ភ្នំពេញៈ មន្ទីរសុខាភិបាលរាជធានីភ្នំពេញរកឃើញវិជ្ជមានកូវីដ ១៩ លើក្រុមអតីតបុគ្គលិកក្រុមហ៊ុនណាហ្គាវើលដ៍ចំនួន ១៦ នាក់បន្ថែមទៀត កាលពីថ្ងៃទី ១៦ កុម្ភៈ បន្ទាប់ពីពួកគេបានមកធ្វើតេស្តជាលើកទី ២ ក្រោយផ្អាកការជួបជុំ និងធ្វើចត្តាឡីស័កតាមការណែនាំរបស់មន្ត្រីសុខាភិបាល។
គិតត្រឹមថ្ងៃទី ៧ កុម្ភៈ ក្រុមគ្រូពេទ្យមន្ទីរសុខាភិបាលរាជធានីភ្នំពេញសហការជាមួយក្រុមគ្រូពេទ្យស្ម័គ្រចិត្ត TYDA បានរកឃើញករណីវិជ្ជមានកូវីដ ១៩ ចំនួន ៤១ នាក់ក្នុងចំណោមអតីតបុគ្គលិកក្រុមហ៊ុនណាហ្គាវើលដ៍ចំនួន ៥៤៦ នាក់ដែលបានទៅធ្វើតេស្តជាលើកទី ២។
សេចក្តីជូនដំណឹងរបស់មន្ទីរសុខាភិបាលរាជធានីភ្នំពេញចុះថ្ងៃទី ១៦ ខែកុម្ភៈ បានឱ្យដឹងថាក្រុមគ្រូពេទ្យបានធ្វើតេស្តយកសំណាកដើម្បីស្វែងរកមេរោគកូវីដ ១៩ លើក្រុមបាតុករ អតីតបុគ្គលិក និងបុគ្គលិកក្រុមហ៊ុនណាហ្គាវើលដ៍ លើកទី ២ ចំនួន ១៦៣ នាក់ហើយជាលទ្ធផលគឺមាន ១៦ នាក់ត្រូវបានរកឃើញថា មានផ្ទុកមេរោគកូវីដ ១៩។
មន្ទីរសុខាភិបាលរាជធានីភ្នំពេញក៏ឱ្យដឹងបន្ថែមថា៖ «បាតុករអតីតបុគ្គលិក និងបុគ្គលិកក្រុមហ៊ុនណាហ្គាវើលដ៍ដែលបានមកធ្វើតេស្តយកសំណាកជាលើកទី ២ នេះ គឺក្នុងចំណោមក្រុមបាតុករដែលបានមកយកសំណាកចាប់ពីថ្ងៃទី ៥ ដល់ថ្ងៃទី ៧ ខែកុម្ភៈ ឆ្នាំ ២០២២ ដែលមានចំនួនសរុប ៨៧៩ នាក់»។
ជាមួយនឹងការរកឃើញវិជ្ជមានជាបន្តបន្ទាប់នេះ មន្ទីរសុខាភិបាលនៃរដ្ឋបាលរាជធានីភ្នំពេញក៏បានណែនាំក្រុមបាតុករ និងអ្នកពាក់ព័ន្ធទាំងអស់ ដែលជាអ្នកប៉ះពាល់ផ្ទាល់ជាមួយអ្នកវិជ្ជមានកូវីដ ១៩ ចំនួន ១៦ នាក់ខាងលើ ត្រូវធ្វើចត្តាឡីស័ករយៈពេល ៧ ថ្ងៃ ដោយគោរពឱ្យបានម៉ឺងម៉ាត់បំផុតតាមវិធានសុខាភិបាល។
លោក ងី មានហេង ប្រធានមន្ទីរសុខាភិបាលរាជធានីភ្នំពេញបានប្រាប់ភ្នំពេញប៉ុស្តិ៍បន្ថែមថា ដើម្បីបញ្ចៀសបាននូវការឆ្លងរាលដាល បុគ្គលិកទាំងអស់ត្រូវតែបញ្ឈប់ការប្រមូលផ្តុំហើយបន្តធ្វើចត្តាឡីស័កឱ្យបានត្រឹមត្រូវតាមវិធានសុខាភិបាល។
លោកបានបញ្ជាក់ថា៖ «ការធ្វើចត្ថាឡីស័កនេះ គឺយើងបានកំណត់ហើយ គឺ ១ អាទិត្យ យើងធ្វើម្តង។ ដូច្នេះខ្ញុំសូមសំណូមពរឱ្យពួកគាត់អនុវត្តឱ្យបានល្អទៅ ជារួមយើងមិនអាចឱ្យជុំគ្នានោះទេព្រោះបើជុំគ្នាគឺមិនអាចអនុវត្តបានទៅតាមវិធានសុខាភិបាលទេ»។
