សារលិខិត សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងជាឥស្សរជនឆ្នើមថ្នាក់ជាតិនៃផែនការសកម្មភាពរួម អគ្គលេខាធិការអង្គការសហប្រជាជាតិ ដើម្បីសុខភាពស្ត្រី និងកុមារ ក្នុងឱកាសទិវាជាតិសុខភាពមាតា ទារក និងកុមារ ថ្ងៃទី ២១ ខែកុម្ភៈ ឆ្នាំ ២០២២។
មន្ត្រីជាន់ខ្ពស់នៃកាកបាទក្រហមកម្ពុជាបានលើកឡើងថា អត្រាបុរស-ស្ត្រីក្នុងវ័យបន្តពូជ ស្ត្រីមានផ្ទៃពោះដែលចាំបាច់ត្រូវទៅទទួលសេវាពិនិត្យផ្ទៃពោះ ថែទាំផ្ទៃពោះ និងការថែទាំក្រោយពេលសម្រាល មានការធ្លាក់ចុះ ទោះបីរាជរដ្ឋាភិបាលខិតខំដោះស្រាយគោលនយោបាយ គាំពារសង្គមជួយដល់ប្រជាជនដែលងាយរងគ្រោះក្នុងបរិបទនៃការរីករាលដាលជំងឺកូវីដ ១៩។
លោកស្រី ប៊ុន រ៉ានី ប្រធានកាកបាទក្រហមកម្ពុជា និងជាឥស្សរជនឆ្នើមថ្នាក់ជាតិនៃផែនការសកម្មភាពរួមអគ្គលេខាធិការអង្គការសហប្រជាជាតិ ដើម្បីសុខភាពស្ត្រី និងកុមារបានលើកឡើងដូចនេះក្នុងសារលិខិតនាឱកាសទិវាជាតិសុខភាពមាតា ទារក និងកុមារ ២១ កុម្ភៈ ២០២២។
ទិវាជាតិសុខភាពមាតា ទារក និងកុមារ ធ្វើឡើងក្រោមប្រធានបទ «ពង្រឹងការផ្តល់សេវាសុខភាពបន្តពូជ សុខភាពមាតា ទារក និងកុមារ និងការផ្តល់វ៉ាក់សាំងបង្ការជំងឺកូវីដ ១៩ ជូនស្ត្រីមានផ្ទៃពោះ និងមាតាកំពុងបំបៅកូនដោយទឹកដោះម្តាយ»។
លោកស្រីបានឱ្យដឹងថា ចាប់តាំងពីឆ្នាំ ២០១៩ រហូតមកដល់ពេលនេះ សកលលោកទាំងមូលក្នុងនោះរួមទាំងព្រះរាជាណាចក្រកម្ពុជាបានទទួលរងនូវហានិភ័យ និងផលប៉ះពាល់អវិជ្ជមានពីការរាតត្បាតនៃមេរោគកូវីដ ១៩ មកលើវិស័យជាច្រើន ជាពិសេសការយាយីដល់អាយុជីវិតមនុស្ស។
ដោយឡែកក្នុងវិស័យសុខភាពវិញតាមឯកសាររបស់អង្គការសុខភាពពិភពលោកនាពេលថ្មីៗនេះបានឱ្យដឹងថា នៅតាមប្រទេសមួយចំនួន ជំងឺកូវីដ ១៩ បានកាត់ផ្តាច់សេវាកម្មសុខភាពជាសារវ័ន្ត រួមទាំងសេវាកម្មសុខភាពមាតា ទារក និងកុមារផងដែរ។
ការកាត់ផ្តាច់ ការទទួលបាននូវសេវានេះ បណ្តាលមកពីមូលហេតុចម្បង ២ គឺ ទីមួយ កង្វះខាតអ្នកផ្តល់សេវាសុខាភិបាល ព្រោះបុគ្គលិកសុខាភិបាល និងគ្រូពេទ្យជាប់ដៃមមាញឹកក្នុងការប្រយុទ្ធនឹងជំងឺកូវីដ ១៩ ក្នុងការជួយសង្គ្រោះអាយុជីវិតអ្នកជំងឺកូវីដ ១៩។ ទីពីរគឺ ការបិទខ្ទប់នៅនឹងកន្លែង ដែលធ្វើឱ្យស្ត្រីមានផ្ទៃពោះ ស្ត្រីជាមាតាមិនអាច ទៅទទួលសេវាពិនិត្យ/ថែទាំសុខភាពបាន។ ដោយសារមូលហេតុចម្បងទាំង ២ នេះហើយ ដែលធ្វើឱ្យស្ត្រីមានផ្ទៃពោះជួបផលវិបាកផ្នែកសម្ភព បង្កការលំបាកក្នុងការជួយសង្គ្រោះអាយុជីវិតមាតា និងទារក។
លោកស្រី ប៊ុន រ៉ានី បានបញ្ជាក់ថា៖ «នៅកម្ពុជាទោះជាយ៉ាងនេះក៏ដោយ ក៏ក្នុងវិស័យសុខភាពមាតា ទារក និងកុមារនេះទទួលរងប៉ះពាល់យ៉ាងខ្លាំង ព្រោះថាអត្រាបុរស-ស្ត្រីក្នុងវ័យបន្តពូជ ស្ត្រីមានផ្ទៃពោះដែលចាំបាច់ត្រូវទៅទទួលសេវាពិនិត្យផ្ទៃពោះ ថែទាំផ្ទៃពោះ និងការថែទាំក្រោយពេលសម្រាល គឺមានការធ្លាក់ចុះ»។
