.jpg)
អាជ្ញាធរជាតិអប្សរា។
សៀមរាបៈ អាជ្ញាធរជាតិអប្សរាដាក់ឱ្យដំណើរការគេហទំព័រទម្រង់ថ្មីចាប់ពីថ្ងៃទី១៩ ខែកុម្ភៈ ឆ្នាំ ២០២២ តទៅ ដើម្បីអបអរសាទរខួប២៧ឆ្នាំ នៃការបង្កើតអាជ្ញាធរជាតិអប្សរា។
តាមរយៈលិខិតរបស់អាជ្ញាធរជាតិអប្សរាដែលភ្នំពេញប៉ុស្តិ៍ ទទួលបាននៅថ្ងៃទី១៩ ខែកុម្ភៈនេះបានឱ្យដឹងថា ចាប់តាំងពីខែមេសា ឆ្នាំ ២០២១ កន្លងមក អាជ្ញាធរជាតិអប្សរា បានចាប់ផ្តើមកែលម្អគេហទំព័រដែល មានអាសយដ្ឋាន www.apsaraauthority.gov.kh។
បច្ចុប្បន្នគេហទំព័រនេះ ត្រូវបានកែសម្រួល រួចរាល់ជាស្ថាពរ ក្នុងនោះបានបញ្ចូលព័ត៌មានសំខាន់ៗមួយចំនួនដូចជា លិខិតបទដ្ឋានគតិយុត្តនានាពាក់ព័ន្ធនឹងអាជ្ញាធរជាតិអប្សរា ឯកសារទិន្នន័យរបស់អាជ្ញាធរជាតិអប្សរា ព័ត៌មានអំពីប្រាសាទនានាក្នុងតំបន់រមណីយដ្ឋានអង្គរ រចនាសម្ព័ន្ធគ្រប់គ្រងអាជ្ញាធរជាតិអប្សរា កិច្ចសហប្រតិបត្តិការអន្តរជាតិនៅតំបន់រមណីយដ្ឋានអង្គរ ព្រឹត្តិការណ៍សំខាន់ៗនៅតំបន់រមណីយដ្ឋានអង្គរនិង សារព័ត៌មានពាក់ព័ន្ធដែលបានសហការចុះផ្សាយការងាររបស់អាជ្ញាធរជាតិអប្សរា។
អាជ្ញាធរជាតិអប្សរាបញ្ជាក់ថា៖ «ក្នុងន័យនេះ អាជ្ញាធរជាតិអប្សរានឹងដាក់ឱ្យដំណើរការគេហទំព័រទម្រង់ថ្មីចាប់ពីថ្ងៃទី១៩ ខែកុម្ភៈ ឆ្នាំ ២០២២ តទៅ ដើម្បីអបអរសាទរខួប ២៧ឆ្នាំ នៃការបង្កើតអាជ្ញាធរជាតិអប្សរា»។
ទន្ទឹមនឹងការដាក់ឱ្យដំណើរការគេហទំព័រទម្រង់ថ្មីនេះ អាជ្ញាធរជាតិអប្សរាក៏បាននិងកំពុងធ្វើការកែសម្រួលគេហទំព័រអង្គរផងដែរ (angkor.com.kh) ហើយនឹងបង្កើតបណ្តាញទំនាក់ទំនងសង្គមមួយចំនួនទៀតនាពេលខាងមុខរួមមាន៖ Instagram, LinkedIn, Telegram Chanel និង APSARA Newsletter ក្នុងគោលដៅដើម្បីឱ្យការផ្សព្វផ្សាយព័ត៌មានរបស់អាជ្ញាធរជាតិអប្សរាកាន់តែមានភាពទូលំទូលាយបន្ថែមទៀត៕
