.jpg)
មន្ត្រីក្រុមប្រឹក្សាខេត្តព្រះវិហារ និងមន្ត្រីនាំពាក្យរដ្ឋាភិបាលក្នុងសន្និសីទកាសែតនាថ្ងៃទី ១៥ កុម្ភៈ នៅគណៈរដ្ឋមន្ត្រី។រូប COM
ភ្នំពេញៈ ក្នុងសន្និសីទសារព័ត៌មាននៅទីស្តីការគណៈរដ្ឋមន្ត្រីស្តីពីវឌ្ឍនភាពមូលដ្ឋាន ឃុំ សង្កាត់ និងទិសដៅការងារបន្តរបស់ខេត្តព្រះវិហារនាថ្ងៃទី ១៥ កុម្ភៈ ក្រុមប្រឹក្សាខេត្តព្រះវិហារ ដាក់ទិសដៅឱ្យមន្ត្រីចុះដល់មូលដ្ឋាន ដើម្បីប្រមូលសំណូមពរ និងតម្រូវការរបស់ប្រជាពលរដ្ឋ ហើយក៏ជំរុញឱ្យអាជ្ញាធរមូលដ្ឋាន យកចិត្តទុកដាក់ក្នុងការផ្តល់សេវាសាធារណៈ និងត្រូវខិតខំដោះស្រាយវិវាទក្រៅប្រព័ន្ធតុលាការ។
ប្រធានក្រុមប្រឹក្សាខេត្តព្រះវិហារ លោក ឡុង សុវណ្ណ ថ្លែងក្នុងសន្និសីទនោះថា ជាក់ស្តែងកន្លងមកក្រុមប្រឹក្សាខេត្តបានខិតខំបំពេញតួនាទី ភារកិច្ច និងការងារ របស់ខ្លួនដោយសម្រេចបាននូវសមិទ្ធផលជាច្រើន។ ក្នុងនោះបានបែងចែកតួនាទីភារកិច្ចជូនសមាជិកក្រុមប្រឹក្សាខេត្តឱ្យចុះសហការជាមួយរដ្ឋបាលក្រុង ស្រុក ក្នុងការប្រមូលព័ត៌មាន សំណើ និងសំណូមពរនានា ដើម្បីរៀបចំរបាយការណ៍សម្រាប់ដាក់ចូលក្នុងកិច្ចប្រជុំក្រុមប្រឹក្សាខេត្ត ដើម្បីដោះស្រាយ និងឆ្លើយតបតម្រូវការរបស់ប្រជាពលរដ្ឋ។
លោកថា ក្រុមប្រឹក្សាខេត្តបានរៀបចំវេទិកាផ្សព្វផ្សាយ និងពិគ្រោះយោបល់នៅតាមក្រុងស្រុកដោយក្នុងឆ្នាំ ២០១៩ បានទទួលសំណើ និងសំណូមពរចំនួន ៥៣ ករណី និងបានធ្វើការដោះស្រាយបាន ៤៥ ករណី។ ប៉ុន្តែក្នុងឆ្នាំ ២០២០ និង ២០២១ ក្រុមប្រឹក្សាខេត្តមិនបានរៀបចំវេទិកានោះទេ ដោយសារបញ្ហាកូវីដ ១៩។
លោកបញ្ជាក់ថា៖ «ទោះបីមិនបានរៀបចំវេទិកាពិគ្រោះយោបល់ ប៉ុន្តែបានផ្តល់ការបណ្តុះបណ្តាលអភិវឌ្ឍន៍សមត្ថភាពសមាជិកជាបន្តបន្ទាប់ ដើម្បីមានចំណេះដឹង និងជំនាញ និងមានឥរិយាបថល្អក្នុងការផ្តល់សេវាជូនប្រជាពលរដ្ឋឱ្យបានល្អប្រសើរ»។
ទន្ទឹមនឹងការរីកចម្រើនក្នុងខេត្ត លោក ឡុង សុវណ្ណ ក៏បានលើកពីបញ្ហាប្រឈមពាក់ព័ន្ធសំណូមពរ និងកង្វល់របស់ប្រជាពលរដ្ឋមួយចំនួន ដែលពុំទាន់ដោះស្រាយបានទាន់ពេលវេលានៅឡើយ ដូចជាផ្លូវ ថ្នល់ ស្ពាន។ល។ តភ្ជាប់ពីភូមិ ១ ទៅភូមិ ១ ហើយភូមិខ្លះ នៅមានការលំបាក ដោយសារមិនមានថវិកាដើម្បីសាងសង់។
ទោះយ៉ាងណា ដើម្បីអភិវឌ្ឍខេត្ត ក្រុមប្រឹក្សាខេត្តបានដាក់ទិសដៅការងារសម្រាប់ឆ្នាំ ២០២២ ដោយបន្តរៀបចំវេទិកាផ្សព្វផ្សាយ និងពិគ្រោះយោល់របស់ក្រុមប្រឹក្សាខេត្ត និងបន្តចុះគាំទ្រដល់មូលដ្ឋាន ដើម្បីប្រមូលព័ត៌មានចំហពីប្រជាពលរដ្ឋ និងប្រមូលសំណូមពរ ដើម្បីឆ្លើយតបទាន់ពេលវេលា។ បន្តពង្រឹង និងគាំទ្រដល់យន្តការសម្រុះសម្រួល និងដោះស្រាយវិវាទក្រៅប្រព័ន្ធតុលាការ តាមរយៈការិយាល័យប្រជាពលរដ្ឋខេត្ត។ បន្តពង្រឹងគោលនយោបាយរៀបចំ ផែនការអភិវឌ្ឍន៍ និងការកសាងកម្មវិធីវិនិយោគខេត្ត ក្រុង ស្រុក និងឃុំ សង្កាត់ និងការរៀបចំយុទ្ធសាស្ត្រថវិកា ដើម្បីស្របទៅនឹងតម្រូវការការអភិវឌ្ឍ។
