ភ្នំពេញៈ លោកនាយករដ្ឋមន្ត្រីហ៊ុនសែនថ្លែងក្នុងថ្ងៃបុណ្យមាឃបូជាថា ព្រះពុទ្ធសាសនាមិនត្រឹមតែផ្តល់ភាពសុខសាន្តផ្នែកផ្លូវចិត្តនោះទេ ប៉ុន្តែថែមទាំងរួមចំណែកពង្រឹងសណ្តាប់ធ្នាប់សុខសន្តិភាព ស្ថិរភាពសង្គម ការអភិវឌ្ឍលើគ្រប់វិស័យ និងថែរក្សាការពារអត្តសញ្ញាណជាតិទៀតផង។
ថ្លែងតាមរយៈសំណេរលើទំព័រហ្វេសប៊ុក នៅថ្ងៃទី ១៦ ខែកុម្ភៈ លោក ហ៊ុនសែន បានអនុមោទនាពិពីបុណ្យ បុណ្យមាឃបូជា និងបានរំឭកថា ថ្ងៃពុធ ១៥កើត ខែមាឃ ឆ្នាំឆ្លូវ ត្រីស័ក ព.ស. ២៥៦៥ ត្រូវនឹង ថ្ងៃទី១៦ ខែកុម្ភៈ ឆ្នាំ២០២២នេះ គឺ ជាថ្ងៃបុណ្យមាឃបូជាដែលជាពិធីបុណ្យមួយដ៏មានសារៈសំខាន់បំផុតនៅក្នុងព្រះពុទ្ធសាសនា ដែលជាសាសនារបស់រដ្ឋ។
លោកលើកឡើងថា បុណ្យមាឃបូជាប្រារព្ធឡើងដើម្បីរំឭកដល់ថៃ្ង ដែលព្រះសម្មាសម្ពុទ្ធ ទ្រង់ប្រកាសបង្កើតព្រះពុទ្ធសាសនាឡើងក្នុងលោកនាប្រទេសឥណ្ឌា កាលពី៥៨៨ឆ្នាំ មុនគ្រិស្តសករាជ នាថៃ្ងទី១៥កើត ខែមាឃ ក្រោយពីការត្រាស់ដឹងរបស់ព្រះអង្គចំនួន៩ខែគត់។
លោកថ្លែងថា៖«ព្រះពុទ្ធសាសនាមិនត្រឹមតែបានធ្វើឱ្យបងប្អូនប្រជាពលរដ្ឋយើងបានរួមរស់ជាមួយគ្នាដោយសុខសាន្តខាងផ្លូវស្មារតីប៉ុណ្ណោះទេ ប៉ុន្តែថែមទាំងបានរួមចំណែកយ៉ាងសំខាន់នៅក្នុងការពង្រឹងសណ្ដាប់ធ្នាប់សុខសន្តិភាព ស្ថិរភាពសង្គម ការអភិវឌ្ឍលើគ្រប់វិស័យ និងថែរក្សាការពារអត្តសញ្ញាណជាតិទៀតផង»។
លោក ហេង សំរិន ប្រធានរដ្ឋសភា ក៏បានចេញសារអនុមោទនាបុណ្យមាឃបូជាស្រដៀងនិងលោកនាយករដ្ឋមន្ត្រី ហ៊ុនសែន ផងដែរ។ លោកថា មាឃបូជាក៏ជាថ្ងៃរំឭកដល់ការដាក់អាយុសង្ខារចូលព្រះបរិនិព្វានរបស់ព្រះពុទ្ធអង្គ ប៉ុន្តែដោយសារតែប្រទេសជាតិកំពុងមានបញ្ហាប្រឈមនឹងជំងឺកូវីដ១៩ មិនបានប្រារព្ធពិធីនេះមានលក្ខណៈទ្រង់ទ្រាយធំបានឡើយ។
លោកថ្លែងថា ៖«ដោយសារយើងកំពុងស្ថិតនៅក្នុងការប្រឈមនឹងជំងឺកូវីដ ១៩នៅឡើយ ការប្រារព្ធពិធីបុណ្យមាឃបូជាក្នុងទ្រង់ទ្រាយធំពុំបានរៀបចំធ្វើឡើងដូចឆ្នាំមុនៗ ដែលមិនមានជំងឺរាតត្បាតកូវីដ ១៩នោះទេ។ ឆ្លៀតឱកាសនេះខ្ញុំ សូមអំពាវនាវដល់ជនរួមជាតិទាំងអស់បន្តយកចិត្តទុកដាក់ អនុវត្តវិធានការសុខាភិបាលឱ្យបានខ្ជាប់ខ្ជួនមិនត្រូវធ្វេសប្រហែសនឹងជំងឺកូវីដ ១៩ឡើយ»។
លោក គង់ សំអុល ប្រធានគណៈកម្មាធិការជាតិរៀបចំបុណ្យជាតិ-អន្តរជាតិ បានឲ្យដឹងតាមរយៈលិខិតណែនាំស្តីពីការរៀបចំពិធីបុណ្យមាឃបូជា កាលថ្ងៃទី ១០ខែកុម្ភៈថា ពិធីបុណ្យនេះត្រូវធ្វើឡើងជាផ្លូវការនៅបរិវេណព្រះមហាសក្យមុនីចេតិយ ភ្នំព្រះរាជទ្រព្យ (ឧត្តុង្គ) ស្រុកពញាឮ ខេត្តកណ្តាល រយៈពេលមួយថ្ងៃគឺនៅថ្ងៃពេញបូណ៌មី ខែមាឃ។
