.jpg)
បុរសជាជនសង្ស័យក្នុងករណីចាប់រំលោភ។ រូបថត នគរបាល
កោះកុងៈ បុរសវ័យ ៤២ ឆ្នាំម្នាក់ត្រូវបានកម្លាំងនគរបាលប្រឆាំងការជួញដូរមនុស្ស និងការពារអនីតិជននៃអធិការដ្ឋាននគរបាលស្រុកកោះកុងចាប់ឃាត់ខ្លួនពាក់ព័ន្ធករណីចាប់រំលោភក្មួយស្រីរបស់ខ្លួនចំនួន ២ នាក់ ដែលមានអាយុក្រោម ១៥ ឆ្នាំ។ យោងតាមមន្ត្រីនគរបាលមូលដ្ឋាន។
លោក សៀ ហ៊ អធិការស្រុកកោះកុងបានប្រាប់ភ្នំពេញប៉ុស្តិ៍នៅថ្ងៃទី ១៤ ខែកុម្ភៈថា ជនសង្ស័យឈ្មោះ ស៊ិន ធឿនត្រូវបានប្អូនប្រុសបង្កើតរបស់គាត់ឈ្មោះ ស៊ិន ទឿន អាយុ ៣៦ ឆ្នាំ នាំខ្លួនប្រគល់ឱ្យសមត្ថកិច្ចចាត់វិធានការតាមផ្លូវច្បាប់ ក្រោយពីកុមារីរងគ្រោះ ២ នាក់ ដែលជាកូនបង្កើតរបស់ប្អូនប្រុសគាត់បានសម្រេចចិត្តប្រាប់ឪពុកម្ដាយពួកគេថាអ៊ំប្រុសជាជនសង្ស័យបានចាប់រំលោភពួកគេក្នុងម្នាក់ៗបានសម្រេចចំនួន ២ លើក។
លោកថា៖ «គាត់បានសារភាពថា គាត់ពិតជាបានរួមភេទជាមួយក្មួយស្រីទាំង ២ នោះ ពិតប្រាកដមែន។ ប៉ុន្តែមិនបានបង្ខំ ឬគំរាមកំហែងលើកុមារីទាំង ២ នោះទេ»។
លោក សៀក ហ៊ ថ្លែងថា៖ «ប៉ុន្តែកុមារីរងគ្រោះទាំង ២ បានអះអាងថា ក្រោយការចាប់រំលោភពួកគេរួច អ៊ំប្រុសតែងតែគំរាមពួកគេកុំឱ្យប្រាប់អ្នកណាឱ្យសោះ រួមទាំងឪពុកម្ដាយពួកនាង បើពុំនោះពេលគាត់ត្រូវសមត្ថកិច្ចចាប់ខ្លួន ហើយបានរួចខ្លួនមកវិញ គាត់នឹងសម្លាប់ពួកនាង និងឪពុកម្ដាយរួមទាំងប្អូនៗរបស់ពួកនាងទាំងអស់»។
លោកថា យោងតាមការអះអាងរបស់កុមារីរងគ្រោះទាំង ២ ជនសង្ស័យបានចាប់រំលោភពួកគេម្ដងម្នាក់តាំងពីខែកុម្ភៈ ឆ្នាំ ២០២០ មក ដល់ថ្ងៃទី ១៣ ខែកុម្ភៈ ឆ្នាំ ២០២២ នេះ មានចំនួនសរុប ៤ លើក ដោយកុមារីជាបង អាយុ ១៣ ឆ្នាំត្រូវបានជនសង្ស័យរំលោភបានសម្រេច ២ លើក និង កុមារីជាប្អូនអាយុ ១២ ឆ្នាំត្រូវបានជនសង្ស័យចាប់រំលោភបានសម្រេច ២ លើក។ បច្ចុប្បន្ន ជនសង្ស័យត្រូវបានកម្លាំងនគរបាលជំនាញប្រឆាំងការជួញដូរមនុស្ស និងការពារអនីតិជននៃអធិការដ្ឋាននគរបាលស្រុកកោះកុង កសាងសំណុំរឿងក្នុងបទល្មើស «រំលោភសេពសន្ថវៈលើកុមារីជាអនីតិជន ដោយមានការគំរាមកំហែងថានឹងសម្លាប់» និង បានបញ្ជូនទៅកាន់ការិយាល័យប្រឆាំងការជួញដូរមនុស្ស និងការពារអនីតិជននៃស្នងការដ្ឋាននគរបាលខេត្តកោះកុង ដើម្បីមានចំណាត់ការបន្តតាមនីតិវិធីច្បាប់។
លោក ស្រី ថុច នាយការិយាល័យ ប្រឆាំងជួញដូរមនុស្ស និងការពារអនីតិជននៃស្នងការដ្ឋាននគរបាលខេត្តកោះកុងបានប្រាប់ភ្នំពេញប៉ុស្តិ៍ថា បច្ចុប្បន្ន ជនសង្ស័យ និងសំណុំរឿងបទល្មើសដ៏អាស្រូវនេះត្រូវបានបញ្ជូនមកដល់ដៃរបស់លោកហើយ។ ជនសង្ស័យកំពុងត្រូវបានឃុំខ្លួនជាបណ្ដោះអាសន្ន ដើម្បីរង់ចាំបន្តនីតិវិធីស៊ើបសួរចម្លើយនៅថ្ងៃអង្គារនេះ ហើយនឹងត្រូវសមត្ថកិច្ចនគរបាលយុត្តិធម៌បញ្ជូនទៅកាន់តុលាការនៅល្ងាចថ្ងៃអង្គារ ទី ១៥ ខែកុម្ភៈ៕
