ខេត្តកំពតៈ រដ្ឋបាលខេត្តកំពតនឹងចាក់វ៉ាក់សាំងការពារជំងឺកូវីដ ១៩ (ស៊ីណូវ៉ាក់) ដូសជំរុញ ឬ ដូសទី ៣ ជូនដល់កុមារដែលមានអាយុ ៦ ឆ្នាំ ដល់អាយុក្រោម ១២ ឆ្នាំ និងកុមារដែលមានអាយុ ៥ ឆ្នាំ ក្នុងខេត្តកំពតចាប់ពីថ្ងៃទី ២២ ខែកុម្ភៈ ខណៈការចាក់ដូសមូលដ្ឋាន (ដូសទី ១ និង ដូសទី ២) ជូនដល់កុមារដែលមាន អាយុ ៣ ឆ្នាំ ដល់ក្រោម ៥ ឆ្នាំ ចាប់ពីថ្ងៃទី ២៣ ខែកុម្ភៈ ឆ្នាំ ២០២២។
សេចក្តីជូនដំណឹងរបស់រដ្ឋបាលខេត្តកំពតដែលភ្នំពេញប៉ុស្តិ៍ទទួលបាននៅថ្ងៃទី ១៩ ខែកុម្ភៈនេះបានឱ្យដឹងថា រដ្ឋបាលខេត្តកំពតនឹងផ្តល់ការចាក់វ៉ាក់សាំង ដូសជំរុញ ឬ ដូសទី ៣ ដោយប្រើវ៉ាក់សាំង ស៊ីណូវ៉ាក់ជូនដល់កុមារ ដែលមានអាយុ ៦ ឆ្នាំ ដល់អាយុក្រោម ១២ ឆ្នាំ និង កុមារដែលមានអាយុ ៥ ឆ្នាំ ដែលបានចាក់វ៉ាក់សាំងកូវីដ ១៩ ដូសទី ១ និង ដូសទី ២ រួចរាល់ ហើយមានគម្លាតចាប់ពី ៤ ខែឡើង បន្ទាប់ពីការចាក់វ៉ាក់សាំងដូសទី ២ រួច។
ក្នុងលិខិតជូនដំណឹងបង្ហាញថា ការចាក់វ៉ាក់សាំងនេះនឹងធ្វើឡើងចាប់ពីថ្ងៃទី ២២ ខែ កុម្ភៈ ឆ្នាំ ២០២២ នេះតទៅពីម៉ោង ៨ ដល់ម៉ោង ១៧ (ដោយឈប់សម្រាកអាហារថ្ងៃត្រង់ចន្លោះម៉ោង ១២ ដល់ម៉ោង ១៤ នាទីរសៀល) ហើយពុំមានការឈប់សម្រាក ថ្ងៃសៅរ៍-អាទិត្យ និង ថ្ងៃបុណ្យឡើយ។
រដ្ឋបាលខេត្តកំពតបញ្ជាក់ថា៖ «សូមមេត្តារួសរាន់ទៅទទួលការចាក់វ៉ាក់សាំងដូសជំរុញឱ្យបានគ្រប់គ្នា និងយកមកជាមួយនូវបណ្ណចាក់វ៉ាក់សាំងលើកមុន ដើម្បីឱ្យក្រុមគ្រូពេទ្យបន្តបញ្ចូលទិន្នន័យក្នុងប្រព័ន្ធគ្រប់គ្រងការចាក់វ៉ាក់សាំង ហើយសូមប្រកាន់ភ្ជាប់នូវវិធានការ ៣ ការពារ និង ៣ កុំ និងរក្សាសណ្តាប់ធ្នាប់របៀបរៀបរយឱ្យបានល្អប្រសើរប្រកបដោយសេចក្តីថ្លៃថ្នូរ»។
រដ្ឋបាលខេត្តកំពតសង្ឃឹម និងជឿជាក់ថា កុមារ-សិស្សានុសិស្ស លោកគ្រូ អ្នកគ្រូ មាតា-បិតា និងអាណាព្យាបាលទាំងអស់ក្នុងខេត្តកំពតនឹងនាំកូន ក្មួយ បង ប្អូន មកចាក់វ៉ាក់សាំងឱ្យបានគ្រប់ៗគ្នា ដើម្បីការពារសុខភាពរួមចំណែកទប់ស្កាត់ការឆ្លងរាលដាលនៃជំងឺកូវីដ ១៩ ក្នុងសហគមន៍ជាពិសេសប្រភេទវីរុសបំប្លែងខ្លួនថ្មី។
ដោយឡែកការចាក់វ៉ាក់សាំងកូវីដ ១៩ (ស៊ីណូវ៉ាក់) ដូសមូលដ្ឋាន (ដូសទី ១ និង ដូសទី ២) ជូនដល់កុមារដែលមានអាយុ ៣ ឆ្នាំ ដល់ក្រោម ៥ ឆ្នាំ នៅក្នុងខេត្តកំពតនឹងធ្វើឡើងចាប់ពីថ្ងៃទី ២៣ ខែកុម្ភៈ ឆ្នាំ ២០២២។
រដ្ឋបាលខេត្តកំពតបានរំឭក មាតាបិតា អាណាព្យាបាលទាំងអស់ឱ្យនាំកុមារដែលមានអាយុ ៥ ឆ្នាំ មកចាក់វ៉ាក់សាំងនៅតាមទីតាំងដែលកំណត់ក្នុងតារាងដែលបង្ហោះក្នុងហ្វេសប៊ុករដ្ឋបាលខេត្ត និង សូមយកមកជាមួយនូវ៖ សំបុត្រកំណើត ឬ សំបុត្របញ្ជាក់កំណើត ឬ សៀវភៅគ្រួសារ ឬ សៀវភៅស្នាក់នៅ ឬ លិខិតបញ្ជាក់ពីអាជ្ញាធរមូលដ្ឋាន ដើម្បីឱ្យក្រុម គ្រូពេទ្យធ្វើប័ណ្ណចាក់វ៉ាក់សាំងជូន និងបញ្ចូលទិន្នន័យក្នុងប្រព័ន្ធគ្រប់គ្រងការចាក់វ៉ាក់សាំង ហើយសូមប្រកាន់ភ្ជាប់នូវវិធានការ ៣ ការពារ និង ៣ កុំ និង រក្សាសណ្តាប់ធ្នាប់របៀបរៀបរយឱ្យបានល្អប្រសើរប្រកបដោយសេចក្តីថ្លៃថ្នូរ។
រដ្ឋបាលខេត្តកំពត សង្ឃឹម និងជឿជាក់ថា អាណាព្យាបាលទាំងអស់នឹងយកចិត្តទុកដាក់នាំកូនមកចាក់វ៉ាក់សាំងកូវីដ ១៩ ឱ្យបានគ្រប់ៗគ្នា ដើម្បីការពារសុខភាព រួមចំណែកទប់ស្កាត់ការឆ្លងរាលដាលនៃជំងឺកូវីដ ១៩ ក្នុងសហគមន៍៕