ព្រះសីហនុៈ បុរសម្នាក់បានស្លាប់ និងម្នាក់ទៀតរងរបួសធ្ងន់ ក្នុងគ្រោះថ្នាក់ចរាចរណ៍កាលពីថ្ងៃទី ១៤ កុម្ភៈ រវាងរថយន្តធុនធំ៣គ្រឿងបុកបន្តគ្នា ស្ថិតក្នុងភូមិ បឹងត្រាច ឃុំចំការហ្លួង ស្រុកកំពង់សីលា ខេត្តព្រះសីហនុ ខណៈគ្រោះថ្នាក់ចរាចរណ៍នៅទូទាំងប្រទេស កើតឡើងនៅថ្ងៃទី ១៤ កុម្ភៈ បានបណ្តាលឱ្យមនុស្សស្លាប់៦ នាក់ និងរងរបួសធ្ងន់ចំនួន ១៤នាក់(ស្រី៧នាក់)។ នេះបើតាម អគ្គស្នងការដ្ឋាននគរបាលជាតិ
លោក ញ៉ែម រស្មី អធិការរង ទទួលផែនការងារនគរបាលចរាចរណ៍ នៃអធិការដ្ឋាន នគរបាលស្រុកកំពង់សិលា ប្រាប់នៅថ្ងៃទី១៥ កុម្ភៈថា គ្រោះថ្នាក់ចរាចរណ៍នេះ បានធ្វើឱ្យបុរសជាអ្នកបើកបរម្នាក់ឈ្មោះ មិន សុភា ភេទប្រុស អាយុ២៩ឆ្នាំរស់នៅភូមិថ្មដា សង្កាត់កន្ទោក ខណ្ឌកំបូល រាជធានីភ្នំពេញស្លាប់ នៅកន្លែងកើតហេតុ។
រីឯឈ្មោះ ចាន់ សៀងហេង ភេទប្រុស អាយុ២៧ឆ្នាំ មុខរបរព្រូឡាន មានទីលំនៅភូមិចាំស្រី ឃុំកំពង់សីលា ស្រុកកំពង់សីលា ខេត្តព្រះសីហនុបានរងរបួសធ្ងន់។
លោកថ្លែងថា៖«ក្នុងគ្រោះថ្នាក់ចរាចរណ៍នេះ សុទ្ធតែរថយន្តធុនធំ ហើយពេលភ្លាមៗនោះ មានកម្លាំងសមត្ថកិច្ចយើង និងកងរាជអាវុធហត្ថអន្តរាគមន៍សម្រួលចរាចរណ៍»។
បើតាមលោក រស្មី គ្រោះថ្នាក់ចរាចរណ៍នេះ កើតឡើងនៅព្រលប់ថ្ងៃទី១៤ ខែកុម្ភៈឆ្នាំ២០២២ នៅចន្លោះគីឡូម៉ែត្រលេខ ១៣៦-១៣៧ ភូមិបឹងត្រាច ឃុំចំការហ្លួង ស្រុកកំពង់សីលា ខេត្តព្រះសីហនុ រវាងរថយន្តម៉ាក INTERNATIONAL ពណ៌ស ពាក់ផ្លាកលេខភ្នំពេញ 3C 8353 បើកទិសដៅពីភ្នំពេញទៅខេត្តព្រះសីហនុជារថយន្តដឹកប្រេង។
រីឯរថយន្ត១គ្រឿងទៀតម៉ាក FUSO សណ្តោងរ៉ឺម៉ក ពណ៌បៃតង ពាក់ផ្លាកលេខភ្នំពេញ 3F 9367 ជារថយន្តដឹកទំនិញ។
បើយោងតាមអគ្គស្នងការដ្ឋាននគរបាលជាតិ គ្រោះថ្នាក់ចរាចរណ៍ផ្លូវគោកនៅទូទាំងប្រទេសនៅថ្ងៃទី១៤ ខែកុម្ភៈ ឆ្នាំ២០២២ បណ្តាលឱ្យមនុស្សស្លាប់៦នាក់ របួសធ្ងន់ចំនួន ១៤នាក់(ស្រី៧នាក់) និងរបួសស្រាល ៣នាក់(ស្រី២នាក់) ។
លោក គឹម បញ្ញា នាយកអង្គការមូលនិធិបង្ការបួសអាស៊ី ថ្លែងនៅថ្ងៃទី១៥កុម្ភៈថា បញ្ហានេះលោកមើលឃើញថានៅពេលដែលប្រទេសវិលមករកប្រក្រតីឡើងវិញ(ធូរស្រាលពីជំងឺកូវីដ)គឺមានអ្នកដំណើរច្រើននៅលើដងផ្លូវទើបធ្វើឱ្យករណីគ្រោះថ្នាក់ចរាចរណ៍កើតមានឡើងជាញឹកញាប់។
លោកថ្លែងថា៖«បើនិយាយពីមូលហេតុគ្រោះថ្នាក់ គឺមានកត្តា៤ចំបង គឺកត្តាមនុស្ស បើកបរលើសល្បឿនកំណត់ ការបើកបរជែងក្នុងស្ថានភាពគ្រោះថ្នាក់ ការពិសារគ្រឿងស្រវឹងហើយបើកបរ ពិសេសអ្នកដែលមិនគោរពសិទ្ធិអាទិភាព និងអ្នកដែលចេញពីផ្លូវលំតូចៗ ចូលមកលើផ្លូវជាតិដោយពុំមានការប្រុងប្រយ័ត្ន»៕