.jpg)
សត្វច្រើនប្រភេទដែលត្រូវបានរកឃើញនៅទំរីងខេត្តកំពង់ធំ។ រូបថត ក្រសួងបរិស្ថាន
ភ្នំពេញៈ គម្រោងរេដបូកទំរីង សហការជាមួយក្រុមអ្នកស្រាវជ្រាវនៃនាយកដ្ឋានសត្វព្រៃ និងជីវចម្រុះនៃរដ្ឋបាលព្រៃឈើកាលពីពេលថ្មីៗកន្លងទៅនេះ បានធ្វើការសិក្សាស្រាវជ្រាវវត្តមានសត្វល្មូននៅក្នុងតំបន់គម្រោងទាំងមូល ដោយរកឃើញសត្វល្មូនចំនួន ៤៩ ប្រភេទ។ នេះបើតាមហ្វេសប៊ុករបស់គម្រោងរេដបូកទំរីងនៅថ្ងៃទី ១៧ ខែកុម្ភៈ។
គម្រោងរេដបូកទំរីង បានសរសេរនៅលើហ្វេសប៊ុកនាថ្ងៃទី ១៧ កុម្ភៈថា ក្នុងពេលថ្មីៗកន្លងទៅនេះ គម្រោងបានសហការជាមួយក្រុមអ្នកស្រាវជ្រាវនៃនាយកដ្ឋានសត្វព្រៃ និងជីវចម្រុះនៃរដ្ឋបាលព្រៃឈើ បានធ្វើការសិក្សាពីវត្តមានសត្វល្មូននៅក្នុងតំបន់គម្រោងទាំងមូល រកឃើញសត្វល្មូនចំនួន ៤៩ ប្រភេទ។
គម្រោងរេដបូកបញ្ជាក់ថា៖ «ម្យ៉ាងទៀត ការសិក្សានេះក៏ជាផ្នែកមួយនៃការរៀបចំសម្រាប់ការផ្ទៀងផ្ទាត់ឥណទានកាបូនលើកទី ២ (Second Verification) របស់គម្រោងផងដែរ»។
លោក គ្រី ម៉ះផល ប្រធាននាយកដ្ឋានសត្វព្រៃ និងជីវចម្រុះនៃរដ្ឋបាលព្រៃឈើ ថ្លែងនៅថ្ងៃទី ១៧ ខែកុម្ភៈ ថា គោលបំណងនៃការសិក្សាស្រាវជ្រាវប្រភេទសត្វល្មូន នៅក្នុងដែនគម្រោងរេដបូកទំរីងនេះ គឺដើម្បីដឹងថា នៅតំបន់នោះមានប្រភេទសត្វអ្វីខ្លះ និងមានចំនួនប៉ុន្មាន។ ព្រោះកាលណាអនុវត្តគម្រោងរេដបូក គឺមិនត្រឹមតែធ្វើការការពារដើមឈើ ដើម្បីស្រូបយកឧស្ម័នកាបូនិកនោះទេ គឺត្រូវដឹងពីជីវចម្រុះក្នុងតំបន់នោះថែមទៀតផង។
លោកប្រធាននាយកដ្ឋានប្រាប់ថា នេះគឺជាការសិក្សាស្រាវជ្រាវលើកដំបូង ដែលចាប់ផ្តើម និងបញ្ចប់ក្នុងខែធ្នូ ឆ្នាំ ២០២១ ដែលអាចចាត់ទុកបានថា ជាចុងរដូវប្រាំង។ លោកបញ្ជាក់ថា ក្រុមការងារស្រាវជ្រាវនឹងចាប់ផ្តើមធ្វើការសិក្សាស្រាវជ្រាវម្តងទៀតនៅដើមរដូវវស្សា ឆ្នាំ ២០២២ នេះ ក្នុងអំឡុងខែមិថុនា ដើម្បីយកចំនួនសត្វទៅប្រៀបគ្នា។
លោកថ្លែងថា៖ «យើងនឹងយកទិន្នន័យ ២ ហ្នឹងមកប្រៀបធៀបគ្នា ថាតើចំនួនសត្វហ្នឹង វាអាចកើនឡើងជាងមុន ឬមានការថយចុះជាងមុន ហើយបានយើងស្វែងរករបកគំហើញថា ហេតុអ្វីបានកើនឡើង ហេតុអីបានថយចុះ»។
លោក គ្រី ម៉ះផល ឱ្យដឹងថា ការចុះទៅសិក្សាស្រាវជ្រាវនេះ ក្រុមការងារបានបែងចែកជា ៣ ក្រុមដែលក្នុង ១ ក្រុមមានគ្នាចន្លោះពី ៥-៧ នាក់ មានរយៈពេលបំពេញការងារ ១០ ថ្ងៃ ធ្វើការស្រាវជ្រាវរកថនិកសត្វប្រភេទតូច ថនិកសត្វថ្នាក់ធំ ឧរង្គសត្វ និងថលជលិកសត្វក្នុងនោះក៏មានការដាក់ម៉ាស៊ីនថតស្វ័យប្រវត្តិចំនួន ១៤ គ្រឿង ដោយថតបានសត្វមួយចំនួនផងដែរ។
លោកប្រធាននាយកដ្ឋានបញ្ជាក់ថា តាមរយៈការសិក្សាស្រាវជ្រាវនេះអាចនឹងឈានដល់មានការបោះពុម្ពជាលក្ខណៈទស្សនាវដ្តីអន្តរជាតិ ឬក៏អាចចុះក្នុងសារព័ត៌មាន ដើម្បីផ្សព្វផ្សាយដល់ប្រជាពលរដ្ឋ និងទុកជាឯកសារសម្រាប់ស្រាវជ្រាវបន្តទៀត៕
