ភ្នំពេញៈ យ៉ាងហោចណាស់មានមនុស្សចំនួន ១០៧ នាក់បានស្លាប់ និងរបួសចំនួន ២៧៦ នាក់ ដោយសារគ្រោះថ្នាក់ចរាចរណ៍ ក្នុងរយៈពេល ២១ ថ្ងៃ គិតចាប់ថ្ងៃទី ១ ដល់ថ្ងៃទី ២១ ខែកុម្ភៈនេះ។ គណកម្មាធិការជាតិសុវត្ថិភាពចរាចរណ៏ផ្លូវគោកបន្តអំពាវនាវដល់អ្នកប្រើប្រាស់ផ្លូវទាំងអស់បន្តចូលរួមគោរពច្បាប់ចរាចរណ៍ ដើម្បីសុខសុវត្ថិភាពពេលធ្វើដំណើរតាមដងផ្លូវ។
យោងតាមរបាយការណ៏របស់អគ្គស្នងការដ្ឋាននគរបាលជាតិ គឺក្នុងរយ:ពេល ២១ ថ្ងៃ គិតចាប់ពី ថ្ងៃទី ១ ដល់ថ្ងៃទី ២១ ខែ កុម្ភ: ឆ្នាំ ២០២២ នេះបង្ហាញថា មានគ្រោះថ្នាក់ចរាចរណ៍កើតឡើងចំនួន ១៨៨ លើកធ្វើឲ្យមនុស្សស្លាប់ចំនួន ១០៧ នាក់ (ប្រុស ៩៣ នាក់ និងស្រី ១៤ នាក់) របួសធ្ងន់ ១៦៤ នាក់ (ប្រុស ១២៦ នាក់ និងស្រី ៣៨ នាក់) និងរបួសស្រាល ១១២ នាក់ (ប្រុស ៦៥នាក់ និងស្រី ៤៧ នាក់) អ្នកមិនពាក់មួកសុវត្ថិភាពពេលមានគ្រោះថ្នាក់ ២០៤ នាក់។
របាយការណ៍ដដែលបញ្ជាក់ថា មូលហេតុគ្រោះថ្នាក់ចរាចរណ៍កើតឡើងដោយសារ ល្បឿន ៧៥ លើក (ស្លាប់ ៤៤ នាក់) មិនគោរពសិទ្ធិ ៤០ លើក (ស្លាប់ ១៤ នាក់) មិនប្រកាន់ស្តាំ ២៣ លើក (ស្លាប់ ១៧ នាក់) ប្រជែងគ្រោះថ្នាក់ ១៤ លើក (ស្លាប់ ១៤ នាក់) បត់គ្រោះថ្នាក់ ១៦ លើក (ស្លាប់ ៥ នាក់) ស្រវឹង ១២ លើក (ស្លាប់ ៧ នាក់) និងកត្តាយាន ៦ លើក (ស្លាប់ ៦ នាក់)។ ទិន្នន័យនេះបើធៀបនឹងខែមុន អ្នកស្លាប់ថយចុះ ១៦ នាក់ ស្មើ ១៣%។
លោកស្រី មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិការនៃអគ្គលេខាធិការដ្ឋាន គ.ស.ច.គ. ថ្លែងនៅថ្ងៃទី ២២ ខែកុម្ភៈថា លទ្ធផលនៃការថយចុះនេះ ដោយសារការយល់ដឹងរបស់ប្រជាពលរដ្ឋ តាមរយៈការផ្សព្វផ្សាយដូចភ្លៀងរលឹមរបស់លេខាធិការដ្ឋាន និងការរឹតបន្តឹងរបស់នគរបាលចរាចរណ៏នៃអនុគណកម្មការសុវត្ថិភាពចរាចរណ៏ ខេត្ត រាជធានី។
