ភ្នំពេញៈ អតីតអង្គរក្សលោក ថោង សារ៉ាត់ ម្នាក់ត្រូវបានតុលាការកំពូលប្រកាសសាលដីកានៅថ្ងៃទី ១៧ កុម្ភៈសម្រេចតម្កល់ទោសជាប់ពន្ធនាគារ ១ ជីវិតដដែល បន្ទាប់ពីបានបើកសវនាការជំនុំជម្រះកាលពីថ្ងៃទី ២៦ មករា ជាប់ចោទបាញ់សម្លាប់លោក ឧកញ៉ា អ៊ឹង ម៉េងជឺ នៅរាជធានីភ្នំពេញ កាលពីឆ្នាំ ២០១៤។
ក្នុងបន្ទប់សវនាការនៅថ្ងៃទី ១៧ កុម្ភៈ ខណៈអវត្តមានទាំងមេធាវី និងជនជាប់ចោទ លោកចៅក្រម យូរ ឧត្តរា បានអានសាលដីកាថា ជនជាប់ចោទក្នុងសំណុំរឿងនេះឈ្មោះ សៀង វាសនា អាយុ ៥២ ឆ្នាំជាប់ចោទបទសមគំនិតក្នុងអំពើឃាតកម្មគិតទុកជាមុន ហើយត្រូវបានតុលាការផ្តន្ទាទោសដាក់ពន្ធនាគារ ១ ជីវិត។
លោកបន្តថា កាលពីថ្ងៃជំនុំជម្រះថ្ងៃទី ២៦ មករា ជនជាប់ចោទបាននិយាយប្រាប់តុលាការថា ពាក់ព័ន្ធការបាញ់សម្លាប់លោកឧកញ៉ា អ៊ឹង ម៉េងជឺ គឺជនជាប់ចោទថា មិនបានសម្លាប់ជនរងគ្រោះទេ។ ចំពោះចម្លើយដែលជនជាប់ចោទឆ្លើយនៅនគរបាលយុត្តិធម៌គឺគាត់បានឆ្លើយសារភាពមែនព្រោះកាលនោះនគរបាលបានធ្វើទារុណកម្មគាត់។ ប៉ុន្តែនៅតុលាការកំពូលជនជាប់ចោទបានឆ្លើយបដិសេធថា គាត់មិនបានបាញ់សម្លាប់ជនរងគ្រោះទេ។ ទោះយ៉ាងណាការឆ្លើយបដិសេធនេះគឺគ្រាន់តែជាការដោះសារបស់ជនជាប់ចោទប៉ុណ្ណោះ។ ព្រោះថា ជនជាប់ចោទបានឆ្លើយនៅមុខចៅក្រមស៊ើបសួរកាលពីនៅសាលាដំបូងរាជធានីភ្នំពេញថា ខ្លួនព្រមទទួលយកនូវចម្លើយដែលបានឆ្លើយនៅដំណាក់កាលនគរបាលយុត្តិធម៌។
លោកបន្តទៀតថា កាលពីជំនុំជម្រះនៅសាលាឧទ្ធរណ៍ភ្នំពេញ ជនជាប់ចោទក៏បានឆ្លើយប្រាប់ចៅក្រមដែរថា គាត់ទទួលយកនូវចម្លើយរបស់ខ្លួនកាលពីឆ្លើយនៅដំណាក់កាលនគរបាលយុត្តិធម៌ដដែល។ រីឯមេធាវីការពារសិទ្ធិឱ្យដើមបណ្តឹងរដ្ឋប្បវេណីឈ្មោះ តាំង គឹមឆេង (ប្រពន្ធលោក អ៊ឹង ម៉េងជឺ) ដែលជាមេធាវីការពារសិទ្ធិឱ្យជនជាប់ចោទ សៀង វាសនា ដែរនោះក៏បានលើកឡើងកាលពីថ្ងៃជំនុំជម្រះនៅតុលាការកំពូលដែរថា កូនក្តីរបស់លោកមិនសុខចិត្តនឹងការដោះលែងលោក ថោង សារ៉ាត់ រួមមនុស្ស ៤ នាក់ទៀតនោះទេ និងទាមទារឱ្យតុលាការកោះហៅមកផ្តន្ទាទោសឡើងវិញ។
