុណ្ណោះ។ នៅពេលនេះក្រុមការងារយើងខ្ញុំកំពុងបន្តការស្រាវជ្រាវលើករណីនេះបន្ថែមទៀត ដើម្បីធ្វើរបាយការណ៍ជម្រាបជូនទៅក្រសួងបរិស្ថាន និងភាគីពាក់ព័ន្ធមួយចំនួនទៀត ពិនិត្យ និងចាត់វិធានការបន្តតាមនីតិវិធីច្បាប់»។
បើតាមលោក ជា ហ៊ាន ចាប់ពីថ្ងៃទី ៩ ដល់ថ្ងៃទី ១២ ខែកុម្ភៈ ២០២២ ក្រុមការងាររបស់លោកបានប្រទះឃើញបទល្មើសដឹកជញ្ជូនឈើចល័តចេញពីក្នុងព្រៃនៃតំបន់ជួរភ្នំក្រវាញកណ្ដាលនោះចំនួន ៣ ទីតាំង រួមមាន នៅចំណុចក្បែរស្នាក់ការរងបឹងថ្លុង អំពិល និងថ្នងស្រល់ ដែលក្នុង ១ ទីតាំងមាន ៨ គោយន្ត និងក្នុង ១ គោយន្តមានឈើប្រមាណជិត ១ ម៉ែត្រគុប។
ជុំវិញករណីនេះ លោក គង់ ពុទ្ធីរ៉ា ប្រធានមន្ទីរបរិស្ថានខេត្តពោធិ៍សាត់ប្រាប់ភ្នំពេញប៉ុស្តិ៍នៅថ្ងៃទី ១៣ កុម្ភៈថាថ្មីៗនេះ ក្រុមមន្ត្រីបរិស្ថានបានសហការជាមួយក្រុមអង្គការជាដៃគូ និង សមត្ថកិច្ចពាក់ព័ន្ធមួយចំនួនចុះល្បាតក្នុងទីតាំងនៃតំបន់ខាងលើ ហើយបានប្រទះឃើញមានបទល្មើសទាំងនោះមែន ប៉ុន្តែមិនមានច្រើនគោយន្តនោះទេ គឺ ២-៣ គោយន្តក្នុង ១ កន្លែងតែប៉ុណ្ណោះ។ លោកបញ្ជាក់ថា៖ «ខ្ញុំមិនបដិសេធទេ ប៉ុន្តែបទល្មើសត្រូវក្រុមមន្ត្រីបរិស្ថានយើង រួមទាំងកម្លាំងអន្តរាគមន៍មកពីស្ថាប័នពាក់ព័ន្ធនានា ដែលក្នុងនោះមានទាំងអង្គការសម្ព័ន្ធមិត្តសត្វព្រៃ ដែលជាដៃគូផងដែរបានប្រឹងប្រែងចុះល្បាត ស្រាវជ្រាវ និងបង្ក្រាបបានជាបន្តបន្ទាប់។ ជាក់ស្ដែងកាលពី ៣ ថ្ងៃមុននេះ ក្រុមមន្ត្រីយើងនៅស្នាក់ការយោក បានចាប់ឃាត់គោយន្តចំនួន ២ គ្រឿង រួមទាំងជនសង្ស័យ ២ នាក់ បញ្ជូនទៅតុលាការផងដែរ»។
លោក ពុទ្ធីរ៉ា ប្រាប់ទៀតថា នៅពេលឃាត់ខ្លួនបានក្រុមជនប្រព្រឹត្តបទល្មើសតែងតែនិយាយដោះសាថា ពួកគេប្រថុយចូលមកកាប់ឈើក្នុងតំបន់ការពារ និង អភិរក្សនេះគឺធ្វើដោយបង្ខំចិត្តប៉ុណ្ណោះដ្បិតជំពាក់ប្រាក់ធនាគារ ហើយក្នុងអំឡុងពេលនៃការឆ្លងរាលដាលជំងឺកូវីដ ១៩ ពួកគេរកការងារផ្សេងទៀតធ្វើពុំបាន។
លោកថ្លែងថា៖ «យើងយល់ថា ពួកគាត់មានបញ្ហាប្រឈមក្នុងជីវភាព ប៉ុន្តែយើងជាមន្ត្រីអនុវត្តច្បាប់ បើឃើញពួកគាត់ប្រព្រឹត្តខុសហើយ គឺត្រូវតែចាប់ឃាត់ខ្លួនមកអប់រំ ផាកពិន័យ ឬបញ្ជូនទៅឱ្យតុលាការផ្ដន្ទាទោសទៅតាមនីតិវិធីច្បាប់»។ ជាមួយគ្នានេះ លោកបានអំពាវនាវដោយជំរុញឱ្យមន្ត្រីឧទ្យានុរក្សទាំងអស់ ដែលចំណុះឱ្យមន្ទីរបរិស្ថានខេត្តពោធិ៍សាត់ បង្កើនកិច្ចសហការជាមួយស្ថាប័នពាក់ព័ន្ធនានា ព្រមទាំងអង្គការជាដៃគូចុះល្បាតស្រាវជ្រាវ បង្ក្រាបបទល្មើសធនធានធម្មជាតិឱ្យបានជាប់ជាប្រចាំ ដើម្បីទប់ស្កាត់នូវរាល់បទល្មើសនានាក្នុងតំបន់ដែនជម្រកសត្វព្រៃនៅក្នុងខេត្តនេះ៕
វីដេអូ៖