មេឃុំទឹកក្រហម លោក វ៉ន សារ៉ុម លើកឡើងថា ការអភិវឌ្ឍផ្នែកសេដ្ឋកិច្ចរបស់ឃុំក្នុងអាណត្តិមុន និងប៉ុន្មានឆ្នាំចុងក្រោយ ក៏ដូចជាបច្ចុប្បន្នមានហេដ្ឋារចនាសម្ព័ន្ធ និងផ្លូវថ្នល់ខ្វាត់ខ្វែងគ្រប់ភូមិ ដែលបានប្រែក្លាយពីផ្លូវក្រាលដីសទៅជាផ្លូវក្រាលក្រួសក្រហម និងបានរៀបចំផ្សារសម្រាប់ដោះដូរទំនិញគ្រប់ប្រភេទក្នុងការលើកកម្ពស់សេដ្ឋកិច្ចជូនប្រជាពលរដ្ឋ។ ដោយឡែក ផ្នែកសង្គមកិច្ចជាផ្នែកមួយសំខាន់ ដោយលើកយកបញ្ហាសមភាពយេនឌ័រមកបញ្ច្រាបចូលគ្រប់សកម្មភាពទាំងអស់ក្នុងមូលដ្ឋាន ហើយបានដោះស្រាយលើគ្រប់វិស័យ។ ជាពិសេសវិស័យសេវាកម្ម កសិកម្ម សុខាភិបាល និងវិស័យអប់រំ។
លោកបន្តថា សម្រាប់ការងារសន្តិសុខសណ្តាប់ធ្នាប់ និងការដោះស្រាយវិវាទនៅឃុំវិញ លោកបានសម្រុះសម្រួលបញ្ចប់ទំនាស់បាន ១៨៦ ករណី និងបានពង្រឹងការអនុវត្តច្បាប់ស្តីពីការទប់ស្កាត់អំពើហិង្សាក្នុងគ្រួសារ និងកិច្ចការពារជនរងគ្រោះ និងច្បាប់ស្តីពីការបង្ក្រាបអំពើជួញដូរមនុស្ស និងការធ្វើអាជីវកម្មផ្លូវភេទផងដែរ។
លោកថ្លែងថា៖ «ការដោះស្រាយវិវាទរបស់ខ្ញុំបាទមិនមែនយកយន្តការផ្លូវច្បាប់ជាធំទេ គឺប្រើយន្តការសម្របសម្រួលជាធំ ហើយយើងតាមដានអង្កេត។ មានន័យថា ការដោះស្រាយទំនាស់ មានទំនាស់ចំហ និងទំនាស់បង្កប់។ ទំនាស់ចំហ គាត់ជេរគ្នា យើងដឹងរឿង ប៉ុន្តែទំនាស់បង្កប់ទាល់តែយើងស្រាវជ្រាវរកឫសគល់»។
លោកបញ្ជាក់ថា៖ «កាលណាយើងយកយន្តការសម្របសម្រួលមកដោះស្រាយ ពួកគាត់សប្បាយចិត្ត។ បើយើងសម្របសម្រួលផ្លូវច្បាប់ គឺមានឈ្នះមានចាញ់។ អ៊ីចឹងយើងព្យាយាមឱ្យគាត់យកយន្តការសម្របសម្រួលឈរលើគោលការណ៍ឈ្នឈ្នះ»។
ខេត្តព្រះវិហារមានប្រភពធនធានរ៉ែសំខាន់ៗ ដូចជា មាស ដែក ស្ពាន់ និងសំណ។ល។ ប៉ុន្តែពុំទាន់មានលទ្ធភាពទាញយកផលបាននៅឡើយទេ។ ជាមួយគ្នានេះ ខេត្តក៏មានប្រាសាទបុរាណជាច្រើនកន្លែងក្នុងនោះមាន ៣ សំខាន់ គឺប្រាសាទព្រះវិហារស្ថិតនៅលើកំពូលភ្នំដងរែកជាប់ព្រំប្រទល់ថៃ ប្រាសាទកោះកែរ និងប្រាសាទព្រះខ័នកំពង់ស្វាយ។ រមណីយដ្ឋានធម្មជាតិ ទឹកជ្រោះ ព្រះនិម្មិត ជាប់ព្រំដែនប្រទេសឡាវ និងភ្នំត្បែងស្ថិតក្នុងភូមិសាស្ត្រ ស្រុកត្បែងមានជ័យ ស្រុកសង្គមថ្មី ស្រុកគូលែន ដែលមានសក្តានុពលខ្ពស់ខាងវិស័យទេសចរណ៍។
ជាមួយគ្នានេះរាជរដ្ឋាភិបាលក៏បាននិងកំពុងសាងសង់ទំនប់អាងទឹករក្សាក្នុងភូមិសាស្ត្រ ឃុំរក្សា ស្រុករវៀង និងឃុំពទ្រា ស្រុកជ័យសែន ដោយបិទស្ទឹងសែន ដែលមានសមត្ថភាពអាចរក្សាទឹកទុកបានប្រមាណ ២៥៦,៩ លានម៉ែត្រគុប សម្រាប់ផ្គត់ផ្គង់ទាំងវិស័យកសិកម្ម និងការប្រើប្រាស់សព្វសារពើ។ នេះបើតាមរបាយការណ៍សង្ខេបរបស់ក្រុមប្រឹក្សាខេត្តព្រះវិហារ៕
