កែបៈ រដ្ឋបាលខេត្តកែប ប្រកាសឱ្យម្ចាស់ក្រុមហ៊ុន ពាណិជ្ជករ អាជីវករ សេវាករ ដែលប្រកបអាជីវកម្ម សេវាកម្ម ពាក់ព័ន្ធវិស័យព័ត៌មាន ទៅបំពេញសំណុំបែបបទបង់ថ្លៃសេវាផ្សព្វផ្សាយ សុំការអនុញ្ញាតបើកថ្មី ឬបន្តសុពលភាព សម្រាប់ឆ្នាំ ២០២២ ឱ្យបានមុនថ្ងៃទី ២៩ មេសា ឆ្នាំ ២០២២។
លិខិតជូនដំណឹងរបស់រដ្ឋបាលខេត្តកែប ដែលភ្នំពេញប៉ុស្តិ៍ ទទួលបាន នៅថ្ងៃទី១៩ កុម្ភៈ ឱ្យដឹងថា ចំពោះលោកលោកស្រី ដែលជាម្ចាស់ក្រុមហ៊ុន ពាណិជ្ជករ អាជីវករ សេវាករ ដែលប្រកបអាជីវកម្ម សេវាកម្ម ពាក់ព័ន្ធវិស័យព័ត៌មាន មានដូចជា ស្ថានីយវិទ្យុ ទូរទស្សន៍ និងទូរទស្សន៍ខ្សែកាប សហគ្រាស ឬ គ្រឹះស្ថានបោះពុម្ពផ្សាយ និងរោងពុម្ព បោះពុម្ពដោយដៃ(អូសស្បៃ) បោះពុម្ពលើអាវយឺត ធៀបការ អគារលក់កាសែត សៀវភៅ និងផលិតផលបោះពុម្ពផ្សេងៗទៀត អគារលក់ និងជួសជុលម៉ាញ៉េ វិទ្យុ ទូរទស្សន៍ អាំភ្លឺ មេក្រូរ៉ូណេអូ អគារលក់ និងជួសជុលកុំព្យូទ័រ និងបរិក្ខារគ្រប់ប្រភេទ អគារថតចម្លងឯកសារ វាយកុំព្យូទ័រ(អត្ថបទ) និងបោះពុម្ពផ្សេងៗ អគារលក់ និងជួសជុលម៉ាស៊ីនថត ម៉ាស៊ីនថតចម្លង Internet Caté។
អាជីវកម្មសេវាកម្មផ្សព្វផ្សាយពាណិជ្ជកម្មគ្រប់ប្រភេទ តាមរយៈ អាហ្វីស ប៉ាណូ ប័ណ្ណប្រកាស ប៉ាណូយីហោ ស្លាកសញ្ញាផ្សាយពាណិជ្ជកម្មផ្សេងៗ តាមទីសាធារណៈនិងជាប់អគារពាណិជ្ជកម្ម ការផ្សព្វផ្សាយពាណិជ្ជកម្មតាមទូរទស្សន៍ (LED) ការផ្សព្វផ្សាយពាណិជ្ជកម្ម តាមអត្រាពាណិជ្ជកម្ម ក្រុមហ៊ុន ធនាគារ គ្រឹះស្ថានមីក្រូហិរញ្ញវត្ថុ និងស្ថានីយប្រេងឥន្ធនៈនានា និងផ្ទាំងផ្សព្វផ្សាយពាណិជ្ជកម្មតាមទីសាធារណៈ ការផ្សព្វផ្សាយពាណិជ្ជកម្មតាមមធ្យោបាយដឹកជញ្ជូនគ្រប់ប្រភេទ (រថយន្ត ម៉ូតូ រ៉ឺម៉ក។ល។) ការផ្សព្វផ្សាយតាមប្រព័ន្ធអេឡិចត្រូនិក គេហទំព័រ កាសែត ព្រឹត្តិបត្រ ទស្សនាវដ្ដី វិទ្យុ ទូរទស្សន៍និងទូរទស្សន៍ខ្សែកាប។
លោក-លោកស្រី ដែលប្រកបអាជីវកម្ម ដូចបានជម្រាបជូនខាងលើនេះ សូមមកបំពេញសំណុំបែបបទបង់ថ្លៃសេវាផ្សព្វផ្សាយ សុំការអនុញ្ញាតបើកថ្មី ឬបន្តសុពលភាព សម្រាប់ឆ្នាំ២០២២។ ក្នុងករណីខកខានមិនបានបង់សេវាកាលពី ឆ្នាំ២០១៩ បន្តបន្ទាប់រហូតមកដល់ ឆ្នាំ២០២២ នេះ។ រដ្ឋបាលខេត្តកែប ស្នើសុំដល់ លោក-លោកស្រី ដែលប្រកបអាជីវកម្ម ត្រូវមកបង់ប្រាក់ថ្លៃសេវាផ្សព្វផ្សាយសរុបចូលរដ្ឋ តាមច្បាប់ ដែលបានកំណត់នៅអង្គភាពច្រកចេញចូលតែមួយរបស់រដ្ឋបាលខេត្ត ដែលមានទីតាំងស្ថិតក្នុងបរិវេណសាលាខេត្តកែប។
