ភ្នំពេញៈ ក្រសួងវប្បធម៌ និងវិចិត្រសិល្បៈប្រកាសថ្កោលទោសលោក គឹម ហ៊ាង ដែលជាអ្នកជំនួញដីធ្លី ១ រូបប្រើសម្តី ដើម្បីតែផលចំណេញនៃមុខជំនួញរបស់ខ្លួនបំភ្លេចចោលនូវតម្លៃនៃមរតកវប្បធម៌ជាតិ និងជំរុញឱ្យមានចលនាទិញ លក់ដូរ អចលនទ្រព្យកាន់តែខ្លាំងឡើងក្នុងតំបន់សៀមរាបអង្គរដែលអាចនាំដល់ការរីករាលដាលសំណង់អនាធិបតេយ្យ។
យោងតាមលិខិតប្រកាសព័ត៌មានរបស់ក្រសួងវប្បធម៌ និងវិចិត្រសិល្បៈនៅថ្ងៃទី ១៧ ខែកុម្ភៈ បានឱ្យដឹងថា ថ្មីៗនេះបណ្តាញសង្គមមួយចំនួនបានផ្សព្វផ្សាយនូវវីដេអូកាត់ខ្លីរយៈពេល ៣ នាទី ៤១ វិនាទីរបស់លោក គឹម ហ៊ាង អ្នកជំនួញដីធ្លី ១ រូប បានថ្លែងនៅក្នុងសិក្ខាសាលាមួយស្តីពីអនាគតនៃវិស័យអចលនទ្រព្យខេត្តសៀមរាប ដែលលើកឡើងនូវទស្សនវិស័យរបស់ខ្លួនទាក់ទងទៅនឹងការអភិរក្ស និងអភិវឌ្ឍនៃតំបន់សៀមរាបអង្គរ និងវិធាននៃការការពារបេតិកភណ្ឌពិភពលោករបស់អង្គការយូណេស្កូ។
ក្រសួងវប្បធម៌បានបន្ទោស លោក គឹម ហ៊ាង ថាបានប្រើប្រាស់សម្ដីវាយប្រហារ គ្មានការទទួលខុសត្រូវ គ្មានការសិក្សាស្រាវជ្រាវយល់ដឹងគ្រប់ជ្រុងជ្រោយ និងខ្វះខាតចំណេះដឹងលើផ្នែកកិច្ចការពារបេតិកភណ្ឌពិភពលោក ដោយសម្លឹងឃើញតែ ១ ជ្រុងទៅលើវិស័យអចលនទ្រព្យ ដើម្បីតែផលចំណេញនៃមុខជំនួញរបស់ខ្លួន ដោយបំភ្លេចចោលនូវតម្លៃនៃមរតកវប្បធម៌ជាតិ ក៏ដូចជាការជំរុញឱ្យមានចលនាទិញ លក់ដូរ អចលនទ្រព្យកាន់តែខ្លាំងឡើងក្នុងតំបន់សៀមរាបអង្គរ ដែលអាចនាំដល់ការរីករាលដាលសំណង់អនាធិបតេយ្យក្នុងតំបន់រមណីយដ្ឋានការពារ និងតំបន់ជុំវិញនានា។ ក្នុងលិខិតដដែលនោះលើកឡើងថា ពាក្យសម្ដីនោះបានធ្វើឱ្យប៉ះពាល់ទៅលើកិច្ចខិតខំប្រឹងប្រែងការពារ ថែរក្សា និងអភិរក្ស របស់ឥស្សរជនជាន់ខ្ពស់ថ្នាក់ជាតិ អន្តរជាតិគ្រប់ជំនាន់។ ជាពិសេស ការខិតខំរបស់រាជរដ្ឋាភិបាល ដែលបានសហការជាមួយអង្គការយូណេស្កូតាមរយៈការជំរុញ និងគាំពារឱ្យបង្កើតយន្តការអន្តរជាតិ ដើម្បីសម្របសម្រួលកិច្ចគាំពារ និងអភិវឌ្ឍន៍តំបន់រមណីយដ្ឋាន ប្រវត្តិសាស្ត្រអង្គរ ហៅកាត់ថា អាយស៊ីស៊ី-អង្គរ (ICC-អង្គរ) ដឹកនាំដោយសហប្រធានបារាំង និងជប៉ុន ដែលប្រមូលផ្ដុំដោយអ្នកជំនាញការជាតិ អន្តរជាតិ មានអាយុកាលជាង ៣០ ឆ្នាំបានរួមគ្នាមកសង្គ្រោះ និងការពារអង្គរ។ ក្នុងនោះបានប្រើប្រាស់ថវិកាច្រើនជាង ៥០០ លានដុល្លារ ព្រមទាំងជួយបណ្តុះបណ្តាលនូវធនធានមនុស្សជូនកម្ពុជាជាច្រើន ដើម្បីកិច្ចការពារ បេតិកភណ្ឌជាតិ។
ក្រសួងបញ្ជាក់ថា៖ «ក្នុងន័យនេះ ក្រសួងវប្បធម៌ និងវិចិត្រសិល្បៈសូមថ្កោលទោសយ៉ាងធ្ងន់ធ្ងរ និងណែនាំឱ្យបុគ្គលរូបនេះត្រូវបញ្ឈប់ជាបន្ទាន់នូវពាក្យសម្ដីដែលគ្មានការទទួលខុសត្រូវ ដើម្បីតែផលប្រយោជន៍ផ្ទាល់ខ្លួនបែបនេះ ដើម្បីបញ្ចៀសនូវការយល់ច្រឡំ និងជំរុញនូវការជួញដូរដីធ្លីក្នុងតំបន់សៀមរាបអង្គរ ដែលនឹងអាចបង្កើតនូវចលាចល សង្គមជាយថាហេតុណាមួយ»។
លោក សុខ ទូច ប្រធានរាជបណ្ឌិត្យសភាកម្ពុជាបង្ហោះលើបណ្តាញសង្គមហ្វេសប៊ុកនៅថ្ងៃទី ១៦ ខែកុម្ភៈក្នុងន័យថា លោក គឹម ហ៊ាង គិតតែប្រយោជន៍ផ្ទាល់ខ្លួនមិនគិតពីប្រយោជន៍ជាតិ និងកេរដំណែលស្នាដៃដ៏អស្ចារ្យរបស់ដូនតាបន្សល់ទុកឡើយ។
លោកបញ្ជាក់ថា៖ «តើនៅកម្ពុជាមានមនុស្សបែបនេះប៉ុន្មាននាក់? នៅខ្មែរមិនខ្វះទេកន្លែងសាងសង់ខ្ពស់ ដើរ ចេញពីខេត្តសៀមរាប គេអាចសាងសង់ប៉ុន្មានពាន់ជាន់នៅខេត្តណាក៏បានដែរ ដោយកម្ពុជាមាន ២៤ រាជធានីខេត្ត ប៉ុន្តែមិនមែននៅសៀមរាបទេ»។
ប្រតិកម្មក្នុងរឿងនេះដែរ លោក ហ៊ុន ម៉ានី ប្រធានគណៈកម្មការទី ៧ នៃរដ្ឋសភា និងជាប្រធានសហភាពសហព័ន្ធយុវជនកម្ពុជាបានសរសេរលើហ្វេសប៊ុកនៅថ្ងៃទី ១៧ ខែកុម្ភៈថា សិទ្ធិក្នុងការបញ្ចេញមតិ និងគំនិតមិនខុសអ្វីទេ ប៉ុន្តែមិនគួរឱ្យសិទ្ធិនោះមានការប៉ះពាល់ដល់កិត្តិយសបុគ្គល ឬប្រមាថដល់ស្ថាប័ន ឬមន្ត្រីរាជការសាធារណៈ (អាជ្ញាធរអប្សរា) រាប់រយនាក់ ដែលបាននិងកំពុងបំពេញភារកិច្ចក្នុងការថែរក្សាកេរមរតកដូនតាក្នុងក្របខ័ណ្ឌដែលកំណត់ដោយច្បាប់។
