.jpg)
កិច្ចជំនួបរវាងគណៈកម្មការទី ៧ រដ្ឋសភា និងក្រសួងអប់រំ។ រូបថត រដ្ឋសភា
ភ្នំពេញៈ លោក ហង់ជួន ណារ៉ុន រដ្ឋមន្ត្រី ក្រសួងអប់រំ យុវជន និងកីឡាបានប្រាប់គណៈកម្មការទី ៧ នៃរដ្ឋសភាថា ទោះបីក្នុងដំណាក់កាលនៃការរីករាលដាលជំងឺកូវីដ ១៩ ដែលក្រសួងបានជួបប្រទះនូវឧបសគ្គជាច្រើនក៏ដោយក៏ក្រសួងនៅតែតាំងចិត្ដក្នុងការឆ្ពោះទៅអនុវត្តផែនការកំណែទម្រង់ក្នុងវិស័យអប់រំ ដើម្បីឆ្លើយតបទៅនឹងយុទ្ធសាស្ត្រចតុកោណដំណាក់កាលទី ៤ និងគោលនយោបាយស្តីពីសាលារៀនជំនាន់ថ្មី។
លោក ហង់ជួន ណារ៉ុន បានបញ្ជាក់បែបនេះក្នុងជំនួបជាមួយលោក ហ៊ុន ម៉ានី ប្រធានគណៈកម្មការអប់រំ យុវជន កីឡា ធម្មការ កិច្ចការសាសនា វប្បធម៌ និងទេសចរណ៍នៃរដ្ឋសភា (គណៈកម្មការទី ៧) ដើម្បីពិនិត្យ និងតាមដាន «វឌ្ឍនភាពនៃការអនុវត្តផែនការយុទ្ធសាស្ត្រវិស័យអប់រំ ក្នុង និងក្រោយវិបត្តិកូវីដ-១៩» នៅថ្ងៃទី ២២ កុម្ភៈ។
លោករដ្ឋមន្ដ្រីបានលើកឡើងដោយសង្ខេបពីការវិវឌ្ឍនៃស្ថានភាពសេដ្ឋកិច្ចនៅកម្ពុជា និងយុទ្ធសាស្ត្រនៃការឆ្លើយតបរបស់វិស័យអប់រំនៅក្នុងបរិបទថ្មី (កូវីដ ១៩) តាមរយៈការផ្តល់អាទិភាពដល់សកម្មភាពចំនួន ៥ ដែលក្នុងនោះរួមមាន ទី ១ ការដាក់ចេញនូវកម្មវិធីកំណែទម្រង់សាលារៀន ទី ២ ការអនុវត្តកម្មវិធីសាលារៀនជំនាន់ថ្មី។ ទី ៣ ការលើកកម្ពស់កម្មវិធីអំណាន និងគណិតវិទ្យានៅកម្រិតដំបូង ទី ៤ ការកៀរគរការចូលរួមពីគ្រប់ប្រភព និងអ្នកពាក់ព័ន្ធ ដើម្បីរៀបចំការអប់រំតាមបែបឌីជីថល និងទី ៥ ការលើកកម្ពស់ឌីជីថល សម្រាប់សតវត្សរ៍ទី ២១ តាមរយៈការជំរុញការសិក្សារបស់សិស្ស។
លោកថ្លែងថា៖ «បើទោះជាក្រសួង បាននិងកំពុងជួបប្រទះនូវឧបសគ្គជាច្រើនក៏ដោយក៏ក្រសួងអប់រំបានតាំងចិត្តក្នុងការឈានឆ្ពោះទៅកាន់ដំណាក់កាលទី ៣ នៃផែនការកំណែទម្រង់ ដែលសកម្មភាពអាទិភាពលើការពង្រឹងការគ្រប់គ្រងធនធានមនុស្ស និងការអភិវឌ្ឍវិជ្ជាជីវៈជាប្រចាំ ការដាក់ឱ្យអនុវត្តនូវការវាយតម្លៃការងារប្រចាំឆ្នាំ ការបង្កើតឱកាស និងអនុវត្តគន្លង អាជីពក្នុងវិស័យអប់រំ ការគ្រប់គ្រងផ្តោតលើលទ្ធផល ការបង្កើតក្រុមជំនាញចុះជួយ និងគាំទ្រដល់សាលារៀន, និងកំណែទម្រង់គ្រឹះស្ថានបណ្តុះបណ្តាលគ្រូ»។
