តាកែវ/កំពត: អង្គការជីវិតធម្មជាតិ និងមន្ដ្រីឧទ្យានុរក្សប្រចាំការក្នុងតំបន់ការពារទេសភាពបឹងព្រែកល្ពៅខេត្តតាកែវ និងតំបន់ការពារទេសភាពអន្លង់ព្រីង ខេត្តកំពត កាលពីខែមករាឆ្នាំ២០២២ បានធ្វើជំរឿនសត្វស្លាបអាស៊ីប្រចាំឆ្នាំ ជាលទ្ធផលបានកត់ត្រាសត្វស្លាបចំនួន ៧៨ ប្រភេទក្នុងតំបន់ការពារទេសភាពបឹងព្រែកល្ពៅដែលជាចំនួនមានការកើនឡើងនិងសត្វស្លាបចំនួន ៥២ ប្រភេទក្នុងតំបន់ការពារទេសភាពអន្លង់ព្រីងជាចំនួនថេរបើធៀបនឹងឆ្នាំមុន។ នេះបើតាមលោក ប៊ូ វរសក្ស នាយកកម្មវិធីប្រចាំកម្ពុជានៃអង្គការជីវិតសត្វស្លាបអន្តរជាតិ។
លោក ប៊ូ វរសក្ស ថ្លែងប្រាប់ ភ្នំពេញ ប៉ុស្ដិ៍ នៅថ្ងៃទី ២០ កុម្ភៈនេះថា ការធ្វើជំរឿនសត្វស្លាបអាស៊ី ត្រូវបានប្រព្រឹត្តិទៅនៅតំបន់ការពារទេសភាពបឹងព្រែកល្ពៅ ខេត្តតាកែវ និងតំបន់ការពារទេសភាពអន្លង់ព្រីង ខេត្តកំពត។ សកម្មភាពអង្កេតតាមដានជីវចម្រុះនេះ គឺត្រូវបានធ្វើឡើងជារៀងរាល់ឆ្នាំដោយមន្ត្រីអង្កេតតាមដានទីវាលអង្គការជីវិតធម្មជាតិ និងមន្ដ្រីឧទ្យានុរក្សប្រចាំការក្នុងតំបន់ការពារទេសភាពទាំង ២ នេះ ដែលគាំទ្រដោយអង្គការ BirdLifeនិងអង្គការជីវិតធម្មជាតិនៅកម្ពុជា។
លោកបញ្ជាក់ថា៖ «ជាលទ្ធផល សត្វស្លាបចំនួន ៧៨ ប្រភេទ ក្នុងតំបន់ការពារទេសភាពបឹងព្រែកល្ពៅ និងសត្វស្លាបចំនួន ៥២ ប្រភេទក្នុងតំបន់ការពារទេសភាពអន្លង់ព្រីង ត្រូវបានប្រទះឃើញ និងកត់ត្រាទុក។ ចំនួនប្រភេទសត្វស្លាបនៅក្នុងតំបន់ការពារទេសភាពបឹងព្រែកល្ពៅមានការកើនឡើងបើធៀបនឹងឆ្នាំ ២០២០ ចំណែកនៅតំបន់ទេសភាពអន្លង់ព្រីងគឺនៅមានចំនួនថេរ»។
តាមរយៈការធ្វើជំរឿននេះ ក្រុមការងារបានរកឃើញថា មានចំនួន សត្វស្លាបដែលដែលជិតផុតពូជបំផុត គឺចាបព្រៃវែង និងសត្វស្លាបដែលកំពុងរងគ្រោះជាសកល គឺសត្វក្រៀល កំពុងមានវត្ដមានកើនឡើងក្នុងតំបន់ទេសភាពបឹងព្រែកល្ពៅ។
លោក វរសក្ស បញ្ជាក់ថា ចាបព្រៃវែងបាននៅតែបន្តមានវត្តមាននៅតំបន់ការពារទេសភាពបឹងព្រែកល្ពៅរាប់ពាន់ក្បាល ចាប់តាំងពីខែធ្នូដល់ខែមេសា នាប៉ុន្មានឆ្នាំចុងក្រោយនេះ។ ការកើនឡើងនៃចំនួនសត្វស្លាបនេះ គឺបានបញ្ជាក់ថាការថែរក្សា និងអភិរក្សធនធានធម្មជាតិនៅក្នុងតំបន់ទេសភាពទាំង២នេះនៅកម្ពុជាបានល្អ តាមរយៈគម្រោងអភិរក្ស និងគ្រប់គ្រងតំបន់ការពារទេសភាពបឹងព្រែកល្ពៅ និងអន្លង់ព្រីង ដោយមានការសហការអនុវត្តដោយក្រសួងបរិស្ថាន អង្គការជីវិតធម្មជាតិនៅកម្ពុជា BirdLife ជាដើម។
លោកបានស្នើដល់ក្រសួងបរិស្ថាន និងអាជ្ញាធរពាក់ព័ន្ធបន្តពង្រឹងការការពារ និងអនុវត្ដច្បាប់បន្ថែមទៀតដើម្បីការពារតំបន់បឹងព្រែកល្ពៅ និងតំបន់ការពារទេសភាពអន្លង់ព្រីង ខណៈបច្ចុប្បន្ននេះតំបន់ទាំង២ អាចរងគ្រោះដោយសារការទន្ទ្រានយកពីជនខិលខូចមួយចំនួនដែលបណ្ដាលឱ្យប៉ះពាល់ដល់ការបំលាស់ទី និងការរស់នៅរបស់សត្វស្លាបជាប្រចាំឆ្នាំរបស់ពួកវា៕
វីដេអូ៖