.jpg)
ជនសង្ស័យត្រូវបានឃាត់ខ្លួនក្នុងការបង្ក្រាបខារ៉ាអូខេ នៅខេត្តបាត់ដំបង។ រូប ប៉ូលិស
បាត់ដំបងៈ នគរបាលប្រឆាំងបទល្មើសគ្រឿងញៀនខេត្តបាត់ដំបង កសាងសំណុំរឿងបញ្ជូនមនុស្ស ១១ នាក់ ដែលក្នុងនោះមានស្រី ១ នាក់ទៅសាលាដំបូងខេត្ត នៅថ្ងៃទី ១៧ កុម្ភៈ បន្ទាប់ពីចាប់ខ្លួនបាន ១ ថ្ងៃក្នុងការបង្ក្រាបក្លិបខារ៉ាអូខេមួយកន្លែង ដែលរកឃើញមានគ្រឿងញៀននៅភូមិរំចេក ៤ នៃសង្កាត់រតនៈ ក្រុង-ខេត្ត-បាត់ដំបង។
លោក សុខ និមល នាយការិយាល័យប្រឆាំងបទល្មើសគ្រឿងញៀននៃស្នងការដ្ឋាននគរបាល ខេត្តបាត់ដំបងប្រាប់ភ្នំពេញប៉ុស្តិ៍នៅថ្ងៃទី ១៧ ខែកុម្ភៈ ថា ករណីជនសង្ស័យទាំង ១១ នាក់ ដែលស្នងការដ្ឋាននគរបាលខេត្តឃាត់ខ្លួននោះត្រូវបានសមត្ថកិច្ចរបស់លោកបញ្ជូនទៅសាលាដំបូងខេត្តហើយនៅថ្ងៃទី ១៧ កុម្ភៈ។
លោកបានបញ្ជាក់ថា៖ «ជនសង្ស័យមានប្រុស មានស្រីចំនួន ១១ នាក់ត្រូវបានលោកស្នងការកសាងសំណុំរឿងបញ្ជូន ពួកគេទៅតុលាការនៅថ្ងៃនេះ (ថ្ងៃទី ១៧ កុម្ភៈ)។ ចំពោះថាអ្នកណាជាប់ពាក់ព័ន្ធបទល្មើសអ្វីនោះខ្ញុំមិនដឹងទេ»។
ទំព័រហ្វេសប៊ុករបស់ស្នងការដ្ឋាននគរបាលខេត្តបាត់ដំបង ដែលបានបង្ហោះនៅថ្ងៃទី ១៦ កុម្ភៈ បានសរសេរថា កាលពីរំលងអធ្រាត្រឈានចូលថ្ងៃទី ១៦ ខែកុម្ភៈ ឆ្នាំ ២០២២ សមត្ថកិច្ចប្រឆាំងគ្រឿងញៀនខេត្តបានចុះបង្ក្រាបទីតាំងខារ៉ាអូខេមួយកន្លែង យីហោ ឈ្មោះហាយក្លាស (High Class) ស្ថិតនៅភូមិរំចេក ៤ សង្កាត់រតនៈ ក្រុងបាត់ដំបង ខេត្តបាត់ដំបង។
ទំព័រហ្វេសប៊ុកនគរបាលខេត្តបាត់ដំបងបន្តថា ការបង្ក្រាបនេះមានការដឹកនាំពីលោកឧត្តមសេនីយ៍ទោ សាត គឹមសាន ស្នងការនគរបាលខេត្ត និងមានការសម្របសម្រួលនីតិវិធីពីលោក កែវ សុជាតិ ព្រះរាជអាជ្ញានៃអយ្យការអមសាលាដំបូង ខេត្តបាត់ដំបងផងដែរ។
ក្នុងកិច្ចប្រតិបត្តិការបង្ក្រាបនេះ សមត្ថកិច្ចនគរបាលដកហូតបានថ្នាំញៀនប្រភេទកេតាមីន (KETAMINE) ចំនួន ២ ថង់ ទម្ងន់ ១,៤០ ក្រាម (ទាំងសម្បក) ថ្នាំញៀនប្រភេទអ៊ិចស្តាស៊ី (MDMA) ចំនួន ២ គ្រាប់ និង ២ កំណាត់ ទម្ងន់ ០,៨៨ ក្រាម ប្រាក់ដុល្លារចំនួន ២ ៤៥០ ដុល្លារអាមេរិក (ពីរពាន់បួនរយហាសិបដុល្លារ) ប្រាក់រៀលចំនួន ៦ លាន និង ១០ ម៉ឺនរៀល។ បន្ទាប់មកសមត្ថកិច្ចនគរបាលបានស្រាវជ្រាវចាប់ខ្លួនជនសង្ស័យចំនួន ១១ នាក់ (ស្រី ១ នាក់)។
ពាក់ព័ន្ធការចោទប្រកាន់ពីតំណាងអយ្យការយ៉ាងណានោះនៅថ្ងៃទី ១៧ កុម្ភៈ ភ្នំពេញប៉ុស្តិ៍បានទូរស័ព្ទទាក់ទងលោក ដួង សាវ៉ន អ្នកនាំពាក្យអយ្យការអមសាលាដំបូងខេត្តបាត់ដំបង ដើម្បីសុំការបញ្ជាក់ដែរ តែទូរស័ព្ទរបស់លោកគ្មានអ្នកទទួល។
បើតាមហ្វេសប៊ុកដដែលបង្ហាញកាលពីដើមខែមករា ឆ្នាំ ២០២២ ការិយាល័យប្រឆាំងបទល្មើសគ្រឿងញៀនក៏បានបង្ក្រាបទីតាំងខារ៉ាអូខេមួយកន្លែងទៀតដែរនៅស្រុកកំរៀង ខេត្តបាត់ដំបង។ ក្នុងការបង្ក្រាបនោះ សមត្ថកិច្ចនគរបាលឃាត់ខ្លួនជនសង្ស័យ ប្រុស-ស្រីបានចំនួន ១៥ នាក់ និងដកហូតបានថ្នាំញៀនប្រភេទកេតាមីន (KETAMINE) ចំនួន ១ ថង់ ទម្ងន់ ០,៨៩ ក្រាម (ទាំងសម្បក) ទូរស័ព្ទដៃចំនួន ៩ គ្រឿង ព្រមទាំងសម្ភារសម្រាប់ប្រើប្រាស់ថ្នាំញៀនមួយចំនួនទៀត៕