កិច្ចប្រជុំនាថ្ងៃទី ២២ កុម្ភៈជាកិច្ចប្រជុំលើកទី ៣ នៃជំនួបផ្លូវការរវាងគណៈកម្មការទី ៧ ជាមួយក្រសួងអប់រំដោយក្នុងនោះ កាលពីថ្ងៃទី ១៩ វិច្ឆិកា ឆ្នាំ ២០១៨ គណៈកម្មការទី ៧ បានជួបប្រជុំជាមួយក្រសួង ដើម្បីធ្វើការពិភាក្សាលើប្រធានបទ «ការរៀបចំផែនការយុទ្ធសាស្ត្រវិស័យអប់រំ យុវជន និងកីឡា ដើម្បីឆ្លើយតបទៅនឹងយុទ្ធសាស្ត្រចតុកោណដំណាក់កាលទី ៤ និងគោលនយោបាយស្តីពីសាលារៀនជំនាន់ថ្មី»។
ចំណែកកិច្ចប្រជុំនៅថ្ងៃទី ២២ ខែកុម្ភៈ គណៈកម្មការ និងក្រសួងអប់រំបានពិភាក្សាលើប្រធានបទ «ការវិវឌ្ឍ នៃវិស័យអប់រំ ក្នុងបរិបទឌីជីថលក្នុងក្របខ័ណ្ឌកម្ពុជា និងសាកល»។
នៅក្នុងសន្និសីទសារព័ត៌មានស្ដីពីលទ្ធផលកិច្ចប្រជុំរវាងគណៈកម្មការទី ៧ ជាមួយនឹងក្រសួងអប់រំ លោក ហង់ជួន ណារ៉ុន បានលើកឡើងដោយសង្ខេបនូវសកម្មភាពជាអាទិភាពរបស់ ក្រសួង ដើម្បីឆ្លើយតបនឹងចក្ខុវិស័យរបស់រាជរដ្ឋាភិបាលដែលប្រែក្លាយជាប្រទេសដែលមានប្រាក់ចំណូលមធ្យមកម្រិតខ្ពស់នៅឆ្នាំ ២០៣០ និងប្រាក់ចំណូលកម្រិតខ្ពស់នៅឆ្នាំ ២០៥០ រួមមានកម្មវិធីកំណែទម្រង់ក្នុងទិសដៅផលិតធនធានមនុស្ស ដែលនឹងប្រែក្លាយពីសេដ្ឋកិច្ចផ្អែកលើពលកម្មទៅជាសេដ្ឋកិច្ចផ្អែកលើសង្គមពុទ្ធិ។
គណៈកម្មការទី ៧ បានវាយតម្លៃខ្ពស់ចំពោះកិច្ចប្រជុំជាមួយក្រសួងអប់រំ ហើយបានចាត់ទុកថា កិច្ចប្រជុំនេះជាវេទិកាដ៏មានប្រសិទ្ធភាពមួយក្នុងស្មារតីរួបរួម សហការ និងជំរុញការអនុវត្តផែនការយុទ្ធសាស្ត្រវិស័យអប់រំក្នុង និងក្រោយវិបត្តិកូវីដ ១៩ និងជាឱកាសសម្រាប់សមាជិកសមាជិកានៃរដ្ឋសភាអាចពិភាក្សា ផ្លាស់ប្តូរមតិយោបល់ ជាធាតុចូលសំខាន់ៗ ដែលក្រសួងអាចយកទៅពិចារណាផងដែរ។
គណៈកម្មការទី ៧ បញ្ជាក់ថា នឹងបន្តបំពេញតួនាទី និងភារកិច្ចរបស់ខ្លួនក្នុងការតាមដាន និងត្រួតពិនិត្យការអនុវត្តការងារ និងវិធានការនានា ដែលបានដាក់ចេញដោយក្រសួងអប់រំ និងចូលរួមសហការក្នុងស្មារតី ដើម្បីផលប្រយោជន៍រួមនៃគុណភាពអប់រំនៅកម្ពុជា និងដើម្បីសិស្សានុសិស្សទទួលបានការអប់រំប្រកបដោយគុណភាព និង និរន្តរភាព៕
