ភ្នំពេញៈ នៅមុនការបោះឆ្នោតឈានចូលមកដល់អនុប្រធានគណៈកម្មាធិការជាតិរៀបចំការបោះឆ្នោត (គ.ជ.ប.) ស្នើឱ្យបណ្តាគណៈកម្មការរៀបចំការបោះឆ្នោតរាជធានី-ខេត្ត (PEC) ទាំងអស់រៀបចំការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី ៥ ឆ្នាំ ២០២២ នេះ កុំឱ្យមានបាតុភាពអវិជ្ជមានណាមួយកើតឡើង ដើម្បីជាមុខមាត់ សម្រាប់ គ.ជ.ប. ឈានទៅរៀបចំការបោះឆ្នោតជ្រើសរើសតំណាងរាស្ត្រ ឆ្នាំ ២០២៣។
លោក នុត សុខុម អនុប្រធាន គ.ជ.ប. ថ្លែងក្នុងពិធីសំណេះសំណាលជាមួយមន្ត្រី បុគ្គលិកនៃលេខាធិការដ្ឋានរៀបចំការបោះឆ្នោតខេត្តកំពង់ឆ្នាំងកាលពីថ្ងៃទី ១៩ កុម្ភៈ ថា ការបោះឆ្នោតជ្រើសរើសក្រុមប្រឹក្សាឃុំ-សង្កាត់ខាងមុខនេះ ត្រូវធ្វើយ៉ាងណាខិតខំរៀបចំឱ្យទទួលបានជោគជ័យ និងមានភាពរលូន ស្របតាមច្បាប់ និងនីតិវិធី ដែលបានដាក់ចេញ។
លោកថ្លែងថា៖ «មែនទែនទៅ យើងទាំងអស់គ្នាខិតខំប្រឹងប្រែងធ្វើអត់មានជម្រើសទេ។ យើងខិតខំធ្វើទៅតាមច្បាប់ទាំងអ្វីដែលមានចែងនៅក្នុងរដ្ឋធម្មនុញ្ញទាំងអ្វីដែលមានចែងនៅក្នុងច្បាប់បោះឆ្នោតទាំងអស់ ហើយអ្វី ដែលធំ គឺបទបញ្ជា និងនីតិវិធីសម្រាប់ការបោះឆ្នោត និងការចុះឈ្មោះបោះឆ្នោត។ ជាពិសេស គឺការបោះឆ្នោតជ្រើសរើសក្រុមប្រឹក្សាឃុំ-សង្កាត់នេះ ព្រោះយើងឈានទៅការរៀបចំការបោះឆ្នោតជ្រើសរើសតំណាងរាស្ត្រ អាណត្តិក្រោយ ឆ្នាំក្រោយ»។
លោកថ្លែងថា៖ «ដូច្នេះ ការបោះឆ្នោតជ្រើសរើសក្រុមប្រឹក្សា-ឃុំសង្កាត់នេះ ធ្វើយ៉ាងណាកុំឱ្យមានបាតុភាពផ្តល់ជំនឿទុកចិត្ត ដើម្បីឈានទៅការបោះឆ្នោត ឆ្នាំ ២០២៣»។
លោក អ៊ូ ច័ន្ទរ័ត្ន ស្ថាបនិកគណបក្សកែទម្រង់កម្ពុជាប្រាប់ភ្នំពេញប៉ុស្តិ៍នៅថ្ងៃទី ២១ ខែកុម្ភៈ ថា ពាក់ព័ន្ធនឹងបញ្ហានេះ លោកនាយករដ្ឋមន្ត្រីក៏ធ្លាប់បានលើកឡើងដែរថា ការបោះឆ្នោតនាពេលកន្លងមកនេះ មានភាពស្ងប់ស្ងាត់ច្រើន មិនមានអំពើហិង្សាកើតឡើងធ្ងន់ធ្ងរនោះទេ ដោយគណបក្សនីមួយៗមានភាពចាស់ទុំ។ ប៉ុន្តែអ្វីដែលសំខាន់នោះ គឺ នីតិវិធី និងសមភាពរវាងគណបក្ស និងគណបក្ស និងតម្លាភាពនៅក្នុងការរៀបចំការបោះឆ្នោត។