លោកចៅក្រម យូរ ឧត្តរា ថ្លែងថា៖ «បញ្ហានេះតុលាការកំពូលមិនអាចពិចារណាបានឡើយព្រោះទាំងអគ្គព្រះរាជអាជ្ញាសាលាឧទ្ធរណ៍ភ្នំពេញទាំងអគ្គព្រះរាជអាជ្ញាតុលាការកំពូលមិនបានប្តឹងសារទុក្ខទេ។ ហេតុដូច្នេះតុលាការកំពូលសម្រេចតម្កល់សាលដីការបស់សាលាឧទ្ធរណ៍ភ្នំពេញទុក្ខជាបានការដដែល»។
តាមអង្គហេតុរបស់តុលាការកំពូលបង្ហាញថា កាលពីវេលាម៉ោងជាង ៧ យប់ថ្ងៃទី ២២ វិច្ឆិកា ឆ្នាំ ២០១៤ មានករណីបាញ់សម្លាប់លោកឧកញ៉ា អ៊ឹង ម៉េងជឺ ស្ថិតនៅមុខហាងលក់ផ្លែឈើមួយកន្លែងក្បែរផ្សារអូឡាំពិកក្នុងភូមិសាស្ត្រសង្កាត់ទួលស្វាយព្រៃទី ២ ខណ្ឌចំការមន។ ក្រោយហេតុការណ៍សមត្ថកិច្ចបានស្រាវជ្រាវរហូតឃាត់ខ្លួនមនុស្សចំនួន ៦ នាក់ មានលោក ថោង សារ៉ាត់ និងអង្គរក្សចំនួន ៥ នាក់ទៀត ឈ្មោះ សៀង វាសនា មាស សម្បត្តិ, ឈុន ចិត្រា លី សៅ និងឈ្មោះ កូយ ចាន់ថុល។
សំណុំរឿងនេះត្រូវបានសាលាដំបូងរាជធានីភ្នំពេញប្រកាសសាលក្រមនៅថ្ងៃទី ២៦ ខែឧសភា ឆ្នាំ ២០១៥ សម្រេចផ្តន្ទាទោសដាក់ពន្ធនាគារម្នាក់ៗអស់ ១ ជីវិតដោយចោទប្រកាន់លោក ថោង សារ៉ាត់ ពីបទផ្តើមគំនិតក្នុងឃាតកម្មគិតទុកមុន។
ចំណែកឯអង្គរក្សរបស់គាត់ ៥ នាក់ទៀត ចោទបទសមគំនិតក្នុងអំពើឃាតកម្មគិតទុកជាមុនតាមមាត្រា ២០០ នៃក្រមព្រហ្មទណ្ឌ និងរួមគ្នាសងជំងឺចិត្ត ១០ លានដុល្លារ។ ដោយមិនសុខចិត្តនឹងសាលក្រមនេះ ជនជាប់ចោទទាំង ៦ នាក់បានប្តឹងឧទ្ធរណ៍ភ្នំពេញ ហើយត្រូវបានសាលាឧទ្ធរណ៍បើកសវនាការ និងប្រកាសសាលដីកានៅថ្ងៃទី ៤ វិច្ឆិកា ឆ្នាំ ២០២០ សម្រេចដោះលែងជនជាប់ចោទ ៥ នាក់ក្នុងនោះមានទាំងលោក ថោង សារ៉ាត់ ផង ខណៈដែលឈ្មោះ លី សៅ បានស្លាប់ក្នុងពន្ធនាគារ៕
វីដេអូ៖