ភ្នំពេញៈ សហភាពអឺរ៉ុបប្រចាំកម្ពុជានឹងបើកកិច្ចប្រជុំពិភាក្សាជាមួយនឹងគណបក្សនយោបាយនានានៅថ្ងៃទី ២៣ ខែកុម្ភៈ ឆ្នាំ ២០២២ ដើម្បីពិភាក្សាពីកិច្ចការងារបោះឆ្នោត ជ្រើសរើសក្រុមប្រឹក្សាឃុំ សង្កាត់អាណត្តិទី ៥ ដែលនឹងប្រព្រឹត្តទៅនៅថ្ងៃទី ៥ ខែមិថុនា ឆ្នាំ ២០២២។
យោងតាមលិខិតរបស់សហភាពអឺរ៉ុបដែលបានបញ្ជូនទៅកាន់គណបក្សនយោបាយ ដែលភ្នំពេញប៉ុស្តិ៍ទទួលបាននៅថ្ងៃទី ១៧ ខែកុម្ភៈបានសរសេរថា ជាមួយនឹងការបោះឆ្នោតខិតជិតមកដល់ក្រុមប្រឹក្សានយោបាយនៃសហភាពអឺរ៉ុប និងស្ថានទូតនៃរដ្ឋសមាជិកសហគមន៍-អឺរ៉ុបប្រចាំនៅកម្ពុជាមានបារាំង អាល្លឺម៉ង់ ស៊ុយអ៊ែត និងសាធារណរដ្ឋឆែក នឹងមានកិច្ចប្រជុំជាមួយគណបក្សនយោបាយ ដើម្បីពិភាក្សា និងស្វែងយល់ផែនការគណបក្ស សម្រាប់ការបោះឆ្នោតនៅពេលខាងមុខ។ លិខិតនេះបញ្ជាក់ថា កិច្ចប្រជុំពិភាក្សានេះនឹងរៀបចំធ្វើនៅថ្ងៃទី ២៣ ខែកុម្ភៈ ឆ្នាំ ២០២២ នៅទីស្នាក់ការសហភាពអឺរ៉ុប។
លោក ញឿន រ៉ាដែន អ្នកនាំពាក្យគណបក្សហ៊្វុនស៊ិនប៉ិច ប្រាប់ភ្នំពេញប៉ុស្តិ៍នៅថ្ងៃទី ១៧ ខែកុម្ភៈថា គណបក្សហ៊្វុនស៊ិនប៉ិច ក្រោមការដឹកនាំរបស់ព្រះអង្គម្ចាស់នរោត្តម ចក្រាវុធ បានចាត់បញ្ជូន ព្រះអង្គម្ចាស់ក្សត្រី នរោត្តម រតនាទេវី គណៈកម្មការនាយកធ្វើជាតំណាងពិសេសនៃគណបក្សហ៊្វុនស៊ិនប៉ិច ដើម្បីចូលរួមប្រជុំពិភាក្សាអំពីដំណើរការនៃការបោះឆ្នោតជាមួយសហភាពអឺរ៉ុប។
លោកបន្តថា ព្រះអង្គម្ចាស់នរោត្តម ចក្រាវុធ មិនអាចចូលរួមកិច្ចប្រជុំនេះ ព្រោះព្រះអង្គម្ចាស់មានភារកិច្ចមមាញឹកក្នុងការចុះតាមមូលដ្ឋាន នៅតាមបណ្តាខេត្តមួយចំនួននៅទូទាំងប្រទេស។
លោកថ្លែងថា៖ «ជាក់ស្តែងក្នុងមួយរយៈពេលនេះ និងចាប់ពីថ្ងៃទី ២២ តទៅ ព្រះអង្គម្ចាស់ចក្រាវុធនឹងយាងចុះទៅកាន់ខេត្តស្ទឹងត្រែង ក្រចេះ មណ្ឌលគិរីជាដើម។ អ៊ីចឹងទេ ព្រះអង្គម្ចាស់បានចាត់ព្រះអង្គម្ចាស់ក្សត្រី រតនាទេវី ឱ្យចូលរួមកិច្ចប្រជុំដ៏មានសារៈសំខាន់នេះ»។
លោក អ៊ូ ច័ន្ទរ័ត្ន ស្ថាបនិកគណបក្សកែទម្រង់កម្ពុជាប្រាប់ភ្នំពេញប៉ុស្តិ៍នៅថ្ងៃទី ១៧ កុម្ភៈថា លោកមិនទាន់ទទួលលិខិតអញ្ជើញពីសហភាពអឺរ៉ុបនៅឡើយទេ ប៉ុន្តែនៅពេលដែលទទួលលិខិតអញ្ជើញលោកនឹងចាត់ចែងឱ្យអ្នកទទួលបន្ទុកកិច្ចការបោះឆ្នោតទៅចូលរួមកិច្ចប្រជុំនេះ។
លោកយល់ឃើញថា សហភាពអឺរ៉ុប មានគោលជំហរ គឺប្រឹងប្រែងយ៉ាងខ្លាំងក្នុងការពង្រឹងលទ្ធិប្រជាធិបតេយ្យនៅក្នុងប្រទេសកម្ពុជា ចាប់តាំងពីការចាប់ផ្តើមរំលាយគណបក្សសង្គ្រោះជាតិ ដោយចុងក្រោយនេះ សហភាពអឺរ៉ុបបានជំរុញលទ្ធិប្រជាធិបតេយ្យតាមរយៈការបោះឆ្នោត ដែលមានការចូលរួមពីអតីតអ្នកប្រឆាំង។
លោកថ្លែងថា៖ «បញ្ហានេះ យើងឃើញថា សហភាពអឺរ៉ុបប្រឹងប្រែងដើម្បីឱ្យមានលទ្ធិប្រជាធិបតេយ្យ តាមរយៈការបោះឆ្នោត ប៉ុន្តែអ្វីដែលគេរំពឹងចង់បាន គឺបោះឆ្នោត សេរី និងយុត្តិធម៌ និងសមធម៌ រវាងដៃគូប្រកួត ព្រោះគណបក្សកាន់អំណាច គេមានអ្វីៗគ្រប់អស់ហើយ ប្រកួតប្រជែងជាមួយគណបក្សដែលទើបបង្កើត និងគណបក្សដែលកើតមកយូរ ក៏មិនទាន់រឹងដៃ រឹងជើងទៀត»។
លោក សុខ ឥសាន អ្នកនាំពាក្យគណបក្សប្រជាជនកម្ពុជាថ្លែងថា លោកក៏ដូចជាគណបក្សមិនទាន់ទទួលបានព័ត៌មានពីកិច្ចប្រជុំរវាងគណបក្ស និងសហភាពអឺរ៉ុបទេ។
ជាមួយគ្នានេះ លោក ពេជ្រ ស្រស់ ប្រធានគណបក្សយុវជនកម្ពុជាក៏មិនទទួលបានលិខិតអញ្ជើញរបស់សហភាព-អឺរ៉ុបផងដែរ។ លោកបន្តថា នៅពេលដែលមានការអញ្ជើញលោកនឹងពិនិត្យមើលខ្លឹមសារនៃកិច្ចប្រជុំជាមុនសិន៕