លោកស្រីបន្តថា៖ «ទោះបីរាជរដ្ឋាភិបាលខិតខំដោះស្រាយគោលនយោបាយ គាំពារសង្គមជួយដល់ប្រជាជនដែលងាយរងគ្រោះឱ្យទទួលបាននូវការឧបត្ថម្ភជីវភាពរស់នៅ និងទទួលបានអត្ថប្រយោជន៍ក្នុងការថែទាំសុខភាព ទទួលបាននូវការពិគ្រោះ ពិនិត្យព្យាបាលជំងឺ ទទួលរបបឧបត្ថម្ភពេលសម្រាកមាតុភាព ដើម្បីជួយឱ្យគ្រួសារនីមួយៗអាចរស់នៅតាមគន្លងប្រក្រតីភាពថ្មីក្នុងបរិបទនៃជំងឺកូវីដ ១៩ និងទទួលបាននូវសេវាសុខភាពក៏ដោយ»។
ដោយសារការធ្លាក់ចុះនេះ ទើបកាកបាទក្រហមកម្ពុជា និងក្រុមការងារឥស្សរជនឆ្នើមថ្នាក់ជាតិបានខិតខំប្រឹងប្រែងក្នុងការអប់រំផ្សព្វផ្សាយដោយចុះជួបផ្ទាល់ និងដោយប្រយោលតាមប្រព័ន្ធព័ត៌មានស្តីពីសារប្រយោជន៍នៃការពិនិត្យផ្ទៃពោះ, ការសម្រាលកូននៅមណ្ឌលសុខភាព, ការពិនិត្យ និងការថែទាំសុខភាពមាតា និងទារកក្រោយសម្រាល, ការចាក់វ៉ាក់សាំងបង្ការជំងឺ ១១ មុខដល់កុមារ, ការចាក់វ៉ាក់សាំងការពារជំងឺកូវីដ ១៩ ជាដើម។
លោកស្រី ប៊ុន រ៉ានីថា ក្នុងឆ្នាំ ២០២១ ខ្លឹមសារនៃសារគន្លឹះសំខាន់ទាំងអស់នេះ បានជាព័ត៌មានទៅដល់ផ្ទាល់ស្ត្រីមានផ្ទៃពោះ និងកូនតូចចំនួន ៨ ៤៩៨ នាក់ រីឯការជួយឧបត្ថម្ភផ្នែកជីវភាពដល់ស្ត្រីសម្រាលកូនរួចសម្រេចបាន ២ ០៦៤ នាក់។
លោកស្រីបញ្ជាក់ថា៖ «ក្នុងស្ថានភាពបែបនេះ ខ្ញុំយល់ឃើញថា យើងត្រូវការចាំបាច់ជាទីបំផុតការរួមកម្លាំងគ្នា និងការធ្វើតាមគ្រប់លទ្ធភាពដើម្បីពង្រឹងការផ្តល់សេវាសុខភាពបន្តពូជ សុខភាពមាតា ទារក និងកុមារ និងការផ្តល់វ៉ាក់សាំងបង្ការជំងឺកូវីដ ១៩ ជូនស្ត្រីមានផ្ទៃពោះ និងមាតាកំពុងបំបៅកូនដោយទឹកដោះម្តាយឱ្យបានល្អប្រសើរឡើងវិញ ឱ្យបានសមស្របជាមួយនឹងប្រធានបទនៃទិវាជាតិសុខភាពមាតា ទារក និងកុមារ ឆ្នាំ ២០២២ នេះ»។
ជាមួយគ្នានេះ លោកស្រីក៏បានអំពាវនាវចំពោះថ្នាក់ដឹកនាំ មន្ត្រីរាជការ បុគ្គលិកសុខាភិបាលអ្នកផ្តល់សេវាទាំងអស់ រួមទាំងសាខាអនុសាខាកាកបាទក្រហមកម្ពុជា និងក្រុមការងារឥស្សរជនឆ្នើមថ្នាក់ជាតិ ចូលរួមគាំទ្រ ការអនុវត្តគោលនយោបាយរបស់រាជរដ្ឋាភិបាលឱ្យមានប្រសិទ្ធភាពខ្ពស់ឆ្ពោះទៅសម្រេចបានគោលដៅអភិវឌ្ឍប្រកបដោយចីរភាព។
លោកស្រីក៏សូមអំពាវនាវដល់គ្រប់ស្ថាប័នពាក់ព័ន្ធទាំងអស់ ទាំងជាតិ និងអន្តរជាតិ បន្តជួយវិនិយោគ គាំទ្រដល់ការងារសុខភាពមាតា ទារក និងកុមារ ពិសេសជួយលើការងារបណ្តុះបណ្តាល និងវិក្រឹត្យការដល់មន្ត្រី/បុគ្គលិកសុខាភិបាល អាជ្ញាធរមូលដ្ឋាន អ្នកអប់រំផ្សព្វផ្សាយនៅតាមសហគមន៍ ឱ្យទទួលបានចំណេះដឹង និងជំនាញពិតប្រាកដ។
លោកស្រី ប៊ុន រ៉ានី បានលើកឡើងថា៖ «ខ្ញុំពិតជាមានក្តីសង្ឃឹម និងជឿជាក់ថា រាជរដ្ឋាភិបាលកម្ពុជានឹងបង្កើនលទ្ធភាពថ្មីៗបន្ថែមទៀតក្នុងការធ្វើឱ្យកាន់តែប្រសើរឡើងនូវស្ថានភាពសុខភាពមាតា ទារក និងកុមារនៅកម្ពុជា»៕
.jpg)