ដោយឡែក ស្លាកយីហោ ឬស្លាកសញ្ញាផ្សេងៗ ដែលមានទំហំក្រោម ៤ម៉ែត្រការ៉េចុះ ហើយជាប់នឹងអគារពាណិជ្ជកម្ម លោក-លោកស្រី ត្រូវសុំការអនុញ្ញាត នៅការិយាល័យច្រកចេញចូលតែមួយ របស់រដ្ឋបាលក្រុង-ស្រុក លើកលែងតែនៅតាមសាធារណៈ ត្រូវសុំការអនុញ្ញាតនៅអង្គភាពច្រកចេញចូលតែមួយ របស់រដ្ឋបាលខេត្តកែប។
រដ្ឋបាលខេត្តកែបបញ្ជាក់ថា៖«ក្នុងករណីម្ចាស់ក្រុមហ៊ុន ពាណិជ្ជករ អាជីវករទាំងឡាយណា ដែលមិនបានគោរព និងអនុវត្តតាមការជូនដំណឹងខាងលើ រដ្ឋបាលខេត្តកែប នឹងអនុវត្តតាមនីតិវិធីរដ្ឋបាល ដោយធ្វើការផាកពិន័យ ឬផ្អាកជាបណ្តោះអាសន្ន ឬបិទការធ្វើអាជីវកម្មជាស្ថាពរ»។
ចំពោះក្រុមហ៊ុនពាណិជ្ជករ អាជីវករទាំងឡាយណា ដែលមិនមកស្នើសុំបង់ថ្លៃសេវាផ្សព្វផ្សាយពាណិជ្ជកម្ម សុំការអនុញ្ញាតបើកថ្មី ឬបន្តសុពលភាពលើកស្លាកយីហោ អាហ្វីស ប៉ាណូ ប័ណ្ណប្រកាស ប៉ាណូយីហោ របារកាត់ទទឹងផ្លូវ ផ្ទាំង LED ស្លាកសញ្ញាផ្សព្វផ្សាយពាណិជ្ជកម្មផ្សេងៗតាមទីសាធារណៈ និងជាប់អគារពាណិជ្ជកម្មនោះទេ រដ្ឋបាលខេត្ត និងអនុវត្តតាមនីតិវិធីរដ្ឋបាល និងចុះធ្វើការរុះរើនូវផ្ទាំងផ្សព្វផ្សាយពាណិជ្ជកម្មទាំងនោះ ដោយបន្ទុកចំណាយ និងរាល់ការខូចខាតម្ចាស់ទីតាំងអាជីវកម្មជាអ្នកទទួលខុសត្រូវ។ ករណីធ្វើឱ្យប៉ះពាល់ដល់ទំនៀមទម្លាប់ ប្រពៃណីជាតិ សោភណភាព សិទ្ធិបុគ្គល និងសន្តិសុខសណ្តាប់ធ្នាប់សង្គម ម្ចាស់អាជីវកម្ម-សេវាកម្ម ត្រូវទទួលខុសត្រូវចំពោះមុខច្បាប់ជាធរមាន។
អាស្រ័យហេតុនេះ ដើម្បីឱ្យស្ថាប័នមានសមត្ថកិច្ច ងាយស្រួលក្នុងការគ្រប់គ្រង ម្ចាស់ក្រុមហ៊ុន អាជីវករ-ពាណិជ្ជករទាំងអស់ មេត្តាមកដាក់ពាក្យសុំអនុញ្ញាតមុននឹងដំណើរការ ឬសុំបន្តសុពលភាពឱ្យបានមុន ថ្ងៃទី២៩ ខែមេសា ឆ្នាំ២០២២ ជាកំណត់។
លោករស់ ឧត្តុង ប្រធានមន្ទីរព័ត៍មានខេត្តកែបថ្លែងនៅថ្ងៃទី២០ ខែកុម្ភៈ ថា ជាការកត់សម្គាល់ក្នុងពេលកន្លងមកមានម្ចាស់ក្រុមហ៊ុន សេវាកម្ម អាជីវកម្មមួយចំនួនដែលពាក់ព័ន្ធក្នុងវិស័យព័ត៌មានបានភ្ញាក់រឭកចូលខួនបង់ពន្ធបានត្រឹមត្រូវ។ ប៉ុន្តែនៅមានអ្នកមួយចំនួនមិនបានបង់ពន្ធនៅឡើយ ហេតុនេះការចេញសេចក្តីជូនដំណឹងរបស់រដ្ឋបាលខេត្ត គឺដើម្បីក្រើនរំឭកដល់អ្នកដែលមិនទាន់បានបង់ពន្ធទាំងនោះ មុនធ្វើការអនុវត្តច្បាប់។ លោកប្រធានមន្ទីរព័ត៌មានប្រាប់ថា កន្លងមកអាជ្ញាធរមានការយោគយល់ដោយសារតែបញ្ហាកូវីដ១៩ ខ្លាចប៉ះពាល់ដល់អាជីវកម្មមួយចំនួន។
លោកថ្លែងថា៖«ការបង់ពន្ធ គឺមានសារៈសំខាន់ ព្រោះវាជាចំណូលមួយសម្រាប់វិស័យរបស់រដ្ឋ ព្រោះនេះមិនមែនប្រមូលចូលក្នុងវិស័យអង្គភាព ឬក៏បុគ្គលអីទេ គឺប្រមូលចូលថវិការដ្ឋតែម្តង»៕