.jpg)
លោកនាយករដ្ឋមន្ត្រី ហ៊ុន សែន ថ្លែងសារក្នុងពិធីសម្ពោធស្ពាននៅក្រចេះ។ ហុង មិនា
ភ្នំពេញៈ លោកនាយករដ្ឋមន្ត្រី ហ៊ុន សែន ថ្លែងថា អាជ្ញាធររាជធានីខេត្តក៏ដូចជាអាជ្ញាធរមូលដ្ឋានទាំងអស់ចាំបាច់ត្រូវផ្តល់លទ្ធភាពឱ្យគណបក្សនយោបាយដែលចុះបញ្ជីដោយស្របច្បាប់ទទួលស្គាល់ដោយក្រសួងមហាផ្ទៃមានឱកាសដើម្បីធ្វើសកម្មភាព ទោះបីយុទ្ធនាការបោះឆ្នោតមិនទាន់មកដល់ ក៏ប៉ុន្តែគណបក្សនយោបាយនានាត្រូវការឱកាសជួបជុំសមាជិករបស់ពួកគេ និងមានលទ្ធភាពដើម្បីសុំការអនុញ្ញាតលើកស្លាកគណបក្ស។
ក្នុងពិធីសម្ពោធដាក់ឱ្យប្រើប្រាស់ស្ពាន ៧ កន្លែងស្ថិតនៅក្នុងខេត្តក្រចេះ និងព្រៃវែងនៅថ្ងៃទី១៦ ខែកុម្ភៈ លោកហ៊ុន សែន ថ្លែងថា មិនមែនមានតែគណបក្សកាន់អំណាចនោះទេដែលមានសិទ្ធិលើកស្លាកគណបក្សនោះ គណបក្សដទៃទៀតក៏មានសិទ្ធិលើកស្លាកគណបក្សដូចគណបក្សកាន់អំណាចដែរ។ កន្លែងទីធ្លាសាធារណៈដែលគណបក្សកាន់អំណាចអាចប្រជុំបានគណបក្សដទៃទៀតក៏អាចប្រជុំបានដូចគ្នាដែរ។
លោកថ្លែងថា៖ «អ៊ីចឹង ខ្ញុំសុំអំពាវនាវឱ្យអាជ្ញាធរគ្រប់លំដាប់ថ្នាក់បង្កលក្ខណសម្បត្តិឱ្យបណ្តាបក្សនយោបាយដែលនឹងត្រូវចូលរួមការបោះឆ្នោតនៅពេលខាងមុខនេះទទួលបាននូវឱកាសសម្រាប់ការជួបជុំ ការរៀបចំចុះទៅជួបប្រជាជនដែលជាសមាជិកសមាជិការបស់ពួកគេ ដោយគ្មានការរំខានណាមួយពីមូលដ្ឋាន ហើយយើងត្រូវខិតខំជួយការពារសុវត្ថិភាពនៃបណ្តាបក្សនយោបាយនេះឱ្យបានកុំឱ្យមានការបោះឆ្នោតមួយញាំញីដោយអំពើហិង្សារហូតទៅដល់មានមនុស្សគ្រោះថ្នាក់»។
លោកអះអាងថា ចាប់តាំងពីឆ្នាំ ២០០៣ មក កម្ពុជាហាក់ដូចជាមិនមានមនុស្សស្លាប់ ឬរបួសដោយសារការបោះឆ្នោតនោះទេ។
លោក ហ៊ុន សែន បានអំពាវនាវដល់គ្រប់អាជ្ញាធរនៅមូលដ្ឋានទាំងអស់នៃរាជធានី ខេត្តត្រូវធានាសេរីភាពនៃការជួបជុំសម្រាប់គណបក្សនយោបាយនានា ហើយគណបក្សនានាក៏ត្រូវតែគោរពនូវបែបបទដែលមានចែងនៅក្នុងច្បាប់ជាធរមាន និងបទបញ្ជារបស់គណៈកម្មាធិការជាតិរៀបចំការបោះឆ្នោត (គ.ជ.ប)។ ការ ធ្វើបែបនេះគឺវាអាចដំណើរទៅមុខនៅក្នុងការបើកលម្ហប្រជាធិបតេយ្យនៅក្នុងប្រទេសកម្ពុជាព្រោះគណបក្សថ្មីៗជាច្រើនត្រូវបង្កើត ហើយគណបក្សខ្លះក៏កំពុងត្រៀមរៀបចំដើម្បីបង្កើតសម្ព័ន្ធភាពបក្ស។
លោកថ្លែងថា៖ «ការអំពាវនាវរបស់នាយករដ្ឋមន្ត្រីវាដូចជាបទបញ្ជាមួយដែរព្រោះតាដល់មានរឿងអីទៅ គេជេរ ជេរពីណា ជេរនាយករដ្ឋមន្ត្រីដដែល។ អ៊ីចឹងនាយករដ្ឋមន្ត្រីអំពាវនាវ ក៏ដូចជាដាក់ចេញនូវបទបញ្ជា បង្កលក្ខណៈឱ្យបណ្តាបក្សនយោបាយមានសេរីភាពក្នុងការធ្វើសកម្មភាព ប៉ុន្តែត្រូវចាំឱ្យច្បាស់ណាគណបក្សនយោបាយដែលទទួលស្គាល់តាមផ្លូវច្បាប់ មានចុះបញ្ជីទទួលស្គាល់ដោយក្រសួងមហាផ្ទៃ»។
លោក កន សាវាង្ស អ្នកសម្របសម្រួលផ្នែកអង្កេត និងតស៊ូមតិនៃគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជាហៅថា Comfrel ប្រាប់ភ្នំពេញប៉ុស្តិ៍នាថ្ងៃទី ១៦ ខែកុម្ភៈ ថា សារលោក ហ៊ុន សែន នេះគឺជាចំណុចល្អមួយ ប៉ុន្តែការអនុវត្តបានល្អគឺទាល់តែពង្រឹងការតាមដាន និងការឃ្លាំមើល ពីព្រោះការងារទាំងអស់នេះគឺមាននៅក្នុងច្បាប់បទបញ្ជានីតិវិធីរួចអស់ហើយ។ អាជ្ញាធរមូលដ្ឋានគឺដឹងរួចអស់ហើយអំពីការទទួលខុសត្រូវរបស់ខ្លួនថាត្រូវធ្វើអ្វីនោះគឺមិនចាំបាច់មានបទបញ្ជា ឬក៏ការលើកឡើងរបស់ថ្នាក់ដឹកនាំនោះទេ។
គួរបញ្ជាក់ថាកម្ពុជានឹងធ្វើការបោះឆ្នោតជ្រើសរើសក្រុមប្រឹក្សាឃុំសង្កាត់នៅថ្ងៃទី ៥ ខែមិថុនា។
ថ្មីៗនេះ គ.ជ.ប បានប្រកាសថា អ្នកដែលមានឈ្មោះក្នុងបញ្ជីបោះឆ្នោតគឺមានចំនួនជាង ៩ លាននាក់ ខណៈការិយាល័យបោះឆ្នោតមានចំនួនជាង ២ ម៉ឺនការិយាល័យ៕
វីដេអូ៖
