ភ្នំពេញៈ កម្ពុជា និងសិង្ហបុរី បញ្ជាក់ជំហរជាថ្មីក្នុងការពង្រីកទំនាក់ទំនងដ៏យូរអង្វែងនៃប្រទេសទាំង ២ ខណៈភាគីទាំង ២ ឯកភាពគ្នាជំរុញឱ្យអាជ្ញាធរយោធាមីយ៉ាន់ម៉ា អនុវត្តកិច្ចព្រមព្រៀងជាឯកច្ឆន្ទ ៥ ចំណុចរបស់អាស៊ានឱ្យបានពេញលេញ និងឆាប់រហ័ស។
ការប្រកាសជំហរបែបនេះធ្វើឡើងក្នុងជំនួបរវាងលោកនាយករដ្ឋមន្ត្រី ហ៊ុន សែន និងលោក វីវៀន បាឡាគ្រីស្សណាន់ (Vivian Balakrishnan) រដ្ឋមន្ត្រីក្រសួងការបរទេសសិង្ហបុរីនាថ្ងៃទី ១៦ ខែកុម្ភៈ នៅវិមានសន្តិភាព។
លោក វីវៀន បានសរសេរនៅលើ Twitter ក្រោយជំនួបនេះថា «យើងបានបញ្ជាក់ឡើងវិញនូវទំនាក់ទំនងដ៏យូរអង្វែងរបស់ប្រទេសសិង្ហបុរី និងកម្ពុជា។ ខ្ញុំសូមអបអរសាទរសម្តេច ហ៊ុន សែន ដែលទទួលជោគជ័យក្នុងការគ្រប់គ្រងជំងឺកូវីដ ១៩ របស់កម្ពុជាក្នុងរយៈពេល ២ ឆ្នាំកន្លងទៅ»។
លោកបានសរសេរបន្តថា៖ «សម្តេចនាយករដ្ឋមន្ត្រី ហ៊ុន សែន និងខ្ញុំបានឯកភាពគ្នាថា ការរៀបចំសម្រាប់ប្រទេសមីយ៉ាន់ម៉ាក្នុងការធ្វើជាតំណាងក្នុងកម្រិតមិននយោបាយនៅកិច្ចប្រជុំអាស៊ាននៅតែបន្ត។ អាជ្ញាធរយោធាមីយ៉ាន់ម៉ាចាំបាច់ត្រូវអនុវត្តឱ្យបានឆាប់រហ័ស និងពេញលេញនូវកិច្ចព្រមព្រៀងជាឯកច្ឆន្ទ ៥ ចំណុចរបស់អាស៊ាន។ របៀបវារៈពេញលេញរបស់អាស៊ានមិនត្រូវបានធ្វើជាចំណាប់ខ្មាំងដោយស្ថានភាពនៅក្នុងប្រទេសមីយ៉ាន់ម៉ានោះទេ»។
ហ្វេសប៊ុកលោក ហ៊ុន សែន បញ្ជាក់នាថ្ងៃទី ១៦ ខែកុម្ភៈ ថា សិង្ហបុរី បន្តគាំទ្រ និងជំរុញពង្រឹងពង្រីកកិច្ចសហប្រតិបត្តិការ ជាពិសេសទ្វេភាគីរវាងប្រទេសទាំង ២ និងគាំទ្រកម្ពុជាជាប្រធានអាស៊ាន។ ហ្វេសប៊ុកដដែលបញ្ជាក់ថា៖ «សម្ដេចតេជោបានលើកទឹកចិត្តឱ្យមានការជំរុញ ការវិនិយោគមកកម្ពុជាកាន់តែច្រើន ជំរុញការធ្វើពាណិជ្ជកម្មរវាងប្រទេសទាំង ២ ឱ្យកាន់តែធំ និងពិនិត្យមើលលើកិច្ចសហប្រតិបត្តិការលើវិស័យអប់រំ លើវិស័យសុខាភិបាល និងវិស័យដទៃទៀតដែលអាចធ្វើទៅបាន»។
ហ្វេសប៊ុកលោកនាយករដ្ឋមន្ត្រី បន្តថា លោក វីវៀន ក៏បានអបអរសាទរចំពោះលោក ហ៊ុន សែន ផងដែរ ដែលបានទទួលនូវជោគជ័យ «យ៉ាងត្រចះត្រចង់» នៅក្នុងការទប់ស្កាត់ការរីករាលដាលជំងឺកូវីដ ១៩ ដោយកម្ពុជាបានចាក់វ៉ាក់សាំងជូនប្រជាជនបានច្រើនជាងគេ នៅក្នុងតំបន់ច្រើនជាងប្រទេសអភិវឌ្ឍន៍មួយចំនួន ហើយអត្រាស្លាប់ក៏មានទាបជាងគេដែរ។
