.jpg)
មន្ត្រីជំនាញកំពុងត្រួតពិនិត្យសពត្រីផ្សោតនៅអន្លង់ឈើទាល។ រូបថត ហ្វេសប៊ុក
ស្ទឹងត្រែងៈ មន្ត្រីផ្នែកជលផលខេត្តស្ទឹងត្រែងបាននិយាយថា សពសត្វផ្សោតឯកា ដែលនៅសល់ចុងក្រោយនៅអន្លង់ឈើទាល ត្រូវបានស្នើយកទៅរក្សាទុកនៅក្នុងសហគមន៍ បន្ទាប់ពីបានប្រទះឃើញងាប់អណ្តែតទឹកកាលពីថ្ងៃទី ១៥ ខែកុម្ភៈ។
សត្វផ្សោត ១ ក្បាលនេះ ឃើញមានរបួសបង្កជាដំបៅ ដោយសារតែកន្ទុយរបស់វាត្រូវបានរុំជាប់ដោយកំណាត់សរសៃមងអស់រយៈពេលជាង ១ ខែមកហើយ ដែលសត្វផ្សោតឯកា ១ ក្បាលនេះបានធ្លាក់ខ្លួនឈឺស្គមរីងរៃ។
សត្វផ្សោតឯកានេះដែលបានងាប់ចុងក្រោយក្នុងអន្លង់ឈើទាលនេះ គឺជាសត្វផ្សោតឈ្មោលមានអាយុជាង ២០ ឆ្នាំ និងមានទម្ងន់ ១១០ គីឡូក្រាមមាន ប្រវែងជាង ២ ម៉ែត្រ។ នេះបើតាមលោក ស្រី សំវិចិត្រ ប្រធានផ្នែកជលផលខេត្តស្ទឹងត្រែង។
លោក ស្រី សំវិចិត្រ បានប្រាប់ភ្នំពេញប៉ុស្តិ៍នៅថ្ងៃទី ១៦ កុម្ភៈថា ក្រោយប្រទះឃើញងាប់នៅក្រោមអន្លង់ឈើទាលប្រហែល ៣០០ ម៉ែត្រជំនាញបានពិនិត្យឃើញថា សត្វផ្សោតនេះបានងាប់ដោយសារតែមិនអាចទ្រាំទ្រនឹងស្នាមរបួសដែលជាប់មងបាន ព្រោះចាប់ពីមានរបួសនោះមក វាធ្លាក់ខ្លួនឈឺជាបន្តបន្ទាប់ ដែលធ្វើឱ្យវាពិបាកហែលទឹក ស្វែងរកចំណី។
បន្ថែមពីនេះ លោក ស្រី សំវិចិត្រ បានឱ្យដឹងទៀតថា ក្រោយផ្សោតនេះងាប់អាជ្ញាធរមូលដ្ឋាន ព្រមទាំងប្រជាសហគមន៍បានស្នើសុំរក្សាទុកសពសត្វផ្សោតនេះនៅនឹងមូលដ្ឋាន ដើម្បីតាំងបង្ហាញដល់ភ្ញៀវទេសចរ ដែលមកកម្សាន្តក្នុងសហគមន៍នេះ។
លោកបានបញ្ជាក់ថា៖ «ខាងអាជ្ញាធរ និងសហគមន៍គាត់ស្នើសុំទុកនៅនឹងមូលដ្ឋាន ដូច្នេះខាងរដ្ឋបាលជលផលខេត្តជាមួយអង្គការ WWF គឺគ្រាន់តែចុះទៅយកសំណាកមករក្សាទុក ហើយទុកសាកសពហ្នឹងនៅមូលដ្ឋានដើម្បីពួកគាត់ ទុកឆ្អឹងតាំងបង្ហាញដល់ភ្ញៀវទេសចរ ព្រោះវាជាផ្សោតចុងក្រោយ»។
ការបាត់បង់ផ្សោតក្នុងតំបន់អន្លង់ឈើទាលនោះបានកើតឡើងចាប់តាំងពីឆ្នាំ២០១៨ មក បន្ទាប់ពីមានការងាប់ជាបន្តបន្ទាប់ ដោយសារករណីជាប់មងប្រជានេសាទ ហើយការសិក្សាស្រាវជ្រាវក្នុងឆ្នាំ ២០១៨ រកឃើញសល់ត្រឹម ៣ ក្បាលប៉ុណ្ណោះ ខណៈនៅឆ្នាំ ២០២១ នៅសល់តែ ១ ក្បាល ដែលត្រូវងាប់ជាលើកចុងក្រោយ។ នេះបើតាមអាជ្ញាធរខេត្តស្ទឹងត្រែង។ យ៉ាងណាក្តី លោកស្រី សំវិចិត្រ បញ្ជាក់ថា ការបាត់បង់សត្វផ្សោតក្នុងអន្លង់ឈើទាល គឺមិនអាចនឹងស្វែងរកសត្វផ្សោតផ្សេងទៀតមកជំនួសកន្លែងនោះបានទេ ព្រោះថាការរស់នៅរបស់សត្វផ្សោតគឺខុសពីសត្វដទៃ ខណៈដែលទូទាំងខេត្តស្ទឹងត្រែង គឺនៅមានផ្សោតចន្លោះ ពី ២៩ ទៅ ៣២ ក្បាលទៀត ដែលកំពុងរស់នៅតាមអន្លង់មួយចំនួនក្នុងស្រុកសៀមបូក៕