លោកបន្តថា បញ្ហានេះ គណៈកម្មាធិការជាតិរៀបចំការបោះឆ្នោតត្រូវធ្វើយ៉ាងណាឱ្យមានសុចរិតភាព និងភាពត្រឹមត្រូវ សម្រាប់ដំណើរការបោះឆ្នោតនីមួយៗមិនមែនមានតែក្នុងពេលបោះឆ្នោតជ្រើសរើសក្រុមប្រឹក្សាឃុំសង្កាត់នៅពេលខាងមុខនោះទេ ដើម្បីកុំឱ្យប្រជាពលរដ្ឋដែលជាម្ចាស់ឆ្នោត ឬក៏មតិសហគមន៍អន្តរជាតិ គេចោទមកលើស្ថាប័ន គ.ជ.ប.។
លោកថ្លែងថា៖ «សម្រាប់ខ្ញុំ នៅតែមើលឃើញថា ប្រជាពលរដ្ឋដែលជាម្ចាស់ឆ្នោតមិនទាន់មានជំនឿទុកចិត្តទៅលើស្ថាប័ន គជប នេះនៅឡើយទេ។ ដោយមើលឃើញពីបញ្ហានេះ សហគមន៍-អឺរ៉ុប និងប្រទេសជប៉ុនមានការប្រឹងប្រែងយកចិត្តទុកដាក់ច្រើនលើការបោះឆ្នោត»។
ចំណែក លោក សុខ ឥសាន អ្នកនាំពាក្យគណបក្សប្រជាជនកម្ពុជាថ្លែងថា ការណែនាំរបស់ថ្នាក់ដឹកនាំ គ.ជ.ប. ទៅបណ្តាមន្ត្រីគណៈកម្មការរៀបចំការបោះឆ្នោតរាជធានី-ខេត្ត មិនមានអ្វីខុស នោះទេ និងជាតួនាទីភារកិច្ចរបស់ គ.ជ.ប. ដែលមានចែងក្នុងច្បាប់។
លោកថ្លែងថា៖ «គាត់ជាអាជ្ញាកណ្តាល ដូច្នេះគាត់អត់មានបង្កើត រឿងទេ។ គាត់ជាអាជ្ញាកណ្តាលធ្វើយ៉ាងណា ឱ្យត្រឹមត្រូវតាមគោលការណ៍ច្បាប់ និងបទបញ្ជានីតិវិធីដែល គ.ជ.ប. បានចេញកន្លងមក។ អ៊ីចឹង ការណែនាំនេះ គឺការណែនាំមួយត្រឹមត្រូវ ដើម្បីឱ្យការបោះឆ្នោតមានភាពរលូន»។
យោងតាមច្បាប់ ការបោះឆ្នោតជ្រើសរើសក្រុមប្រឹក្សាឃុំ-សង្កាត់ ត្រូវធ្វើឡើងរៀងរាល់ ៥ ឆ្នាំម្តង តាមរយៈការបោះឆ្នោតជាសកល។ សម្រាប់ កាលបរិច្ឆេទនៃការបោះឆ្នោតជ្រើសរើសក្រុមប្រឹក្សាឃុំ- សង្កាត់ ត្រូវកំណត់ដោយនាយករដ្ឋមន្ត្រីក្នុងរយៈពេល ៩ ខែយ៉ាងតិចមុនថ្ងៃបោះឆ្នោតតាមសំណើរបស់រដ្ឋមន្ត្រីក្រសួងមហាផ្ទៃ។ ដោយឡែកតាមប្រតិទិនរបស់ គ.ជ.ប. ការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី ៥ នឹងប្រព្រឹត្តទៅនៅថ្ងៃទី ៥ ខែមិថុនា ឆ្នាំ ២០២២ ខាងមុខ៕