សៀមរាបៈ អាជ្ញាធរជាតិអប្សរាដាក់ឱ្យដំណើរការគេហទំព័រទម្រង់ថ្មីចាប់ពីថ្ងៃទី ១៩ ខែកុម្ភៈ ឆ្នាំ ២០២២ តទៅ ដើម្បីអបអរសាទរខួប ២៧ ឆ្នាំនៃការបង្កើតអាជ្ញាធរជាតិអប្សរា។
យោងតាមលិខិតរបស់អាជ្ញាធរជាតិអប្សរាដែលភ្នំពេញប៉ុស្តិ៍ ទទួលបាននៅថ្ងៃទី ១៩ ខែកុម្ភៈបានឱ្យដឹងថា ចាប់តាំងពីខែមេសា ឆ្នាំ ២០២១ កន្លងមក អាជ្ញាធរជាតិអប្សរា បានចាប់ផ្តើមកែលម្អគេហទំព័រដែលមានអាសយដ្ឋាន www.apsaraauthority.gov.kh។ បច្ចុប្បន្នគេហទំព័រនេះត្រូវបានកែសម្រួលរួចរាល់ជាស្ថាពរ ដែលក្នុងនោះបានបញ្ចូលព័ត៌មានសំខាន់ៗមួយចំនួនដូចជា លិខិតបទដ្ឋានគតិយុត្តនានាពាក់ព័ន្ធនឹងអាជ្ញាធរជាតិអប្សរា ឯកសារទិន្នន័យរបស់អាជ្ញាធរជាតិអប្សរា ព័ត៌មានអំពីប្រាសាទនានាក្នុងតំបន់រមណីយដ្ឋានអង្គរ រចនាសម្ព័ន្ធគ្រប់គ្រងអាជ្ញាធរជាតិអប្សរា កិច្ចសហប្រតិបត្តិការអន្តរជាតិនៅតំបន់រមណីយដ្ឋានអង្គរ ព្រឹត្តិការណ៍សំខាន់ៗនៅតំបន់រមណីយដ្ឋានអង្គរ និងសារព័ត៌មានពាក់ព័ន្ធដែលបានសហការចុះផ្សាយការងាររបស់អាជ្ញាធរជាតិអប្សរា។ «ក្នុងន័យនេះ អាជ្ញាធរជាតិអប្សរានឹងដាក់ឱ្យដំណើរការគេហទំព័រទម្រង់ថ្មីចាប់ពីថ្ងៃទី ១៩ ខែកុម្ភៈ ឆ្នាំ ២០២២ តទៅ ដើម្បីអបអរសាទរខួប ២៧ ឆ្នាំនៃការបង្កើតអាជ្ញាធរជាតិអប្សរា»។
អាជ្ញាធរជាតិអប្សរាក៏បាននិងកំពុងធ្វើការកែសម្រួលគេហទំព័រអង្គរផងដែរ (angkor.com.kh) ហើយនឹងបង្កើតបណ្តាញទំនាក់ទំនងសង្គមមួយចំនួនទៀតនាពេលខាងមុខរួមមាន៖ Instagram, LinkedIn, Telegram Chanel និង APSARA Newsletter ក្នុងគោលដៅដើម្បីឱ្យការផ្សព្វផ្សាយព័ត៌មានរបស់អាជ្ញាធរជាតិអប្សរាកាន់តែមានភាពទូលំទូលាយបន្ថែមទៀត។ ដោយឡែកនៅថ្ងៃទី ១៨ ខែកុម្ភៈ អាជ្ញាធរជាតិអប្សរាបានឱ្យដឹងថា កំពុងដំណើរការរៀបចំវង់ទស្សនាថ្មីនៅប្រាសាទនាគព័ន្ធ ដើម្បីលើកស្ទួយតម្លៃនៃប្រាសាទ និងផ្តល់ជូនភ្ញៀវទេសចរនូវបទពិសោធទស្សនាថ្មីៗ ប្រកបដោយសុវត្ថិភាព និងផាសុកភាពផងដែរ។
