.jpg)
ក្រុមអ្នកទោសទម្លុះជញ្ជាំងរត់គេចខ្លួននៅខេត្តស្ទឹងត្រែ នាពេលកន្លងទៅ។ រូបថត ប៉ូលិស
ស្ទឹងត្រែងៈ ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃលោក ស ខេង សម្រេចផ្ទេរតំណែងប្រធានពន្ធនាគារខេត្តស្ទឹងត្រែង និងមន្ត្រី ៤ នាក់ផ្សេងទៀតឱ្យទៅបម្រើការងារនៅអគ្គនាយកដ្ឋានពន្ធនាគារនៃក្រសួងមហាផ្ទៃ។ មន្ត្រីអគ្គនាយកដ្ឋានពន្ធនាគារបានឱ្យដឹងថា ការផ្ទេរតំណែងនេះមូលហេតុចម្បងអាចបណ្តាលមកពីការធ្វេសប្រហែស ដែលនាំឱ្យអ្នកទោស ៧ នាក់ទម្លុះជញ្ជាំងរត់គេចកាលពីខែវិច្ឆិកាឆ្នាំមុន។
យោងតាមលិខិតប្រកាសរបស់លោកឧបនាយករដ្ឋមន្ត្រី ស ខេង ដែលភ្នំពេញប៉ុស្តិ៍ទទួលបាននៅថ្ងៃទី ១៦ ខែកុម្ភៈ បានសម្រេចផ្ទេរភារកិច្ចមន្ត្រីពន្ធនាគារខេត្តស្ទឹងត្រែងចំនួន ៥ រូប ដែលមានប្រធាន ១ រូប អនុប្រធាន ២ រូប និង ២ រូបទៀត ជាប្រធានការិយាល័យបណ្ដុះបណ្ដាលវិជ្ជាជីវៈ និងមុខរបរពន្ធនាគារ និងប្រធានផ្នែកទិន្នន័យ និងបណ្ណសារនៃពន្ធនាគារខេត្តស្ទឹងត្រែងឱ្យទៅបម្រើការងារនៅអគ្គនាយកដ្ឋានពន្ធនាគារ។
លិខិតរបស់លោក ស ខេង បានបញ្ជាក់ថា មន្ត្រីទាំង ៥ រូបរួមមាន លោក ឈុន ដារ៉ា ប្រធានពន្ធនាគារខេត្តស្ទឹងត្រែង លោក រស់ សុធា អនុប្រធានពន្ធនាគារខេត្តស្ទឹងត្រែង លោក ជា សុជាតិ អនុប្រធានពន្ធនាគារខេត្តស្ទឹងត្រែង លោក ប៉ិន សំអូន ប្រធានការិយាល័យបណ្ដុះបណ្ដាលវិជ្ជាជីវៈ និងមុខរបរពន្ធនាគារខេត្តស្ទឹងត្រែង និងលោក លាង សំអឿន ប្រធានផ្នែកទិន្នន័យ និងបណ្ណសារនៃពន្ធនាគារខេត្តស្ទឹងត្រែង។
បើតាមសេចក្តីប្រកាសដដែល រដ្ឋមន្ត្រីក្រសួងមហាផ្ទៃបានតែងតាំងមន្ត្រីពន្ធនាគារថ្មីចំនួន ២ រូប គឺលោក ប្រាជ្ញ សុភី ឱ្យកាន់មុខតំណែងជាប្រធានពន្ធនាគារខេត្តស្ទឹងត្រែង និងលោក រិទ្ធ ឌីណា ឱ្យកាន់តំណែងជាអនុប្រធានពន្ធនាគារខេត្តស្ទឹងត្រែង។
ក្នុងលិខិត លោក ស ខេង មិនបានបញ្ជាក់ពីមូលហេតុច្បាស់លាស់ជុំវិញការផ្ទេរតំណែងប្រធាន អនុប្រធាន និងមន្ត្រីពន្ធនាគារខេត្តស្ទឹងត្រែងទាំងនោះទេ។ ភ្នំពេញប៉ុស្តិ៍ក៏មិនអាចទាក់ទងទៅលោក នុត សវនា អ្នកនាំពាក្យអគ្គនាយកដ្ឋានពន្ធនាគារបានដែរនៅថ្ងៃទី ១៧ ខែកុម្ភៈ។ ប៉ុន្តែមន្ត្រីអគ្គនាយកដ្ឋានពន្ធនាគារម្នាក់ដែលសុំមិនឱ្យបញ្ចេញអត្តសញ្ញាណបានឱ្យដឹងថា ការដកតំណែងនេះ គឺអាចបណ្តាលមកពីការធ្វេសប្រហែស ដែលធ្វើឱ្យអ្នកទោស ៧ នាក់ បានទម្លុះជញ្ជាំងរត់ចេញពីពន្ធនាគារ។
លោកថ្លែងថា៖ «ការដកតំណែងនេះមិនមែនធ្វើឡើងដោយសារដល់អាណត្តិត្រូវផ្លាស់ប្តូរនោះទេ។ ប៉ុន្តែអាចបណ្តាលមកពីការធ្វេសប្រហែសរបស់គាត់បណ្តាលឱ្យមានអ្នកទោសទម្លុះជញ្ជាំងរត់គេចខ្លួនបានកាលពីប៉ុន្មានខែមុន។ យ៉ាងណា ទោះជាមានអ្នកទោសរត់គេចក៏ដោយតែពួកគាត់បានសហការចាប់មកវិញបានទាំងអស់»។
សូមរំឭកថា នៅយប់ថ្ងៃទី ៨ ខែវិច្ឆិកា ឆ្នាំ ២០២១ មានអ្នកទោសដែលជាឧក្រិដ្ឋជនគ្រឿងញៀនចំនួន ៧ នាក់បានវាយទម្លុះជញ្ជាំងពន្ធនាគាររត់គេចខ្លួន ប៉ុន្តែត្រូវបានចាប់មកវិញទាំងអស់នៅថ្ងៃទី ១៧ ខែវិច្ឆិកា ឆ្នាំ ២០២១។ ជុំវិញរឿងអ្នកទោសរត់គេចខ្លួននេះដែរ លោក ស ខេង បានបញ្ជាឱ្យធ្វើអធិការកិច្ចជាបន្ទាន់ ចំពោះបញ្ហាដែលកើតឡើងនោះ ទោះបីជាអ្នកទោសត្រូវចាប់បានមកវិញអស់ក៏ដោយ៕
