ភ្នំពេញៈ ព្រះរាជាណាចក្រកម្ពុជានៅថ្ងៃទី ២០ ខែ កុម្ភៈ ឆ្នាំ ២០២២ នេះ បានបន្តបញ្ជូនកងទ័ពមួកខៀវប្តូរវេនចំនួននាក់ ២១៩ ក្នុងនោះមានស្ត្រីចំនួន ២៨ នាក់ ចេញទៅបំពេញបេសកកម្មមនុស្សធម៌ ក្រោមឆត្រអង្គការសហប្រជាជាតិ នៅសាធារណរដ្ឋអាហ្វ្រិកកណ្តាល។ សម្រាប់កម្លាំងកងទ័ពមួកខៀវ ដែលបញ្ជូនទៅបំពេញបេសកកម្មនោះរួមមាន កងវិស្វកម្មលេខ ៤៣២ ចេញបំពេញបេសកកម្មអង្គការសហប្រជាជាតិ នៅសាធារណរដ្ឋអាហ្វ្រិកកណ្តាល។ ពិធីជូនដំណើរកងទ័ពមួកខៀវកម្ពុជាទាំង ២១៩ នាក់នេះ បានប្រព្រឹត្តធ្វើឡើងក្រោមអធិបតីភាពលោក សែម សុវណ្ណនី អគ្គនាយគ្គនាយកមជ្ឈមណ្ឌលជាតិគ្រប់គ្រង កងកម្លាំងរក្សាសន្តិភាព បោសសម្អាតមីន និងកាកសំណល់សង្គ្រាម ព្រមទាំងថ្នាក់ដឹកនាំកងទ័ពមួកខៀវមួយចំនួននៅព្រលានយន្តហោះអន្តរជាតិភ្នំពេញ។
លោក សែម សុវណ្ណនី ថ្លែងនៅក្នុងពិធីនេះបេសកកម្មនៅសាធារណរដ្ឋអាហ្វ្រិកកណ្តាលនេះជាឆ្នាំទី៨ហើយកងវិស្វកម្មពហុជំនាញលេខ ៤៣២ ក៏ជាកងទី៨ ដែលបន្តទទួលបានទំនុកចិត្ត និងភារកិច្ចពី អ.ស.ប ក្នុងការចូលរួមចំណែកស្វែងរកសុខសន្តិភាព ជូនប្រទេសដែលរងដោយជម្លោះដូចបណ្តាកងមុនៗដែរ។
លោកថ្លែងថា៖ «នៅថ្ងៃនេះ គឺជាមោទនភាពថ្មីមួយទៀត សម្រាប់ជាតិមាតុភូមិយើង ដែលវីរយុទ្ធជន យុទ្ធនារីយើងបានខិតខំហ្វឹកហាត់អស់រយៈពេលជាយូរទទួលបាននូវក្តីសង្ឃឹម និងទំនុកចិត្តយ៉ាងពិត ប្រាកដពីអង្គការសហប្រជាជាតិ និងប្រមុខរាជរដ្ឋាភិបាល ដើម្បីយកចំណេះ ជំនាញទាំងនេះ ទៅអនុវត្តផ្ទាល់នៅលើសមរភូមិ។ កងនេះក៏ត្រូវបានបន្ថែមកម្លាំងចំនួន ១៥ នាក់ ផ្នែកកម្ទេចគ្រឿងផ្ទុះលើ កម្លាំងមុនៗចំនួន ២០៤ នាក់ ដែលកម្លាំងសរុបកើនឡើង ចំនួន ២១៩ នាក់»។
លោក សែម សុវណ្ណនី បានក្រើនរំឭកដល់កងកម្លាំងទាំងអស់គ្នា បន្តរួមសាមគ្គីគ្នាជាធ្លុងមួយ ដើម្បីប្រយោជន៍រួម។ នៅពេលឡើងយន្តហោះត្រូវមានម្ចាស់ការលើសម្ភារខ្លួនឯង ត្រួតពិនិត្យឱ្យបានគ្រប់ជ្រុងជ្រោយមិនត្រូវនាំយកវត្ថុហាមឃាត់ឡើងលើយន្តហោះឡើយ និងត្រូវចេះរៀបចំអង្គុយជាក្រុម។ ក្នុងចំណោមកងកម្លាំងចំនួន ១០ នាក់ត្រូវមានអ្នកចេះភាសាអង់គ្លេស ដើម្បីជួយទំនាក់ទំនងជាមួយពហុនិការ និងក្នុងការបំពេញបែបបទ ឯកសារ នៅពេលមានតម្រូវការ។ ពេលចុះយន្តហោះក៏ត្រូវបែងចែកភារកិច្ចក្នុងការយកសម្ភារបុគ្គល សម្ភាររួមទៅរៀបចំឱ្យ មានស្តង់ដារ និងអនាម័យនៅតាមកន្លែងស្នាក់នៅ និងក្នុងបន្ទាយដោយមានបង់លេខសម្គាល់ឱ្យបានត្រឹមត្រូវ។ ត្រូវចាត់ទុកទ្រព្យសម្បត្តិ អង្គភាព ដូចជាទ្រព្យរបស់ខ្លួនឯងដូច្នេះដែរ។
