ភ្នំពេញៈ រដ្ឋាភិបាលបារាំងសម្រេចផ្តល់ជំនួយចំនួន ២០ ម៉ឺនអឺរ៉ូដល់កញ្ចប់ថវិកាឆ្នាំ ២០២២ របស់ភាគីអន្តរជាតិនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) ដែលធ្វើឱ្យជំនួយសរុប ដែលប្រទេសបារាំងផ្តល់ឱ្យ អ.វ.ត.ក មានចំនួន ៦,៩ លានអឺរ៉ូ គិតចាប់តាំងពីតុលាការនេះត្រូវបានបង្កើតឡើង។
តាមការផ្សព្វផ្សាយរបស់គេហទំព័រហ្វេសប៊ុករបស់ស្ថានទូតបារាំងនៅថ្ងៃទី ១៥ ខែកុម្ភៈបានឱ្យដឹងថា ការផ្តល់ជំនួយហិរញ្ញវត្ថុបន្ថែមទៀតនេះត្រូវបានប្រកាសក្នុងអំឡុងនៃកិច្ចប្រជុំនៃក្រុមមិត្ត អ.វ.ត.ក ធ្វើឡើងនៅព្រឹកថ្ងៃទី ១៥ ខែកុម្ភៈ ក្រោមសហអធិបតីលោក ហ្សាក់ ប៉ឺឡែ ឯកអគ្គរដ្ឋទូតបារាំងប្រចាំកម្ពុជា និងលោក ម៉ាសាហ៊ីរ៉ូ មីកាមី ឯកអគ្គរដ្ឋទូតជប៉ុន ប្រចាំកម្ពុជា។
កិច្ចជំនួបនេះគឺជាលើកទី ១ របស់ក្រុមមិត្ត អ.វ.ត.ក ដោយមានវត្តមានដោយផ្ទាល់ ចាប់តាំងពីការលេចឡើងនៃជំងឺកូវីដ ១៩។ កិច្ចជំនួបនេះគឺជាឱកាសនៃការពិភាក្សាផ្លាស់ប្តូរយោបល់គ្នាជាមួយតំណាងរដ្ឋបាលនៃ អ.វ.ត.ក និងតំណាងស្ថានទូតជាច្រើនដែលចូលរួមសង្កេតមើលពីសេចក្តីសម្រេចថ្មីៗរបស់ អ.វ.ត.ក កាលវិភាគរបស់ អ.វ.ត.ក ការជះឥទ្ធិពលនៃជំងឺកូវីដ ១៩ លើសកម្មភាពរបស់ អ.វ.ត.ក ការបំពេញមុខងារ ដែលនៅសេសសល់របស់ អ.វ.ត.ក ក្រោយការបញ្ចប់អាណត្តិរបស់ខ្លួន។
លោក នេត្រ ភក្ត្រា អ្នកនាំពាក្យនៃអង្គជំនុំជម្រះវិសាមញ្ញក្នុងតុលាការកម្ពុជា ប្រាប់ភ្នំ-ពេញប៉ុស្តិ៍នៅថ្ងៃទី ១៥ ខែកុម្ភៈថា ប្រទេសបារាំងជាប្រទេសម្ចាស់ជំនួយដ៏ធំមួយរបស់សាលាក្តីខ្មែរក្រហម ដែលតែងតែផ្តល់ការគាំទ្រ និងបានចូលរួមគាំទ្រដល់ដំណើរការស្វែងរកការពិត និងយុត្តិធម៌ដល់ជនរងគ្រោះនៃរបបកម្ពុជាប្រជាធិបតេយ្យ។
លោកបានថ្លែងថា៖ «សាលាក្តីខ្មែរក្រហមសូមថ្លែងអំណរគុណដល់រដ្ឋាភិបាលបារាំង ដែលបានបន្តផ្តល់ការគាំទ្រ ផ្នែកហិរញ្ញវត្ថុមកអង្គជំនុំជម្រះវិសាមញ្ញក្នុងតុលាការកម្ពុជា ដើម្បីបន្តកិច្ចការងារដ៏មានសារៈសំខាន់របស់ខ្លួនក្នុងដែនយុត្តាធិការនាំយកអតីតមេដឹកនាំ និងអ្នកទទួលខុសត្រូវជាន់ខ្ពស់ក្នុងឧក្រិដ្ឋកម្មធ្ងន់ធ្ងរមកជំនុំជម្រះក្តី ចំពោះឧក្រិដ្ឋកម្មដែលបានកើតឡើងនៅក្នុងរបបខ្មែរក្រហមដែលត្រូវបានចោទប្រកាន់ពីបទឧក្រិដ្ឋកម្មប្រឆាំងនឹងមនុស្សជាតិ ឧក្រិដ្ឋកម្មសង្គ្រាម និងឧក្រិដ្ឋកម្មប្រល័យពូជសាសន៍»។
បើតាមលោក នេត្រ ភក្ត្រា បច្ចុប្បន្ននេះ អង្គជំនុំជម្រះវិសាមញ្ញក្នុងតុលាការកម្ពុជា នៅសល់សំណុំរឿង ១ គឺសំណុំរឿង ០០២/០០២ ដែលរហូតមកដល់ពេលនេះរង់ចាំប្រកាសសាលដីកាស្ថាពរលើសំណុំរឿង ០០២/០០២ ដែលជាបណ្តឹងសារទុក្ខរបស់លោក ខៀវ សំផន ប្រឆាំងទៅនឹងសាលក្រមរបស់អង្គជំនុំជម្រះសាលាដំបូងដែលសម្រេចផ្តន្ទាទោសគាត់ដាក់ពន្ធនាគារអស់ ១ ជីវិតពីបទឧក្រិដ្ឋកម្មសង្គ្រាម ឧក្រិដ្ឋកម្មប្រឆាំងមនុស្សជាតិ និងឧក្រិដ្ឋកម្មប្រល័យពូជសាសន៍។ សាលដីកាស្ថាពរនេះរំពឹងថា នឹងប្រកាសនៅត្រីមាសទី ៤ ឆ្នាំ ២០២២ នេះ ដោយអង្គជំនុំជម្រះវិសាមញ្ញក្នុងតុលាការ-កម្ពុជា។ អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) គឺជាតុលាការកូនកាត់មួយដែលទទួលបានការគាំទ្រពីមជ្ឈដ្ឋានអន្ដរជាតិតាមរយៈអង្គការសហប្រជាជាតិ (UNAKRT)។
តុលាការនេះត្រូវបានបង្កើតឡើងនៅថ្ងៃទី ៦ ខែមិថុនា ឆ្នាំ ២០០៣ ដើម្បីនាំយកអតីតមេដឹកនាំ និងអ្នកទទួលខុសត្រូវជាន់ខ្ពស់ក្នុងឧក្រិដ្ឋកម្មធ្ងន់ធ្ងរមកជំនុំជម្រះក្តី ចំពោះឧក្រិដ្ឋកម្មដែលបានកើតឡើងនៅក្នុងរបបខ្មែរក្រហម ដែលត្រូវបានចោទប្រកាន់ពីបទឧក្រិដ្ឋកម្មប្រឆាំងនឹងមនុស្សជាតិឧក្រិដ្ឋកម្មសង្គ្រាម និងឧក្រិដ្ឋកម្មប្រល័យពូជសាសន៍៕