ភ្នំពេញៈ រាជធានី-ខេត្តចំនួន ៣ គឺខេត្តកណ្តាល ខេត្តកែប និងរាជធានីភ្នំពេញលែងជាតំបន់រងផលប៉ះពាល់ដោយសារគ្រាប់មីនប្រឆាំងមនុស្សមុនគេ ចាប់ពីពេលនេះតទៅ និងទិសដៅបន្តបន្ទាប់អាចជាខេត្តព្រះសីហនុ ខេត្តកំពត ខេត្តកំពង់ចាម និងខេត្តតាកែវ។
តាមរបាយការណ៍របស់អង្គភាពស៊ីម៉ាក់ចេញផ្សាយកាលពីថ្ងៃទី ១៦ ខែកុម្ភៈ ឱ្យដឹងថា អង្គភាពស៊ីម៉ាក់បានសម្រេចភារកិច្ចក្នុងការបញ្ចប់កិច្ចប្រតិបតិ្តការរំដោះផ្ទៃដីរងផលប៉ះពាល់ដោយគ្រាប់មីនប្រឆាំងមនុស្សដែលបានដឹង និងមានកំណត់ត្រាពហុកោណក្នុងទិន្នន័យជាតិ ស្ថិតក្នុងខេត្តកែប ខេត្តកណ្តាល និងរាជធានីភ្នំពេញបន្តបន្ទាប់ទាំងស្រុងហើយ។
ក្នុងនោះខេត្តកណ្តាលមានចំនួន ៣ ពហុកោណ (ចម្ការមីន) មានផ្ទៃដីចំនួន ៦៤ ហិកតា ខេត្តកែប មានចំនួន ៨ ពហុកោណ ស្មើនឹង ៦៩,៨ ហិកតា និងរាជធានីភ្នំពេញមានចំនួន ៨ ពហុកោណស្មើនឹង ៩៨៣ ហិកតា។
របាយការណ៍នេះសរសេរថា «ដូចនេះខេត្តទាំង ២ គឺខេត្តកណ្តាល និងខេត្តកែប ព្រមទាំងរាជធានីភ្នំពេញ ជាខេត្ត/រាជធានីអស់តំបន់រងការគំរាមកំហែងដោយសារគ្រាប់មីនប្រឆាំងមនុស្សមុនគេនៅក្នុងព្រះរាជាណាចក្រកម្ពុជា។ ទិសដៅបន្តបន្ទាប់គឺអង្គភាពស៊ីម៉ាក់ ចល័តកម្លាំងចូលទៅខេត្តព្រះសីហនុ ខេត្តកំពត ខេត្តកំពង់ចាម និងខេត្តតាកែវ ដែលជាគោលដៅបញ្ចប់បញ្ហាគ្រាប់មីនប្រឆាំងមនុស្សក្នុងឆ្នាំ ២០២២ នេះ»។
លោក ហេង រតនា អគ្គនាយកអង្គភាពស៊ីម៉ាក់ ប្រាប់ភ្នំពេញប៉ុស្តិ៍នៅថ្ងៃទី ១៧ ខែកុម្ភៈថា តំបន់ដែលមានកំណត់ត្រា ថា មានគ្រាប់មីនស្ថិតនៅក្នុងរាជធានីខេត្តទាំង ៣ នេះត្រូវបានអង្គភាពស៊ីម៉ាក់ដោះអស់ហើយ។ ម្យ៉ាងទៀតតំបន់ដែលមានកំណត់ត្រានេះ ធានាបាននូវប្រព័ន្ធសុវត្ថិភាព និងលែងមានការគំរាមកំហែងនៅក្នុងតំបន់ដែលមានគ្រាប់មីន។
លោកថ្លែងថា៖ «នៅពេលដែលយើងដោះមីនរួចអស់ហើយ នឹងធ្វើឱ្យតំបន់ទាំងនេះមានសុវត្ថិភាព និងលែងបង្កភាពភ័យខ្លាច។ ដូចជាករណីនៅកែប យើងដកកម្លាំងចេញស្ទើរតែមិនចង់ទាន់ផង គាត់បានប្រើប្រាស់ ដីនោះ ហើយគាត់សប្បាយរីករាយ និងអស់ភ័យខ្លាចជាពិសេស យុវជនរស់នៅក្នុងតំបន់នោះ»។
ទោះជាយ៉ាងណាលោកថា ការប្រកាសថា ខេត្តគ្មានតំបន់គំរាមកំហែងដោយសារគ្រាប់មីន ប្រឆាំងមនុស្ស ឬហៅថា "ខេត្តគ្មានគ្រាប់មីន" វាមិនមានន័យថា "ខេត្តទាំងនោះ អស់បញ្ហាជាមួយសំណល់យុទ្ធភណ្ឌសង្គ្រាមនោះទេ" ការពិតអាចបន្តមានបញ្ហាសំណល់យុទ្ធភណ្ឌមិនទាន់ផ្ទុះពីសង្គ្រាមដទៃទៀត ដូចជាគ្រាប់បែកចង្កោម គ្រាប់បែកទម្លាក់ពីយន្តហោះ និងសំណល់គ្រាប់មិនទាន់ផ្ទុះផ្សេងៗ ក្រៅពីគ្រាប់មីនប្រឆាំងមនុស្ស។