លោកថា គំនិតដែលចេញមកពីជ្រុងតែមួយមិនបានឆ្លុះបញ្ចាំងពីតថភាពជាក់ស្តែងនៃស្ថានភាពដែលតោងអ្នកបញ្ចេញមតិ (ដោយគ្មានការទទួលខុសត្រូវនេះ) ពិចារណាឡើយ។ ការគិតគូររបស់រាជរដ្ឋាភិបាលមានលក្ខណៈគ្របដណ្តប់ និងគ្រប់ជ្រុងជ្រោយ ដែលផលនៃការសម្រេចបានជះជាវិជ្ជមានទៅដល់មនុស្សគ្រប់ស្រទាប់ក្នុងសង្គម មិនសំដៅតែលើក្រុមណាមួយឡើយ។
លោកបញ្ជាក់ថា៖ «ពាក្យថាស្រឡាញ់ជាតិមានន័យ និងស្មារតីខ្ពង់ខ្ពស់ណាស់ គួរណាយើងលើកតម្កើងឱ្យបានច្រើន និងរាល់ពេលវេលា។ វាមិនត្រឹមតែជាពាក្យសម្ដី ប៉ុន្តែជាការប្រតិបត្តិជាក់ស្តែង»។
លោក គឹម ហ៊ាង បានចេញលិខិតសុំទោសជាសាធារណៈភ្លាមៗនៅថ្ងៃទី ១៧ ខែកុម្ភៈ បន្ទាប់ពីមានប្រតិកម្មពីសំណាក់មហាជន។
ក្នុងសិក្ខាសាលាអចលនទ្រព្យ ឆ្នាំ ២០២២ ស្តីអំពីអនាគតនៃវិស័យអចលនទ្រព្យខេត្តសៀមរាប ក្រោយជំងឺរាតត្បាតកូវីដ ១៩ ធូរស្រាល កាលពីថ្ងៃទី ១២ ខែកុម្ភៈ ឆ្នាំ ២០២២ នៅសណ្ឋាគារ អង្គរផារ៉ាឌី ក្រុងសៀមរាប ខេត្តសៀមរាប លោក គឹម ហ៊ាង បានធ្វើបទបង្ហាញ និងការវិភាគមានរយៈពេលជាង ២ ម៉ោង ដោយបានបកស្រាយពីចំណុចខ្សោយ ចំណុចខ្លាំង ឱកាស ព្រមទាំងការគំរាមកំហែង ដល់ការវិនិយោគ និងអភិឌ្ឍន៍វិស័យអចលនទ្រព្យ នៅខេត្តសៀមរាប ដែលការបកស្រាយនោះពិតជាមានការប៉ះពាល់ដល់វប្បធម៌ជាតិ ដែលជាកំហុសដ៏ធំមួយកើតឡើងដោយអចេតនា។
លោកបញ្ជាក់ថា៖ «ខ្ញុំបាទសូមលំឱនកាយ លើកដៃម្រាម ១០ ដើម្បីសូមទោសជាសាធារណៈដល់ប្រជាជនកម្ពុជា អាជ្ញាធរមានសមត្ថកិច្ចគ្រប់លំដាប់ថ្នាក់ ពិសេសដល់ថ្នាក់ដឹកនាំប្រទេស ចំពោះកំហុសដែលខ្ញុំបាទបានបង្កើតឡើងកាលពីថ្ងៃសៅរ៍ ទី ១២ ខែកុម្ភៈ ឆ្នាំ ២០២២ នៅទីរួមខេត្តសៀមរាប»៕
វីដេអូ៖