ក្នុងនាមគណកម្មាធិការជាតិសុវត្ថិភាពចរាចរណ៏ផ្លូវគោក លោកស្រី មឹន មាណវី បានអំពាវនាវដល់អ្នកប្រើប្រាស់ផ្លូវទាំងអស់បន្តចូលរួមគោរពច្បាប់ និងបទដ្ឋានសុវត្ថិភាពចរាចរណ៏ រួមមានកុំបើកលើសល្បឿនកំណត់ គោរពសិទ្ធិអាទិភាពដូចជាត្រូវបន្ថយល្បឿន ឬឈប់ដើម្បីមើលឆ្វេងស្តាំនៅផ្លូវប្រសព្វ កុំបត់និងវ៉ាជែងដោយប្រថុយប្រថាន ពិសេសបើបើកបរ គឺកុំពិសារគ្រឿងស្រវឹង កុំដាក់លក់ឥវ៉ាន់នៅតាមចិញ្ចើម ឬលយចូលលើផ្លូវជាដើម។
លោកស្រីថ្លែងថា៖ «សូមកុំចាំបាច់តែនគរបាល ឬអាជ្ញាធររឹតបន្តឹងទើបគោរពច្បាប់។ សូមធ្វើជាពលរដ្ឋដែលល្អទាន់សម័យក្នុងប្រទេសដែលមានសុខសន្តិភាពពេញលេញ និងការអភិវឌ្ឍលើគ្រប់វិស័យ និងកុំភ្លេចការពារការឆ្លងជម្ងឺកូវីដ ១៩»។
លោក គឹម បញ្ញា នាយកអង្គការមូលនិធិបង្ការរបួសអាស៊ី (AIP) ថ្លែងនៅថ្ងៃទី ២២ ខែកុម្ភៈ ថ្លែងថា ដោយកត់សម្គាល់ឃើញថានៅក្នុងខែមករាឆ្នាំ២០២២នេះ មានថ្ងៃឈប់សម្រាកច្រើនជាពិសេសថ្ងៃចូលឆ្នាំសាកលស្របពេលដែលរាជរដ្ឋាភិបាលចាប់ផ្តើមបើកដំណើរការប្រទេសឡើងវិញ គឺចំនួនគ្រោះថ្នាក់ចរាចរណ៍កើនឡើងយ៉ាងគំហុក។
មួយវិញទៀតលោកមើលឃើញថា ដោយសារតែវិធានការរបស់ស្ថានប័នរាជរដ្ឋាភិបាលបានបង្កើនការអប់រំផ្សព្វផ្សាយ ការរឹតបន្តឹងការអនុវត្តច្បាប់ដើម្បីទប់កំណើនអ្នកស្លាប់ អ្នករងរបួសបន្ទាប់ពីបានឃើញករណីគ្រោះថ្នាក់កើតឡើងខ្លាំងនៅក្នុងខែមករានោះ ទើបធ្វើឲ្យមានការថយចុះចំនួនអ្នកស្លាប់ដោយសារគ្រោះថ្នាក់ចរាចរណ៍ក្នុងខែកុម្ភៈនេះ។
លោកថ្លែងថា៖«ដូចដែលយើងបានដឹងហើយថាទាំងប្រមុខរាជរដ្ឋាភិបាលសម្តេចតេជោ ទាំងសម្តេចក្រឡាហោមលោកបានជំរុញឲ្យមានវិធានការកាន់តែខ្លាំងឡើងអ៊ីចឹងផ្អែកលើចំណុចទាំងនេះយើងឃើញថា ស្ថានភាពក្នុងខែកុម្ភៈប្រសើជាងខែមករាបើទោះបីជាចំនួនហ្នឹងនៅតែខ្ពស់»។
លោកនាយកអង្គការ AIP បានជំរុញលើកទឹកចិត្តឲ្យស្ថានប័នរាជរដ្ឋាភិបាលបន្តពង្រឹងការអនុវត្តច្បាប់ឲ្យបានកាន់តែខ្លាំងក្លាថែមទៀត ឲ្យបានកាន់តែជាប់លាប់ទូលំទូលាយនិងមានតម្លាភាព។ ទន្ទឹមនោះលោកបានស្នើសុំឲ្យសាធារណៈជនចូលរួមក្នុងការគោរពច្បាប់ បន្ថែមលើការខិតខំនៅក្នុងការអប់រំផ្សព្វផ្សាយដោយស្ថាប័នរាជរដ្ឋាភិបាល និងដៃគូរពាក់ព័ន្ធ៕