ហ្វេសប៊ុកអាជ្ញាធរជាតិអប្សរាថា៖ «វង់ទស្សនាថ្មីនៅប្រាសាទនាគព័ន្ធត្រូវបានគិតគូររៀបចំក្នុងគោលបំណងលើកស្ទួយតម្លៃនៃប្រាសាទជាស្នាដៃក្នុងរាជ្យព្រះបាទជ័យវរ្ម័នទី ៧ ដែលតាំងទីនៅចំកណ្តាលផ្ទៃទឹក បារាយណ៍ជ័យតដាក (បារាយណ៍ខាងជើង) ព្រមទាំងផ្តល់ជូនភ្ញៀវទេសចរនូវបទពិសោធទស្សនាថ្មីៗ ប្រកបដោយសុវត្ថិភាព និងផាសុកភាព»។
ហ្វេសប៊ុកដដែលនេះដកស្រង់សម្ដី លោក សេង សុធារ៉ា អនុប្រធាននាយកដ្ឋានអភិវឌ្ឍន៍ទេសចរណ៍អង្គរនៃអាជ្ញាធរជាតិអប្សរា បញ្ជាក់ថា ខ្សែទស្សនាថ្មីនៅប្រាសាទនាគព័ន្ធនេះគ្រោងរៀបចំជា ៣ ប្រភេទ។ ប្រភេទទី ១ គឺខ្សែទស្សនាក្នុងប្រាសាទ ដែលនឹងនាំភ្ញៀវទេសចរឱ្យដើរទស្សនាបានគ្រប់ជ្រុងទាំង ៤ នៃប្រាសាទរាងកាកបាទនេះ ព្រមទាំងអាចផ្តិតយករូបភាពរួមស្អាតៗនៃប្រាសាទ។ ប្រភេទទី ២ គឺខ្សែទស្សនាក្រៅប្រាសាទដែលជាខ្សែទស្សនាថ្មីដែលក្រុមការងារនៃអាជ្ញាធរជាតិអប្សរាចំណាយពេលសិក្សាស្រាវជ្រាវ និងរៀបចំ។ ខ្សែទស្សនានេះនឹងអនុញ្ញាតឱ្យទេសចរអាចស្វែងយល់ពីរចនាសម្ព័ន្ធនៃកោះដែលមានប្រាសាទនៅកណ្តាល ព្រមទាំងទេសភាព ធម្មជាតិ និងសត្វដែលមានវត្តមាននៅទីនេះ បូករួមទាំងការទស្សនាប្រាសាទផងដែរ។ ចំណែកប្រភេទទី ៣ គឺខ្សែទស្សនាសម្រាប់ទេសចរជិះទូកដែលមានបំណងលើកស្ទួយជីវភាព ប្រជាជនក្នុងតំបន់អង្គរ និងការគិតគូរពីបរិស្ថាន ខ្សែទស្សនាពិសេសមួយដែលមិនត្រឹមតែជួយជ្រោមជ្រែងសកម្មភាពសហគមន៍ទេសចរណ៍ទូកនោះទេ គឺថែមទាំងធ្វើឱ្យប្រាសាទមានជីវិតរស់ឡើងវិញផងដែរ។ ក្នុងប្រភេទទី ៣ នេះបានន័យថា ផែខាងកើត និងខាងលិចនៃប្រាសាទនាគព័ន្ធនឹងត្រូវមានដំណើរការម្តងទៀតព្រោះថា ភ្ញៀវទេសចរនឹងចាប់ផ្តើមការទស្សនាដោយជិះទូក ចេញពីផែនៅខាងកើតប្រាសាទព្រះខ័ន មកឈប់ចតនៅផែខាងលិចនៃនាគព័ន្ធ ដើម្បីឡើងទៅចាប់ផ្តើមការដើរទស្សនាប្រាសាទ រួចចាកចេញពីប្រាសាទតាមផែខាងកើតវិញ ដើម្បីបន្តដំណើរដោយទូកទៅសួនបណ្តុះកូនរុក្ខជាតិក្រាំងក្រូច និងប្រាសាទតាសោម។ លោកថា ភ្ញៀវទេសចរដែលជាជនពិការជិះលើរទេះរុញក៏ត្រូវបានគិតគូរផ្លូវទស្សនាជូនប្រកបដោយសុវត្ថិភាពអាចគយគន់ និងផ្តិតយករូបភាពប្រាសាទបានផងដែរ។ សំណើខ្សែទស្សនាទាំងនេះនឹងដាក់ជូនអ្នកជំនាញការ និងថ្នាក់ដឹកនាំអាជ្ញាធរជាតិអប្សរាពិនិត្យ និងវាយតម្លៃ អនុម័ត៕