លោកបញ្ជាក់ថា រដ្ឋបាលខេត្តកណ្តាលត្រូវសហការជាមួយ គណៈកម្មាធិការជាតិរៀបចំបុណ្យជាតិ-អន្តរជាតិ ចាត់ចែងរៀបចំពិធីបុណ្យនេះ ដោយតុបតែងលម្អតាមដងផ្លូវ ដំឡើងផ្ទាំងប៉ាណូធំៗ ស្តីពីព្រះពុទ្ធទ្រង់ប្រសូត ត្រាស់ដឹង ព្រះពុទ្ធទ្រង់បរិនិព្វាន និងចាត់កម្លាំងការពាររក្សាសន្តិសុខ សណ្តាប់ធ្នាប់សង្គម ចរាចរណ៍ មុន-ក្រោយ និងក្នុងពេលប្រារព្ធពិធីបុណ្យឲ្យបានល្អប្រសើរ។
លោកគ្រុយ ម៉ាឡែន នាយករដ្ឋបាលខេត្តកណ្តាលថ្លែងនៅថ្ងៃទី ១៦ ខែកុម្ភៈថា ការរៀបចំពិធីបុណ្យមាឃបូជាឆ្នាំនេះមិនខុសពីការប្រារព្ធធ្វើដូចសព្វដងនោះទេ ប៉ុន្តែឆ្នាំនេះមានការអញ្ចើញចូលរួមជាអធិបតីយដោយលោក ស្រី ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច។ លោកបន្តថា កម្មវិធីបុណ្យគឺធ្វើឡើងតាមការគន្លងប្រពៃណីព្រះពុទ្ធសាសនា ដោយអនុវត្តទៅតាមកម្មវិធីដែលគណៈកម្មាធិការរៀបចំបុណ្យជាតិ-អន្តរជាតិបានណែនាំ ក្នុងនោះមានពិធីសូត្រមន្តចម្រើនព្រះបរិត្ត រៀបចំតេយ្យទានប្រគេនព្រះសង្ឃប្រមាណ ៨០ អង្គជាដើម។
លោកបញ្ជាក់ថា ដោយសារតែបច្ចុប្បន្នកំពុងមានបញ្ហាប្រឈមនឹងជំងឺកូវីដ១៩ រដ្ឋបាលខេត្តកណ្តាល និងគណៈកម្មកាធិការជាតិរៀបចំបុណ្យជាតិ-អន្តរជាតិ បានយកចិត្តទុកដាក់យ៉ាងខ្លាំងលើការថែរក្សាអនាម័យ ការពាក់ម៉ាស់ រក្សាគម្លាត អនុវត្តតាមការណែនាំរបស់ក្រសួងសុខាភិបាល ក៏ដូចជាការណែនាំរបស់លោកនាយករដ្ឋមន្ត្រីគឺវិធានការពារ និង៣កុំ ផងដែរ។
ព្រះភិក្ខុ វជិរប្បញ្ញោ គូ សុភាព បានឲ្យដឹងនៅថ្ងៃទី ១៦ ខែកុម្ភៈថា មាឃបូជាគឺជាថ្ងៃសំខាន់ពិសេសមួយដែលព្រះសម្មាសម្ពុទ្ធធ្វើសន្និបាតសង្ឃដើម្បីប្រកាសពីធម្មនុញ្ញរបស់ព្រះពុទ្ធសាសនា ដែលព្រះអង្គប្រាប់ទៅភិក្ខុចំនួន ១២៥០ សុទ្ធតែជាព្រះអរហន្តមានរិទ្ធិមានអភិញ្ញាបានមកជុំគ្នា និងជាមនុស្សសំខាន់ក្នុងការផ្សព្វផ្សាយព្រះពុទ្ធសានាក្នុងសម័យនោះ។
ព្រះអង្គមានសង្ឃដីការថា៖«ពិធីបុណ្យមាឃបូជានេះជាថ្ងៃពិសេសមួយ ជាថ្ងៃដែលព្រះអង្គប្រជុំសន្និបាតសង្ឃជាលើកដំបូង ដូចប្រជុំសភាអ៊ីចឹងដើម្បីប្រកាសនូវធម្មនុញ្ញរបស់ព្រះពុទ្ធសាសនា ជាគោលការណ៍រួម ជាបេះដូងធម៌ ដើម្បីឲ្យភិក្ខុសង្ឃជាពិសេសដើម្បីនឹងជួយផ្សព្វផ្សាយដល់ពុទ្ធបរិស័ទ»។
ព្រះអង្គបន្តថា ថ្ងៃ ១៥កើតខែមាឃនោះផងដែរ ជាថ្ងៃដែលព្រះពុទ្ធរៀបចំរចនាសម្ព័ន្ធគ្រប់គ្រងភិក្ខុសង្ឃឲ្យបានច្បាស់លាស់ដោយតែងតាំងអគ្គសាវ័ក២អង្គគឺ ព្រះសារីបុត្រ និងមោក្ខលាន ឲ្យជាអ្នកបំពេញកាតព្វកិច្ចក្នុងការផ្សព្វផ្សាយព្រះធម៌ផងដែរ ។មួយវិញទៀត ថ្ងៃមាឃបូជា គឺជាថ្ងៃដែលរំឭកដល់ថ្ងៃដែលព្រះពុទ្ធទ្រង់ដាក់អាយុសង្ខារដោយសារស្តេចមារតាមអារាធនា៕