លោកថ្លែងថា៖«កម្លាំងទាំងអស់ ត្រូវគិតពីសុវត្ថិភាពជាចម្បង ពិសេសអំឡុងពេលអនុវត្ត ភារកិច្ច មិនត្រូវមើលស្រាលស្ថានការណ៍ណាមួយឡើយ ហើយត្រូវចេះដកបទពិសោធន៍ និងមេរៀនល្អៗកែតម្រូវរាល់កំហុសឆ្គងដែល បានកើតមានឡើងដើម្បីសម្រេចបានជោគជ័យជូនជាតិ មាតុភូមិ ក្រុមគ្រួសារ និងខ្លួនយើងផ្ទាល់»។
លោក សុវណ្ណនី បានដាស់តឿនបន្ថែមដល់មេកង មេផ្នែក មេក្រុម មិនត្រូវ «ធូររលុងចំពោះខ្លួនឯង តឹងតែងចំពោះអ្នកដទៃ» ហើយត្រូវដាក់ផែនការការងារច្បាស់លាស់ចៀសវាងទំនេរ មកបង្កើតរឿង ដែលអាចឈានដល់ការឈ្លោះទាស់ទែងគ្នា។
លោកថ្លែងថា៖ «ត្រូវចងចាំថាវត្តមានរបស់កម្លាំងយើងនីមួយៗមិនត្រឹមតែតំណាងឱ្យអង្គការសហប្រជាជាតិ កងយោធពលខេមរភូមិន្ទ ឬមជ្ឈមណ្ឌលជាតិតែប៉ុណ្ណោះទេ គឺតំណាងឱ្យប្រទេសកម្ពុជាទាំងមូល។ ដូច្នេះគ្រប់សកម្មភាពទាំងក្នុងនិងក្រៅម៉ោងធ្វើការត្រូវគិតដល់កិត្តិយសជាតិជាចម្បង»។
លោកបន្តថា ខណៈពេលដែលស្ថានការណ៍ជំងឺកូវីដ ១៩ បន្តការរាតត្បាតនៅទូទាំងពិភពលោក ពិសេសក្នុងតំបន់បេសកកម្ម ដែលកម្ពុជាឈរជើងត្រូវតែអនុវត្តយ៉ាងម៉ឺងម៉ាត់ឱ្យខាងតែបានតាមការណែនាំរបស់អង្គការសហប្រជាជាតិ និងការណែនាំរបស់ក្រសួងសុខាភិបាល នៃរាជរដ្ឋាភិបាលកម្ពុជា ដើម្បីបញ្ចៀសពីការឆ្លងមេរោគដ៏កាចសាហាវនេះ។ លោករំឭកថា កម្ពុជាក៏មានវិប្បដិសារីក្នុងការបាត់បង់យុទ្ធជន ១រូប ដោយសារមេរោគឥតស្រមោលនេះនៅប្រទេសម៉ាលីម្តងរួចមកហើយ ដូច្នេះកុំឱ្យដានប្រវត្តិសាស្ត្រនេះកើតឡើងជាថ្មីម្តងទៀត។
លោកបញ្ជាក់ថា៖ «ក្នុងបរិបទនេះកម្ពុជាដែលធ្លាប់ឆ្លងកាត់សង្គ្រាមហែកហួរជិត ៣ ទសវត្ស ហើយទើបទទួលបានសន្តិភាពពេញលេញទូទាំងផ្ទៃប្រទេសនាឆ្នាំ១៩៩៨ ក្រោមនយោបាយឈ្នះ-ឈ្នះ របស់សម្តេចតេជោ ហ៊ុន សែន បានធ្វើសមាហរណកម្ម ពីក្នុងតំបន់អាស៊ី ដោយបោះជំហានពង្រីកវិសាលភាពនៃបទពិសោធន៍ដ៏ផូផង់របស់ខ្លួន ចូលរួមចំណែកបេសកកម្មរក្សាសន្តិភាព នៅប្រទេសចំនួន៩ មាន១០បេសកកម្ម នាទ្វីបអាហ្វ្រិក មជ្ឈឹមបូព៌ា និងអឺរ៉ុប ចាប់តាំងពីឆ្នាំ ២០០៦ រហូតដល់បច្ចុប្បន្ន និងតទៅអនាគត»៕