ឧត្តរមានជ័យៈ សត្វទន្សោងមួយក្បាលបានស្លាប់បាត់បង់ជីវិតដោយសារជាប់អន្ទាក់ហើយព្រានវាយបន្ថែមនៅក្នុងភូមិសាស្ត្រព្រៃសន្លុង ភូមិគោកសំព័រ ឃុំលំទង ស្រុកអន្លង់វែង ខេត្តឧត្តរមានជ័យ កាលពីថ្ងៃទី ១៨ ខែកុម្ភៈ ឆ្នាំ ២០២២។
ក្រុមល្បាតសង្ឃរុក្ខវ័នបានឱ្យដឹងថា សត្វទន្សោងនោះបាត់បង់ជីវិតដោយសារជាប់អន្ទាក់ជើងក្រោយផ្នែកខាងស្តាំ (ដាច់ពីអន្ទាក់) ត្រូវបានឆ្កែដេញខាំ ហើយម្ចាស់ឆ្កែវាយថែមធ្វើឱ្យបាត់បង់ជីវិតតែម្តង។ បច្ចុប្បន្នសត្វនេះត្រូវបានដឹកយកទៅទីស្នាក់ការកណ្តាលសង្ឃរុក្ខវ័ន ដើម្បីធ្វើពិធីបង្សុកូល និងបញ្ចុះនៅទីនោះ។
ក្រុមល្បាតសង្ឃរុក្ខវ័នបញ្ជាក់ថា៖ «បានជួបប្រទះសត្វទន្សោង ១ ក្បាលជាប់អន្ទាក់ជើងក្រោយខាងស្តាំដាច់កជើង។ ក្រុមការងារយើងបានឮសំឡេងឆ្កែព្រុសក៏ទៅមើលឃើញជនល្មើសកំពុងតែវ៉ៃយកស្នែងសត្វទន្សោងឱ្យស្លាប់ ក្រុមជនល្មើសមានគ្នា ៤ ទៅ ៥ នាក់ បានឃើញក្រុមការងារយើងមុន ក៏គេចខ្លួនបាត់ទៅ»។
ក្រុមការងារសង្ឃរុក្ខវ័នបញ្ជាក់បន្ថែមថា សាកសពសត្វទន្សោងនេះបានដឹកយកមកបញ្ចុះបង្សុកូលនៅទីស្នាក់ការកណ្តាលសហគមន៍រួចនៅវេលាម៉ោង ៦ និង ៤៥ នាទីថ្ងៃខែឆ្នាំដដែល៕