ភ្នំពេញៈ កម្ពុជា និងសិង្ហបុរី ប្តេជ្ញាបន្តរឹតចំណងសាមគ្គីភាពរវាងប្រជាជន និងប្រជាជននៃប្រទេសទាំង ២ ដោយផ្តោតសំខាន់លើការស្វែងយល់ពីតម្រូវការរបស់ប្រជាជនវ័យក្មេង ដែលជាកម្លាំងស្នូលដ៏សំខាន់ក្នុងការចូលរួមចំណែកអភិវឌ្ឍប្រទេសជាតិ។
ការប្តេជ្ញានេះត្រូវបានធ្វើឡើងក្នុងជំនួបរវាងប្រធានគណៈកម្មការទី ៧ នៃរដ្ឋសភាលោក ហ៊ុន ម៉ានី បានទទួលជួបរដ្ឋមន្ត្រីការបរទេសនៃសាធារណរដ្ឋសិង្ហបុរីលោក វីវៀន បាឡាគ្រីស្សស្នាន នាឱកាសដែលអញ្ជើញបំពេញទស្សនកិច្ចផ្លូវការនៅកម្ពុជា និងចូលរួមកិច្ចប្រជុំថ្នាក់រដ្ឋមន្ត្រីការបរទេសអាស៊ាន កាលពីថ្ងៃទី ១៦ ខែកុម្ភៈ ឆ្នាំ ២០២២។
សេចក្តីជូនដំណឹងរបស់រដ្ឋសភាបានឱ្យដឹងថា ក្នុងជំនួបនោះភាគីទាំង ២ បានពិភាក្សាបន្តស្មារតីនៃទំនាក់ទំនងល្អដែលបានចាក់ឫសរឹងមាំរវាងមេដឹកនាំទាំង ២ រវាងលោកនាយករដ្ឋមន្ត្រី ហ៊ុន សែន និងលោក Lee Hsien Loong អតីតនាយករដ្ឋមន្ត្រីសិង្ហបុរី ដែលធ្វើឱ្យទំនាក់ទំនងទ្វេភាគីកាន់តែរីកចម្រើនបន្តទៅដល់ជំនាន់ក្រោយ។ ភាគីទាំង ២ ក៏បានពិភាក្សាផ្លាស់ប្តូរយោបល់អំពីទំនាក់ទំនងទ្វេភាគីនៃប្រទេសទាំង ២ ដែលក្នុងនាមជាប្រទេសរួមសហគមន៍អាស៊ានតែមួយផងដែរ។
នៅក្នុងជំនួបនោះ ភាគីទាំង ២ បានធ្វើការពិភាក្សាដោយផ្តោតសំខាន់លើការបន្តរឹតចំណងមិត្តភាពរវាងប្រជាជន និងប្រជាជន និងការស្វែងយល់ពីតម្រូវការរបស់ប្រជាជនវ័យក្មេងនៃប្រទេសទាំង ២ ផងដែរ។
រដ្ឋសភាបន្តថា៖ «ភាគីទាំង ២ បានពិភាក្សា ផ្លាស់ប្តូរយោបល់ និងបទពិសោធក្នុងក្របខ័ណ្ឌនៃការងារយុវជនរបស់ប្រទេសទាំង ២ និងបានបង្ហាញជំហរក្នុងការពង្រឹងទំនាក់ទំនងយុវជននៃប្រទេសទាំង ២ ក្នុងការស្វែងយល់ពីគ្នាទៅវិញទៅមកកាន់តែច្រើន តាមរយៈការបង្កើនការផ្លាស់ប្តូរឱកាសជំនួប និងគម្រោងការងាររវាងយុវជនអ្នកបន្តវេនជំនាន់ក្រោយ»។
ក្នុងដំណើរទស្សនកិច្ចនេះលោក វីវៀន បាឡាគ្រីស្សស្នាន ក៏ចូលជួបសវនាការ សម្តែងការគួរសមជាមួយលោកនាយករដ្ឋមន្ត្រី ហ៊ុន សែន ផងដែរ នៅក្នុងថ្ងៃដដែលនោះ។
សូមជម្រាបថា លោក វីវៀន បាឡាគ្រីស្សស្នាន ធ្លាប់បានដឹកនាំគណៈប្រតិភូមកបំពេញទស្សនកិច្ចផ្លូវការនៅកម្ពុជាម្តងរួចហើយ កាលពីខែតុលា ឆ្នាំ ២០១៧។
ក្នុងដំណើរទស្សនកិច្ចនោះ លោកបានចុះហត្ថលេខាលើអនុស្សរណៈយោគយល់គ្នារវាងក្រសួងការបរទេស និងសហប្រតិបត្តិការអន្តរជាតិ និងក្រសួងការបរទេសនៃសាធារណរដ្ឋសិង្ហបុរី ស្តីពីការពិគ្រោះយោបល់ផ្នែកនយោបាយ។
ក្រសួងការបរទេសកម្ពុជាបានឱ្យដឹងដែរថា ចាប់តាំងពីការភ្ជាប់ទំនាក់ទំនងការទូតនៅឆ្នាំ ១៩៦៥ រវាងប្រទេសទាំង ២ មក គឺមានកិច្ចសហប្រតិបត្តិការល្អប្រសើរ ដូចដែលបានឃើញតាមរយៈការផ្លាស់ប្តូរដំណើរទស្សនកិច្ចកម្រិតខ្ពស់ និងកំណើនពាណិជ្ជកម្មទៅវិញទៅមកប្រចាំឆ្នាំគួរឱ្យកត់សម្គាល់៕