ព្រះសីហនុៈ លោក ឡុង ឌីម៉ង់ អភិបាលរងខេត្តព្រះសីហនុថ្លែងថា គណនេយ្យភាពសង្គមមានសារៈសំខាន់ក្នុងការចូលរួមចំណែកដល់ការពង្រឹងអភិបាលកិច្ចនៅតាមថ្នាក់មូលដ្ឋាន និងជំរុញការចូលរួមរបស់ប្រជាពលរដ្ឋ ព្រមទាំងសំខាន់ក្នុងការផ្ដល់សេវាសាធារណៈ សេវារដ្ឋបាល ការអភិវឌ្ឍសេដ្ឋកិច្ច និងសង្គមនៅក្នុងមូលដ្ឋាន។
លោក ឡុង ឌីម៉ង់ ថ្លែងបែបនេះក្នុងពេលគណៈប្រតិភូគណៈកម្មាធិការគ្រប់គ្រងការអនុវត្តផែនការយុទ្ធសាស្ត្រគណៈនេយ្យភាពសង្គម បានធ្វើដំណើរទស្សនកិច្ចស្វែងយល់អំពីការអនុវត្តផែនការការងារគណៈនេយ្យភាពសង្គមនៅរដ្ឋបាលថ្នាក់ក្រោមជាតិនៅខេត្តព្រះសីហនុ កាលពីថ្ងៃទី ១៧ ខែកុម្ភៈ ឆ្នាំ ២០២២។
ការធ្វើទស្សនកិច្ចនេះមានការចូលរួមពីលោកស្រី ឃុន រចនា អនុរដ្ឋលេខាធិការក្រសួងអប់រំយុវជន និងកីឡា និងជាសមាជិក គ.គ.អ.ស និង តំណាងអង្គការដៃគូ។
លោក ឡុង ឌីម៉ង់ អភិបាលរងខេត្តព្រះសីហនុលើកឡើងថា គោលនយោបាយកំណែទម្រង់វិមជ្ឈការ និងវិសហមជ្ឈការបានបង្ហាញឱ្យឃើញនូវឆន្ទៈដ៏មោះមុតរបស់រាជរដ្ឋាភិបាលក្នុងកិច្ចដំណើរការកំណែទម្រង់រដ្ឋបាលថ្នាក់មូលដ្ឋាន ពង្រឹងលទ្ធិប្រជាធិបតេយ្យ ជំរុញកិច្ចអភិវឌ្ឍន៍សេដ្ឋកិច្ច និងសង្គមចូលរួមចំណែកកាត់បន្ថយភាពក្រីក្រ។
លោកបញ្ជាក់ថា៖ «គណនេយ្យភាពសង្គម ក៏ជាឧបករណ៍ដ៏មានសារៈសំខាន់ក្នុងការចូលរួមចំណែកដល់ការពង្រឹងអភិបាលកិច្ចតាមបែបប្រជាធិបតេយ្យនៅថ្នាក់មូលដ្ឋាន និងធានាដល់ការបង្កើតនូវតម្លាភាព ជំរុញការចូលរួមរបស់ប្រជាពលរដ្ឋ ការយកចិត្តទុកដាក់លើតម្រូវការរបស់ប្រជាពលរដ្ឋ ក្រុមជនងាយរងគ្រោះក្នុងការធ្វើសេចក្តីសម្រេចចិត្តលើការវិភាជន៍ ការប្រើប្រាស់ និងការគ្រប់គ្រងធនធាន ព្រមទាំងការផ្ដល់សេវាសាធារណៈ សេវារដ្ឋបាល ការអភិវឌ្ឍសេដ្ឋកិច្ច និងសង្គមនៅក្នុងមូលដ្ឋាន»។
លោកបន្ថែមថា ទន្ទឹមនេះរដ្ឋបាលខេត្តបានខិតខំយកចិត្តទុកដាក់អនុវត្តនូវផែនការយុទ្ធសាស្ត្រគណនេយ្យភាពសង្គមដំណាក់កាលទី ២ (២០១៩-២០២៣) ឱ្យសម្រេចបាននូវគោលបំណង នៃកំណែទម្រង់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ។
លោកអភិបាលរងខេត្ត សង្ឃឹមយ៉ាងមុតមាំថា លទ្ធផលដែលទទួលបានពីដំណើរទស្សនកិច្ចសិក្សារបស់គណៈកម្មាធិការគ្រប់គ្រងការអនុវត្តផែនការយុទ្ធសាស្ត្រគណៈនេយ្យភាពសង្គមថ្នាក់ក្រោមជាតិនៅខេត្តព្រះសីហនុនាពេលនេះនឹងផ្ដល់ជាបទពិសោធន៍ និងអនុសាសន៍ល្អដែលជាធាតុចូលដ៏សំខាន់ដល់ក្រុមការងារគណនេយ្យភាពសង្គម ដើម្បីពង្រឹង និងពង្រីកវិសាលភាព នៃការអនុវត្តការងារគណនេយ្យភាពសង្គមឱ្យកាន់តែទទួលបានលទ្ធផលប្រសើរឡើងនាពេលអនាគត ឆ្លើយតបទៅនឹងតម្រូវការរបស់ប្រជាពលរដ្ឋ៕