ភ្នំពេញៈ មន្ត្រីជាន់ខ្ពស់ខេត្តព្រះវិហារបានឱ្យដឹងថា ក្នុងរយៈពេលប៉ុន្មានឆ្នាំចុងក្រោយនេះ ដោយសារបញ្ហាការរីករាលដាលនៃជំងឺកូវីដ ១៩ ពុំមានពលករខ្មែរឆ្លងដែនទៅកាប់ឈើគ្រញូងនៅប្រទេសថៃទៀតទេ ព្រោះអាជ្ញាធរនៃប្រទេសទាំង ២ បានបង្កើនការរឹតបន្តឹងនៅតាមខ្សែបន្ទាត់ព្រំដែនរៀងៗខ្លួន។
ក្នុងសន្និសីទសារព័ត៌មាននៅទីស្តីការគណៈរដ្ឋមន្ត្រីស្តីពីវឌ្ឍនភាពមូលដ្ឋាន ឃុំ សង្កាត់ និងទិសដៅការងារបន្តរបស់ខេត្តព្រះវិហារកាលពីថ្ងៃទី ១៥ ខែកុម្ភៈនេះ អភិបាលរងខេត្តព្រះវិហារ លោក អ៊ុង វុទ្ធី បានថ្លែងថា មុនពេលរីករាលនៃជំងឺកូវីដ ១៩ ពលរដ្ឋខ្មែរមួយចំនួនបានលួចឆ្លងដែនទៅប្រទេសថៃ ដើម្បីកាប់គ្រញូងមកលក់។ ប៉ុន្តែដោយសារកូវីដ ១៩ កម្លាំងព្រំដែននៃប្រទេសទាំង ២ បានបង្កើនការការពារទើបមិនមានករណីនេះនៅខេត្តព្រះវិហារ។
លោកថា៖ «ចំពោះការជួញដូរឈើគ្រញូង សូមបញ្ជាក់ថា រយៈពេលនេះដោយស្ថានភាពកូវីដខាងភាគីថៃគេមានការប្រយ័ត្នក្នុងការចេញចូលឆ្លងដែន យើងក៏មានការប្រយ័ត្នក្នុងការចេញចូល អ៊ីចឹងការជួញដូរឈើគ្រញូង មិនមានទេ»។
លោកថា៖ «បើពីមុនមានមែន ដោយសារបញ្ហាគ្រញូងលក់បានថ្លៃ ហើយឈ្មួញមានការទាក់ទងទិញលក់ ប៉ុន្តែឥឡូវនេះមិនមានការឆ្លងដែនកាប់ឈើគ្រញូងទៀតទេ»។
ដោយឡែកពាក់ព័ន្ធបញ្ហាព្រំដែននេះដែរ លោក អ៊ុង វុទ្ធី បានថ្លែងថា បច្ចុប្បន្ននេះកម្ពុជាមានកិច្ចសហការល្អជាមួយប្រទេសជិតខាងនៅតាមខ្សែបន្ទាត់ព្រំដែន ហើយពុំមានភាពមិនប្រក្រតីកើតឡើងធំដុំនោះទេ។
លោកថា៖ «តាមបណ្តាយព្រំដែនយើងមានសន្តិសុខ សុវត្ថិភាព ក្រុមការងារដឹកនាំនយោបាយឈ្នះឈ្នះរបស់សម្តេចតេជោ យើងមានកិច្ចសហប្រតិបត្តិការល្អរវាងប្រទេសទាំង ២ នោះតាមព្រំដែន គឺថាអាជ្ញាធរខេត្ត អាជ្ញាធរព្រំដែន មេបញ្ជាការកងពលអន្តរាគមន៍ធំ កងពលតូច មេបញ្ជាការតាមព្រំដែន គឺបានសហការគ្នាល្អ»។
លោកបានឱ្យដឹងដែរថា អាជ្ញាពាក់ព័ន្ធព្រំដែនតែងតែមានកិច្ចប្រជុំរៀងរាល់ខែ ដើម្បីស្តាប់របាយការណ៍ និងរកដំណោះស្រាយនៅពេលមានបញ្ហានៅតាមព្រំដែនថៃ និងឡាវ។
នាយកប្រតិបត្តិមជ្ឈមណ្ឌលសម្ព័នភាពការងារ និងសិទ្ធិមនុស្សលោក មឿន តុលា ធ្លាប់ប្រាប់ភ្នំពេញប៉ុស្តិ៍ថា មិនថាពលករខ្មែរចំណាកស្រុកទៅថៃដើម្បីរកការងារ ឬលួចកាប់គ្រញូងនៅថៃ គឺដោយសារកត្តាជីវភាព និងមិនមានការងារច្បាស់លាស់ក្នុងស្រុកជាដើម។
លោកបានថ្លែងដោយជំរុញដល់រដ្ឋាភិបាលគួរគិតគូរអភិវឌ្ឍនៅមូលដ្ឋានបន្ថែមទៀត ដូចជាវិស័យកសិកម្ម៕