ព្រះសីហនុៈ នគរបាលខេត្តព្រះសីហនុកំពុងដាក់កម្លាំងចម្រុះចុះត្រួតពិនិត្យអាវុធជាតិផ្ទុះ និងរកអ្នកបើកបររថយន្តដែលប្រើប្រាស់សារធាតុញៀន ដើម្បីពង្រឹងសន្តិសុខនៅតាមគោលដៅស្មុគស្មាញមួយចំនួនក្នុងក្រុង-ខេត្តព្រះសីហនុ។
លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុបានឱ្យភ្នំពេញប៉ុស្តិ៍ដឹងនៅថ្ងៃទី ២១ កុម្ភៈថា ការដាក់គោលដៅត្រួតពិនិត្យពាក់ព័ន្ធនឹងការពង្រឹងសន្តិសុខសណ្តាប់ធ្នាប់សាធារណៈនៅក្នុងខេត្តព្រះសីហនុ ជាពិសេសក្នុងក្រុងព្រះសីហនុដែលតែងតែអនុវត្តជារឿយៗនេះគឺជាវិធានការជំនាញរបស់ស្នងការដ្ឋាននគរបាលខេត្ត។ ការងារនេះគឺជាការប្រែប្រួលរបស់សមត្ថកិច្ចមិនមែនជាការដាក់កម្លាំងចុះត្រួតពិនិត្យជាប្រចាំទេ តែជាការត្រួតពិនិត្យតាមពេលវេលា និងតាមភូមិសាស្ត្រដែលសមត្ថកិច្ចសន្និដ្ឋានថាទីតាំងនោះអាចមានបញ្ហាអ្វីមួយកើតឡើង ឬមួយអាចមានគ្រោះថ្នាក់ចរាចរណ៍ក្នុងតំបន់ស្មុគស្មាញ។
លោកថ្លែងថា៖ «យើងត្រួតពិនិត្យនេះពាក់ព័ន្ធរកសារធាតុស្រវឹងផង រកអ្នកប្រើប្រាស់សារធាតុញៀន និងត្រួតពិនិត្យរកអាវុធជាតិផ្ទុះផង នេះជាជំនាញរបស់ខ្ញុំតែប៉ុណ្ណឹង។ យើងមើលសភាពការណ៍បច្ចុប្បន្ននេះគ្រោះថ្នាក់ចរាចរណ៍កើតមានច្រើន ហើយយើងក៏ត្រូវរកអ្នករក្សាទុក និងប្រើប្រាស់អាវុធខុសច្បាប់ផង។ នេះគឺជាវិធានការរបស់គណៈបញ្ជាការឯកភាពខេត្ត និងជាវិធានការរបស់ស្នងការនគរបាលខេត្ត»។
លោកបន្តថា ជារឿយៗការដាក់កម្លាំងត្រួតពិនិត្យនេះសមត្ថកិច្ចរបស់លោកតែងបានរកឃើញអ្នកបើកបររថយន្តក្នុងស្ថានភាពស្រវឹងស្រា។ នៅពេលរកឃើញបែបនេះលោកបានឃាត់អ្នកបើកបររថយន្តនោះឱ្យគាត់ឈប់រថយន្តសម្រាកមួយកន្លែងសិន ហើយក្រោយពីស្វាងស្រវឹងទើបសមត្ថកិច្ចអនុញ្ញាតឱ្យអ្នកបើកបររថយន្តនោះបន្តដំណើរទៅមុខទៀតបាន។
ប៉ុន្តែបើសមត្ថកិច្ចត្រួតពិនិត្យឃើញថា អ្នកបើកបររថយន្តនោះបំពាននឹងច្បាប់ដូចជាមានជាតិអាល់កុលលើសកម្រិត គឺលោកនឹងអនុវត្តតាមវិធានការច្បាប់ឬមួយពិន័យ។
ការដាក់កម្លាំងត្រួតពិនិត្យនេះក៏ឆែកឃើញអាវុធជាតិផ្ទុះម្តងម្កាលផងដែរ ហើយលោកបានអនុវត្តតាមផ្លូវច្បាប់ដោយមិនមានការលើកលែងឡើយ។
ពាក់ព័ន្ធនឹងអ្នកបើកបររថយន្តដែលប្រើប្រាស់គ្រឿងញៀនវិញ លោកស្នងការបានអះអាងថា នៅពេលកម្លាំងសមត្ថកិច្ចត្រួតពិនិត្យឃើញអ្នកបើកបរមានប្រើសារធាតុញៀនក្នុងកម្រិតស្រាលដែលមិនបង្កហានិភ័យទៅលើអ្វីមួយ គឺលោកនឹងធ្វើការអប់រំ ឬមួយក៏ណែនាំឱ្យគាត់ទៅព្យាបាលនៅមណ្ឌលបន្សាបគ្រឿងញៀន។
ក៏ប៉ុន្តែបើរកឃើញថាអ្នកបើកបររថយន្តនោះមានផ្ទុកសារធាតុញៀនធ្ងន់ធ្ងរដែលបង្កផលប៉ះពាល់ដល់ផលប្រយោជន៍សាធារណៈ ឬឯកជនណាមួយគឺលោកនឹងពិនិត្យមើលទៅតាមទម្រង់ច្បាប់ ហើយបើអាចអនុវត្តបានគឺលោកអនុវត្តតាមផ្លូវច្បាប់៕
វីដេអូ៖