ហ្វេសប៊ុកដដែលលើកឡើងថា នេះគឺជាកត្តាដែលអនុញ្ញាតឱ្យកម្ពុជាអាចបើកប្រទេសឡើងវិញបានយ៉ាងឆាប់រហ័ស ហើយអ្នកវិនិយោគសិង្ហបុរីក៏មានចំណាប់អារម្មណ៍មកវិនិយោគនៅក្នុងប្រទេសកម្ពុជាដែរ ជាពិសេសនៅលើវិស័យពាណិជ្ជកម្មលើវិស័យឃ្លាំងស្តុកទំនិញត្រជាក់ ក៏ដូចជាវិស័យដឹកជញ្ជូនផងដែរ។ លោក ហ៊ុន សែន អរគុណដល់ប្រទេសសិង្ហបុរី ដែលបានគាំទ្រកម្ពុជាជាប្រធានអាស៊ាន ហើយចាត់ទុកកម្ពុជាជាតំបន់សុវត្ថិភាពក្នុងការបើកការហោះហើរឡើងវិញ។
លោក ហ៊ុន សែន ក៏បានប្រាប់លោក វីវៀន អំពីគោលបំណងរបស់លោក ក្នុងការធ្វើដំណើរទៅប្រទេសមីយ៉ាន់ម៉ាកាលពីដើមខែមករា គឺធ្វើយ៉ាងណាកាត់បន្ថយ ឬលុបបំបាត់អំពើហិង្សាតាមរយៈការឈប់បាញ់គ្នារកវិធីផ្ដល់ជំនួយមនុស្សធម៌ជូនដល់ប្រជាជនមីយ៉ាន់ម៉ាដោយគ្មានការរើសអើង និងបង្កើតនូវការសន្ទនា។
បើតាមហ្វេសប៊ុកដដែលលោក វីវៀន បានអបអរសាទរចំពោះលោក ហ៊ុន សែន ដែលបានទទួលពានរង្វាន់សន្តិភាព ស៊ុនហាក់ដោយលើកឡើងថា នេះជាការទទួលស្គាល់ មិនត្រឹមតែនៅក្នុងប្រទេសកម្ពុជា ឬនៅក្នុងតំបន់ទេគឺទូទាំងពិភពលោក ។
គួរបញ្ជាក់ថា កាលពីថ្ងៃទី ១២ ខែកុម្ភៈ អង្គការ UPF បានប្រគល់ពានរង្វាន់សន្តិភាពស៊ុនហាក់ដល់លោក ហ៊ុន សែន ដែលជាពានរង្វាន់អន្តរជាតិសម្រាប់បុគ្គលដែលបានធ្វើពលិកម្មអាយុជីវិត ដើម្បីបុព្វហេតុសន្តិភាព និងបានបំផុសគំនិតមនុស្សជាតិឱ្យស្វែងរកសន្តិភាពពិភពលោក។ អង្គការ UPF បានទទួលស្គាល់លោក ហ៊ុន សែន ចំពោះកិច្ចខិតខំប្រឹងប្រែងអស់មួយជីវិត និងសមិទ្ធផល ក្នុងការបញ្ចប់សង្គ្រាមស៊ីវិល ដែលអូសបន្លាយអស់ជាច្រើនទសវត្សរ៍ និងការបង្កើតសន្តិភាពពេញលេញនៅកម្ពុជា។
លោក វីវៀន មកបំពេញទស្សនកិច្ច និងមកចូលរួមកិច្ចប្រជុំចង្អៀតរដ្ឋមន្ត្រីការបរទេសអាស៊ាននៅកម្ពុជារយៈពេល ៣ ថ្ងៃចាប់ពីថ្ងៃទី ១៥ ដល់ទី ១៧ កុម្ភៈដើម្បីពង្រឹងបន្ថែមទៀតនូវទំនាក់ទំនងកម្ពុជា-សិង្ហបុរី។
ក្រសួងការបរទេសកម្ពុជាបញ្ជាក់ថា ដំណើរទស្សនកិច្ចរបស់លោក វីវៀន មកកាន់កម្ពុជានឹងពង្រឹង និងធ្វើឱ្យស៊ីជម្រៅបន្ថែមទៀតនូវទំនាក់ទំនង និងកិច្ចសហប្រតិបត្តិការជិតស្និទ្ធរវាងកម្ពុជា និងសិង្ហបុរី ដើម្បីផលប្រយោជន៍រួមរបស់ប្រទេសទាំង ២៕