បន្ទាយមានជ័យៈ បុរសជាឪពុកចុងម្នាក់ត្រូវបានតុលាការខេត្តបន្ទាយមានជ័យធ្វើការចោទប្រកាន់ និងបញ្ជូនទៅឃុំខ្លួនក្នុងពន្ធនាគារខេត្តពីថ្ងៃទី ១៨ កុម្ភៈ ១ ថ្ងៃបន្ទាប់ពីនគរបាលចាប់ខ្លួន ពាក់ព័ន្ធនឹងការចាប់កូនស្រីចុងអាយុ ១៥ ឆ្នាំរំលោភសេពសន្ថវៈនៅឃុំសូភី ស្រុកអូរជ្រៅ។
លោកស្រី ឌី សុជាតិ ស្នងការរងទទួលផែនការងារនគរបាលប្រឆាំងការជួញដូរមនុស្ស និងការពារអនីតិជនខេត្តបន្ទាយមានជ័យ ប្រាប់ភ្នំពេញប៉ុស្តិ៍នៅថ្ងៃទី ២០ កុម្ភៈ ថា ជនសង្ស័យឈ្មោះ ខាន់ សាវុធ អាយុ ៤០ ឆ្នាំ។ រីឯក្មេងស្រីរងគ្រោះឈ្មោះ ន.រ អាយុ ១៥ ឆ្នាំ។ ពួកគេរស់នៅ ឃុំ សូភី ស្រុកអូរជ្រៅ ។ «តុលាការបានចោទជនសង្ស័យពីបទរំលោភសេពសន្ថវៈមានស្ថានទម្ងន់ទោសដោយបុគ្គលដែលមានអំណាចទៅលើជនរងគ្រោះតាមមាត្រា ២៤០ នៃក្រមព្រហ្មទណ្ឌ»។
យោងបញ្ញត្តិមាត្រា ២៤០ នៃក្រមព្រហ្មទណ្ឌនេះ ប្រសិនបើតុលាការរកឃើញថាជនត្រូវចោទពិតជាបានប្រព្រឹត្តមែននោះនឹងត្រូវជាប់ពន្ធនាគារពី ៧ ទី ១៥ ឆ្នាំ។
តាមរបាយការណ៍របស់សមត្ថកិច្ចស្រុកអូរជ្រៅបង្ហាញថា មុនពេលកើតហេតុកាលពីថ្ងៃទី ១៥ ខែកុម្ភៈ ឆ្នាំ ២០២២ ជនសង្ស័យ និងប្រពន្ធចុងរួមទាំងក្មេងស្រីរងគ្រោះបាននាំគ្នាទៅលេងកូនប្រុសម្នាក់ជាកូនប្រពន្ធចុងបួសនៅវត្ត ភ្នំដី ឃុំតាគង់ ស្រុកម៉ាឡៃ។ លុះ ត្រឡប់មកពីវត្តវិញយប់កណ្តាលផ្លូវក៏នាំគ្នាសុំផ្ទះបុរសឈ្មោះ ប៉ុច អាយុ ៤០ឆ្នាំ នៅភូមិគុត្តសត ឃុំគុត្តសត ស្រុកអូរជ្រៅ ដើម្បីស្នាក់នៅមួយយប់។ នៅយប់នោះពួកគេត្រូវបានម្ចាស់ផ្ទះរៀបចំបាយឱ្យហូបបន្ទាប់មកជនសង្ស័យបានចូលទៅចាប់ក្មេងស្រីរងគ្រោះរំលោភ តែត្រូវក្មេងស្រីស្រែក។ ពេលនោះម្តាយក្មេងស្រីរងគ្រោះឮក៏ប្រតាយប្រតប់គ្នាជាមួយជនសង្ស័យក៏កើតមានជម្លោះ ហើយជនសង្ស័យក៏ស្រែកថា គាត់បានរួមភេទជាមួយក្មេងស្រីជាច្រើនដងតាំងពីឆ្នាំ ២០១៩ មក។ ពេលឮដូច្នេះស្រី្តជាម្តាយក៏ប្តឹងប៉ូលិសឱ្យចាប់ខ្លួនតែម្តងទៅ៕