ជុំវិញវិវាទនៅក្រុមហ៊ុនណាហ្គាវើលដ៍នេះដែរ ក្រុមអ្នកជំនាញនៃអង្គការសហប្រជាជាតិទទួលបន្ទុកសិទ្ធិមនុស្ស UN កាលពីថ្ងៃទី ១៦ កុម្ភៈ បានចាត់ទុកថាវិធានការថ្មី ដើម្បីទប់ស្កាត់ការធ្វើកូដកម្មរបស់កម្មករក្នុងក្រុមហ៊ុននេះ គឺជារឿងមិនសមហេតុផល ហើយអាជ្ញាធរមិនត្រូវយកវិធានការសុខភាពសាធារណៈ ជាសំអាងក្នុងការបង្ក្រាបលើសកម្មភាពឧស្សាហកម្មស្របច្បាប់ និងដោយសន្តិវិធីនោះទេ។
ក្រុមអ្នកជំនាញបានលើកឡើងថា៖ «យើងឃើញមានភាពមិនស៊ីចង្វាក់គ្នាជារួម និងកង្វះតម្លាភាពក្នុងវិធានការ គ្រប់គ្រងជំងឺកូវីដ ១៩ របស់កម្ពុជា។ ក្នុងករណីនេះ អាជ្ញាធរហាក់ដូចជា ប្រឹងប្រែងរារាំងសកម្មភាពការងារ ដោយសន្តិវិធី និងស្របច្បាប់ដោយសំអាងលើវិធានការសុខភាពសាធារណៈ។ អាជ្ញាធរមិនគួរប្រើប្រាស់វិធានមួយ សម្រាប់អនុវត្តជាមួយក្រុមកូដករ និងវិធានមួយទៀតសម្រាប់សាធារណជនទូទៅនោះទេ»។
ពួកគេក៏បានរិះគន់ចំពោះការចាត់វិធានការឱ្យកម្មករកាស៊ីណូដែលបានធ្វើកូដកម្មនៅកម្ពុជាបន្តធ្វើចត្តាឡីស័កក្នុងក្របខ័ណ្ឌការពារជំងឺកូវីដ ១៩ និងបានសម្តែងការព្រួយបារម្ភថា ជាង ១ សប្តាហ៍បន្ទាប់ពីការបង្ខំឱ្យធ្វើតេស្តរកមេរោគកូវីដ ១៩ ក្រុមកូដកររាប់រយនាក់បានផ្ដល់ព័ត៌មានថា ខ្លួននៅមិនទាន់ទទួលបានលទ្ធផលតេស្ត ឬភាពច្បាស់លាស់អំពីពេលវេលាដែលពួកគេនឹងត្រូវបានអនុញ្ញាតឱ្យបញ្ចប់ចត្តាឡីស័កនោះទេ។
កាលពីថ្ងៃទី ១៥ ខែកុម្ភៈ រដ្ឋបាលរាជធានីភ្នំពេញបានចេញសេចក្ដីជូនដំណឹងដោយណែនាំក្រុមកូដករឱ្យផ្លាស់ទៅធ្វើកូដកម្មនៅទីតាំងផ្សេង ក្រៅពីទីប្រជុំជន ដើម្បីទប់ស្កាត់ការឆ្លងរាលដាលជំងឺកូវីដ ១៩ បំប្លែងខ្លួនថ្មី ប្រភេទអូមីក្រុងចូលក្នុងសហគមន៍កាន់តែច្រើនឡើងៗ ក៏ដូចជាធានាបាននូវសន្តិសុខ សណ្តាប់ធ្នាប់ របៀបរៀបរយសាធារណៈ។
រដ្ឋបាលរាជធានីភ្នំពេញបានគូសបញ្ជាក់ថា៖ «រដ្ឋបាលរាជធានីភ្នំពេញមិនអនុញ្ញាតដាច់ខាតឱ្យមានការប្រមូលផ្តុំធ្វើសកម្មភាពបាតុកម្មខុសច្បាប់របស់ក្រុមអតីតបុគ្គលិក និងបុគ្គលិក ក្រុមហ៊ុនណាហ្គាវើលដ៍ នៅក្នុងសង្កាត់ទន្លេបាសាក់ ខណ្ឌចំការមនទៀតឡើយ។ ក្នុងករណីរឹងរូសបន្តសកម្មភាពខុសច្បាប់ទៀតនោះ រដ្ឋបាលរាជធានីភ្នំពេញនឹងចាត់វិធានការរដ្ឋបាល និងវិធានការច្បាប់ ដោយគ្មានការលើកលែង»៕