ភ្នំពេញៈ ជនសង្ស័យម្នាក់ត្រូវបានសមត្ថកិច្ចយកទៅមណ្ឌលចត្តាឡីស័ក ដោយសាររកឃើញវិជ្ជមានជំងឺកូវីដ ១៩ បន្ទាប់ពីចាប់ខ្លួនបានកាលពីវេលាទៀបភ្លឺឈានចូលថ្ងៃទី ១៥ កុម្ភៈ ពាក់ព័ន្ធករណីវាយប្លន់ម៉ូតូអ្នកដំណើរនៅភូមិ ម្ភៃបួន សង្កាត់ព្រៃស ខណ្ឌដង្កោ រាជធានីភ្នំពេញ ខណៈសមត្ថកិច្ចកំពុងស្រាវជ្រាវតាមរកចាប់ខ្លួនបក្ខពួកប្រមាណជាង ១០ នាក់ទៀត។
លោក ជាង ហុកសែ អធិការរងទទួលផែននគរបាលព្រហ្មទណ្ឌ ខណ្ឌដង្កោ ឱ្យដឹងនៅថ្ងៃទី ១៥ កុម្ភៈថា ជនសង្ស័យឈ្មោះ ញឹក ចាន់ណារី ភេទប្រុស អាយុ ២៧ ឆ្នាំត្រូវបានសមត្ថកិច្ចរបស់លោកយកទៅមណ្ឌលចត្តាឡីស័ក ដើម្បីព្យាបាលរោគកូវីដសិន។ ចំណែកបក្ខពួកប្រមាណជា ១០ នាក់ទៀត សមត្ថកិច្ចកំពុងស្រាវជ្រាវរកចាប់ខ្លួន។
លោកបានថ្លែងថា៖ «ករណីនេះ យើងមិនទាន់ដឹងថា បក្ខពួកជនសង្ស័យមានប៉ុន្មាននាក់ច្បាស់ទេ ព្រោះជនម្នាក់ដែលយើងចាប់បានមានកើតជំងឺកូវីដ។ ហេតុដូច្នេះ យើងពិបាកក្នុងការសួរចម្លើយ និងធ្វើនីតិវិធី»។
លោកបន្តថា កាលពីវេលាម៉ោងប្រមាណជា ៤ ទៀបភ្លឺថ្ងៃទី ១៥ កុម្ភៈ ជនរងគ្រោះ និងមិត្តភក្តិមានគ្នា ៣ នាក់ ជិះម៉ូតូ ១ គ្រឿងម៉ាកស៊ុយហ្ស៊ុយគីនិច ពណ៌ស ស៊េរីឆ្នាំ ២០១៧ និង ជនរងគ្រោះ ២ នាក់ទៀត ជិះម៉ូតូ ១ គ្រឿងម៉ាក HONDA ZOOMERX110 ពណ៌ខៀវ ឌុបគ្នាចេញពីកន្លែងផឹកស្រាក្រឡុកនៅម្តុំផ្សារត្រពាំងថ្លឹង ផ្លូវវេងស្រេង បំណងត្រឡប់មកបន្ទប់ជួលស្ថិតនៅភូមិម្ភៃបួន សង្កាត់ព្រៃស ខណ្ឌដង្កោ។
លោកបញ្ជាក់ថា លុះពួកគេជិះម៉ូតូមកដល់ខាងត្បូងស្តុបទួលពង្រក្នុងភូមិសាស្ត្រ ភូមិ ម្ភៃបួន សង្កាត់ព្រៃស ខណ្ឌដង្កោក៏ឃើញមានក្រុមមនុស្សប្រមាណជាង ១០ នាក់ ជិះម៉ូតូ ៧ គ្រឿងបានជិះម៉ូតូមកជិតហើយវាយទៅលើក្រុមជនរងគ្រោះ ថែមទាំងកាប់ស្លាកលេខម៉ូតូ ១ គ្រឿងម៉ាកនិចហើយជនរងគ្រោះ ២ នាក់បានផ្តួលម៉ូតូរត់យករួចខ្លួន។
ចំពោះវត្ថុតាងដែលសមត្ថកិច្ចដកហូតបានមានម៉ូតូម៉ាក HONDA ZOOMERX110 ពណ៌ខៀវ ពាក់ស្លាកលេខភ្នំពេញ ១ គ្រឿង។ ចំណែកឯបក្ខពួកជនល្មើសផ្សេងទៀត សមត្ថកិច្ចកំពុងបន្តស្រាវជ្រាវដើម្បីចាប់ខ្លួន។
ពាក់ព័ន្ធអំពើល្មើសរបស់ក្រុមជនទាំងនេះត្រូវបានលោក សេក សុជាតិ នាយកប្រតិបត្តិអង្គការអភិវឌ្ឍន៍ផ្នត់គំនិតថ្លែងនៅថ្ងៃទី ១៥ កុម្ភៈថា បញ្ហានេះមកពីមានការអប់រំផ្នែកផ្លូវចិត្ត និងផ្នត់គំនិតឱ្យវិជ្ជមានមិនបានល្អ ឬមិនបានគ្រប់គ្រាន់ហើយក្រុមយុវជនទាំងនោះ ខ្វះការយល់ដឹងពីកាតព្វកិច្ចស្ដីពីយុវជនល្អ ក្មេងល្អ ដែលទទួលបានការអប់រំត្រឹមត្រូវ ហើយរួមផ្សំនឹងពួកគេគ្មានចក្ខុវិស័យសម្រាប់អនាគតខ្លួនឯង។
លោកបន្តថា៖ «ពួកគេខ្វះការត្រិះរិះពិចារណាផ្នែកជំនាញទន់ ធ្វើតាមទម្លាប់អវិជ្ជមាន យកគំរូតាមបុគ្គលមិនល្អ។ ខ្វះការយល់ដឹងពីបញ្ហាសង្គម មិនស្គាល់ច្បាប់ ឬចេះច្បាប់តិចតួចពេកពិសេសគ្មានការតម្រង់ទិសអនាគតច្បាស់លាស់»៕