.jpg)
ជនជាប់ចោទ (ស្ដាំ) នៅសាលាឧទ្ធរណ៍កាលពីថ្ងៃទី ២៥ ខែ មករា ឆ្នាំ ២០២២។ រូបថត គឹម សារុំ
ភ្នំពេញៈ ចៅក្រមសាលាឧទ្ធរណ៍លើកឡើងថា នឹងយកសំណុំរឿងអតីតមន្ត្រីនគរបាល ខេត្តកំពង់ចាមម្នាក់ទៅបើកសវនាការជម្រះក្តីម្តងទៀត ដោយត្រូវកោះហៅសាក្សីមកបំភ្លឺបន្ថែមពាក់ព័ន្ធជនជាប់ចោទធ្វើឱ្យភ្លើងឆេះបន្ទប់ស្លាប់មនុស្សម្នាក់នៅក្រុងកំពង់ចាម កាលពីឆ្នាំ ២០១៤ បន្ទាប់ពីបើកសវនាការកាលពីថ្ងៃទី ២៥ មករា។
លោកចៅក្រម ស៊ិន វិសាល នៅថ្ងៃទី ១៥ កុម្ភៈបានថ្លែងនៅក្នុងបន្ទប់សវនាការថា សំណុំរឿងនេះមានជនជាប់ចោទឈ្មោះ ហេង ម៉ារ៉ែន ភេទប្រុស អាយុ ៥១ ឆ្នាំ ហើយសំណុំរឿងនេះត្រូវបានសាលាឧទ្ធរណ៍ភ្នំពេញបើកសវនាការជំនុំជម្រះកាលពីថ្ងៃទី ២៥ មករា។
លោកបន្តថា៖ «ប៉ុន្តែក្រោយពីបានពិភាក្សាគ្នាយ៉ាងលម្អិតមកក្រុមប្រឹក្សាជំនុំជម្រះបានឯកភាពគ្នាថា នឹងធ្វើការជំនុំជម្រះ ១ លើកទៀតលើសំណុំរឿងដដែលនេះដោយត្រូវការសាក្សីបន្ថែមទៀត»។
តាមអង្គហេតុកាលពីវេលាម៉ោងប្រហែល ៨ យប់ ថ្ងៃទី ៩ កុម្ភៈ ឆ្នាំ ២០១៤ ជនជាប់ចោទឈ្មោះ ហេង ម៉ារ៉ែន ជាអនុប្រធានការិយាល័យគណនេយ្យនៃស្នងការដ្ឋាននគរបាល ខេត្តកំពង់ចាម និងឈ្មោះ ធុច សាថាន ភេទប្រុស អាយុ ៤៩ ឆ្នាំ ជាមន្ត្រីធនាគារជាតិកម្ពុជា ខេត្តកំពង់ចាម បានបបួលគ្នាផឹកស៊ីនៅភោជនីយដ្ឋានមួយកន្លែងក្នុងភូមិសាស្ត្រសង្កាត់-ក្រុងកំពង់ចាមរហូតដល់ម៉ោងជាង ១១ យប់។
ក្រោយពីបញ្ចប់ការផឹកស៊ីនៅយប់ថ្ងៃដដែលនោះ ជនជាប់ចោទឈ្មោះ ហេង ម៉ារ៉ែន បានដឹកជនរងគ្រោះតាមម៉ូតូ ១ គ្រឿងយកទៅបន្ទប់ជួលរបស់ជនរងគ្រោះវិញស្ថិតក្នុងភូមិ ៦ សង្កាត់-ក្រុង កំពង់ចាម។ ប៉ុន្តែមួយសន្ទុះក្រោយមក ស្រាប់តែគេឃើញភ្លើងឆេះចេញពីបន្ទប់ជួលរបស់ជនរងគ្រោះ ហើយគេឃើញជនរងគ្រោះត្រូវភ្លើងឆេះរលាកពេញខ្លួនត្រូវបានគេដឹកទៅសង្គ្រោះបន្ទាន់តែបានស្លាប់ក្រោយបញ្ជូនដល់មន្ទីរពេទ្យ។ រីឯជនជាប់ចោទត្រូវសមត្ថកិច្ចចាប់ខ្លួន។
សំណុំរឿងនេះត្រូវបានសាលាដំបូង ខេត្តកំពង់ចាម បើកសវនាការ និងប្រកាសសាលក្រមនៅថ្ងៃទី ២១ វិច្ឆិកា ឆ្នាំ ២០១៤ ផ្តន្ទាទោសជនជាប់ចោទដាក់ពន្ធនាគារ ៣០ ឆ្នាំ និងបង្គាប់ឱ្យសងប្រាក់ទៅក្រុមគ្រួសារជនរងគ្រោះ ៤០ លានរៀល។ ប៉ុន្តែជនជាប់ចោទមិនសុខចិត្តបានប្តឹងមកសាលាឧទ្ធរណ៍ភ្នំពេញ។
ពាក់ព័ន្ធការបន្តបើកសវនាការម្តងទៀតនេះ ភ្នំពេញប៉ុស្តិ៍ បានទូរស័ព្ទទាក់ទងលោក អ៊ុំ សំអាង ជាមេធាវីការពារសិទ្ធិឱ្យជនជាប់ចោទនៅថ្ងៃទី ១៥ កុម្ភៈ ប៉ុន្តែលោកថា លោកមិនបានចូលស្តាប់ការប្រកាសសាលដីកានៅថ្ងៃទី ១៥ កុម្ភៈនេះទេ។ ទោះយ៉ាងណាកាលពីថ្ងៃទី ២៥ ខែមករា ដែលជាថ្ងៃបើកសវនាការលោក សំអាង បានលើកឡើងប្រាប់ចៅក្រមថា នៅយប់នោះម្ចាស់បន្ទប់ជួលគ្រាន់តែបានឃើញមនុស្សប្រុសម្នាក់ជិះម៉ូតូមកជាមួយកូនក្តីលោក តែមិនបញ្ជាក់ថា ជាកូនក្តីរបស់លោកទេ។ ដូច្នេះលោកស្នើសុំក្រុមប្រឹក្សាដោះលែងកូនក្តីលោកវិញ៕
