ស្ទឹងត្រែងៈ សត្វផ្សោតដែលនៅសល់តែ ១ គត់នៅអន្លង់ឈើទាល ខេត្តស្ទឹងត្រែងត្រូវបានប្រទះឃើញអណ្តែតស្លាប់កាលពីថ្ងៃទី ១៥ កុម្ភៈ ដែលមន្ត្រីជំនាញសន្និដ្ឋានបឋមថា ការស្លាប់សត្វផ្សោតនេះអាចបណ្តាលមកពីស្នាមរបួសនៅផ្នែកកន្ទុយរបស់វា ដោយសារកំណាត់សរសៃមងរុំជាប់។
អស់រយៈពេលជាង ១ ខែហើយ ដែលសត្វផ្សោតឯកា ១ ក្បាលនេះបានធ្លាក់ខ្លួនឈឺស្គមរីងរៃ ដោយសារតែរបួសបង្កជាដំបៅ ព្រោះតែកន្ទុយរបស់វាត្រូវបានរុំជាប់ដោយកំណាត់សរសៃមង។ បន្ទាប់ពីមានករណីប្រទះឃើញសត្វផ្សោត ១ ក្បាលចុងក្រោយនៅតំបន់អន្លង់ឈើទាលបានរងរបួស ដោយមានកំណាត់មងរុំជាប់កន្ទុយនោះ ក្រុមជំនាញការថ្នាក់ជាតិនៃរដ្ឋបាលជលផល ព្រមទាំងអង្គការ WWF-Cambodia ដែលជាដៃគូបានរួមគ្នារកមធ្យោបាយជួយដល់សត្វផ្សោតនោះដើម្បីកាត់កំណាត់មងដែលជាប់កន្ទុយផ្សោតនោះដែរ។
ប៉ុន្តែដោយសារគ្មានឧបករណ៍ និងបច្ចេកទេសគ្រប់គ្រាន់ក្នុងការដងចាប់វា ដូច្នេះមន្ត្រីពាក់ព័ន្ធបានត្រឹមតាមឃ្លាំមើលសត្វផ្សោតនោះជារៀងរាល់ថ្ងៃ ដើម្បីការពារវាពីការយាយីពីក្រុមអ្នកនេសាទអនាធិបតេយ្យ។ នេះបើតាមអាជ្ញាធរខេត្តស្ទឹងត្រែង។
លោកស្រី សំ វិចិត្រ ប្រធានផ្នែកជលផលខេត្តស្ទឹងត្រែងប្រាប់ ភ្នំពេញប៉ុស្តិ៍នៅថ្ងៃទី ១៥ កុម្ភៈ ថា សត្វផ្សោតនេះត្រូវបានប្រទះឃើញស្លាប់នៅក្បែរច្រាំងនៅជិតកន្លែងវារស់នៅ។ តាមការសន្និដ្ឋានជំហានដំបូងសត្វផ្សោតនេះអាចស្លាប់ដោយសារមិនអាចទ្រាំទ្រនឹងស្នាមរបួសដែលជាប់មងបាន ព្រោះចាប់ពីមានរបួសនោះមក វាធ្លាក់ខ្លួនឈឺជាបន្តបន្ទាប់។
លោកថា៖ «ឃើញស្លាប់នៅក្បែរ អន្លង់ផ្សោតហ្នឹងតែម្តង។ យើងសន្និដ្ឋានថា សត្វផ្សោតនេះអាចស្លាប់ដោយសារតែស្នាមរបួសដែលជាប់មងនេះ។ ជំនាញយើងកំពុងធ្វើការ ដូច្នេះយើងមិនទាន់សម្រេចនឹងនាំយកសត្វផ្សោតដែលបានស្លាប់នេះទៅណានោះទេ ចាំពិនិត្យឱ្យបានចប់សព្វគ្រប់សិន»។
ចំណែកលោក ម៉ែន គង់ អ្នកនាំពាក្យសាលាខេត្តស្ទឹងត្រែងប្រាប់ភ្នំពេញប៉ុស្តិ៍ដែរថា មន្ត្រីជំនាញកំពុងបន្តត្រួតពិនិត្យការស្លាប់របស់សត្វផ្សោតឯកានេះ។ ការបាត់បង់របស់សត្វផ្សោតដែលសល់តែ ១ គត់នៅតំបន់អន្លង់ឈើទាលនៃអន្តរព្រំប្រទល់ដែនទឹករវាងប្រទេសកម្ពុជា-ឡាវ នេះ គឺជារឿងដែលសោកស្តាយបំផុត។
លោកបញ្ជាក់ថា៖ «នេះជារឿងសោកស្តាយណាស់ ព្រោះអីយើង ខិតខំអភិរក្សវាយូរហើយ ដែលដឹងថាសត្វផ្សោតមានឧបនិស្ស័យខុសពីមច្ឆជាតិផ្សេងៗទៀត ដែលការបាត់បង់នេះ គឺការបាត់បង់នូវធនធានធម្មជាតិមួយនៅក្នុងតំបន់អភិរក្សរបស់យើង»។
ការបាត់បង់សត្វផ្សោតចុងក្រោយនេះ លោក ម៉ែន គង់ និយាយថា រដ្ឋបាលខេត្តមិនទាន់ច្បាស់នៅឡើយទេចំពោះការស្វែងរកប្រភេទសត្វផ្សោតដទៃទៀត ដើម្បីយកមកអភិរក្សក្នុងតំបន់នេះ។ ប៉ុន្តែលោកថា ក្នុងនាមរដ្ឋបាលខេត្តនឹងគាំទ្រចំពោះការសម្រេចរបស់អ្នកជំនាញ បើអាចសិក្សាបានថា អាចមានសត្វផ្សោត ប្រភេទផ្សេងដែលអាចរស់នៅក្នុងតំបន់អភិរក្ស អន្លង់ឈើទាលបានជំនួសសត្វផ្សោតដែលបាត់បង់ទាំងនេះ។
ការបាត់បង់ពូជផ្សោតក្នុងតំបន់អន្លង់ឈើទាល កើតឡើងតាំងពីឆ្នាំ ២០១៨ បន្ទាប់ពីមានការស្លាប់បាត់បង់ជាបន្តបន្ទាប់ ដោយសារករណីជាប់មងប្រជានេសាទ។ ការសិក្សាស្រាវជ្រាវក្នុងឆ្នាំ ២០១៨ រកឃើញសល់ ៣ ក្បាលប៉ុណ្ណោះ ហើយនៅឆ្នាំ ២០២១ នៅសល់តែ ១ ក្បាល ដែលត្រូវស្លាប់ជាលើកចុងក្រោយ។ នេះបើតាមតួលេខរបស់អាជ្ញាធរខេត្តស្ទឹងត្រែង៕
វីដេអូ៖