លោកពន្យល់ថា ដោយសារបញ្ហាគ្រាប់មីនប្រឆាំងមនុស្ស គឺស្ថិតនៅក្រោមអនុសញ្ញាអន្តរជាតិអូតាវ៉ា ដែលមានសមាជិកហត្ថលេខីចំនួន ១៦៤ ប្រទេសក្នុងចំនួននេះមានប្រទេសចំនួន ១៣៣ ជារដ្ឋសមាជិក ដោយបូករួមទាំងព្រះរាជាណាចក្រកម្ពុជាផងដែរ។ រាជរដ្ឋាភិបាលក្នុងនាមជារដ្ឋសមាជិកមួយសកម្ម បានប្តេជ្ញាអនុវត្តអនុសញ្ញានេះយ៉ាងពេញលេញ ដោយអនុម័តផែនការយុទ្ធសាស្ត្រកម្ពុជាគ្មានគ្រាប់មីននៅចុងឆ្នាំ ២០២៥។
បើតាម លោក ហេង រតនា ដូចនេះគោលដៅសំខាន់គឺតម្រង់ទិសសម្រេចបញ្ហាគ្រាប់មីនប្រឆាំងមនុស្សមួយនេះឱ្យខាងតែបានត្រឹមឆ្នាំ ២០២៥។ ដូចដែលបានដឹងមកហើយ ព្រះរាជាណាចក្រកម្ពុជា ទទួលរងគ្រោះដោយសារសង្គ្រាមរយ:ពេលយូរ និងទំហំធ្ងន់ធ្ងរបំផុតលើពិភពលោក ដូចនេះសំណល់យុទ្ធភណ្ឌពីសង្គ្រាមក៏មានទំហំធំធេងណាស់ដែរ ហេតុនេះមិនអាចដោះស្រាយទិដ្ឋភាពបញ្ហាសំណល់យុទ្ធភណ្ឌសង្គ្រាមគ្រប់ប្រភេទបានត្រឹមឆ្នាំ ២០២៥ នោះទេ។
លោកបញ្ជាក់ទៀតថា ផ្អែកតាមផែនការរបស់រាជរដ្ឋាភិបាលនេះ អង្គភាពស៊ីម៉ាក់បានដាក់ចេញផែនការយុទ្ធសាស្ត្រ ៤ ឆ្នាំ (២០២២-២០២៥) រំដោះផ្ទៃដីរងផលប៉ះពាល់ដោយសារគ្រាប់មីនប្រឆាំងមនុស្សដែលបានដឹង និងមានកំណត់ត្រាក្នុងទិន្នន័យជាតិចំនួនជាង ៧០០ គីឡូម៉ែត្រក្រឡាលើចំនួននៅសល់ប្រមាណ ៨០០ គីឡូម៉ែត្រក្រឡាគឺប្រមាណ ៩០% នៃបញ្ហាគ្រាប់មីនដែលនៅសល់។
លោកថ្លែងថា៖ «សូមចៀសវាងមានការយល់ច្រឡំថា "ខេត្តគ្មានគ្រាប់មីន" ជាខេត្តអស់បញ្ហាសំណល់យុទ្ធភណ្ឌសង្គ្រាមដទៃទៀតនោះ "ខេត្តគ្មានគ្រាប់មីន" ធាតុពិតខេត្តនោះ មិនទាន់អស់បញ្ហាសំណល់យុទ្ធភណ្ឌមិនទាន់ផ្ទុះ ជាមរតកពីសង្គ្រាមផ្សេងៗទៀត ដូចជាគ្រាប់បែកទម្លាក់ពីយន្តហោះ គ្រាប់បែកចង្កោម និងគ្រាប់មិនទាន់ផ្ទុះគ្រប់ប្រភេទនៅឡើយទេ។ ដូចនេះសូមបន្តប្រុងប្រយ័ត្ន និងរួមគ្នាបន្តចាត់វិធានការបោសសម្អាតគ្រាប់មិនទាន់ផ្ទុះទាំងនោះឱ្យអស់ពីព្រះរាជាណាចក្រនេះ»។
លោក អាគីរ៉ា ស្ថាបនិកអង្គការសារមន្ទីរគ្រាប់មីនប្រាប់ភ្នំពេញប៉ុស្តិ៍នៅថ្ងៃទី ១៧ ខែកុម្ភៈថា រាជធានីខេត្តទាំង ៣ ខាងលើនេះត្រូវបានដោះមីនអស់ និងមានសុវត្ថិភាពមុនខេត្តផ្សេងៗ ដែលវានឹងរួមចំណែកដល់ការអភិវឌ្ឍសេដ្ឋកិច្ច សង្គមនៅក្នុងប្រទេសឱ្យកាន់តែរីកចម្រើន ១ កម្រិតទៀតជាពិសេសនឹងមិនបង្កភាពភ័យខ្លាចដល់ប្រជាពលរដ្ឋ និងវិនិយោគិនដែលមានបំណងមកបណ្តាក់ទុនវិនិយោគនៅក្នុងប្រទេសកម្ពុជា។ លោកថ្លែងថា៖ «ខាងខ្ញុំជាអ្នកដោះមីនដូចគ្នាត្រេកអរយ៉ាងខ្លាំងដែលរាជធានីខេត្តទាំង ៣ នេះមានសុវត្ថិភាព ហើយសង្ឃឹមថា នៅសល់រាជធានីខេត្តផ្សេងៗទៀត នឹងត្រូវដោះមីនអស់នៅក្នុងឆ្នាំ ២០២៥ ខាងមុខនេះ»៕