.jpg)
អតីតមន្ត្រីនៃអតីតបក្សសង្គ្រោះជាតិ ដែលទទួលបាននីតិសម្បទាធ្វើនយោបាយ។ រូប FB
ភ្នំពេញៈ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជានៅថ្ងៃទី ១៥ ខែកុម្ភៈ បានចេញព្រះរាជក្រឹត្យត្រាស់បង្គាប់ផ្តល់នីតិសម្បទាធ្វើនយោបាយឡើងវិញដល់អតីតមន្ត្រីជាន់ខ្ពស់នៃអតីតគណបក្សសង្គ្រោះជាតិ ចំនួន ៣ រូបរួមមានលោក ចាន់ ចេង លោក កែត ឃី និងលោកស្រី ពត ពៅ។
ព្រះរាជក្រឹត្យរបស់ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជាបញ្ជាក់ថា ការផ្តល់នីតិសម្បទាធ្វើនយោបាយឡើងវិញដល់អ្នកទាំង ៣ រូប ដោយសារពួកគេត្រូវបានហាមឃាត់ការធ្វើសកម្មភាពនយោបាយរយៈពេល ៥ ឆ្នាំ តាមអំណាចសាលដីកាលេខ ៣៤០ (ឆ) ចុះថ្ងៃទី ១៦ វិច្ឆិកា ឆ្នាំ ២០១៧។
លោក ឈឹម កាន អគ្គនាយករងនៃអគ្គនាយកដ្ឋានរដ្ឋបាលនៃក្រសួងមហាផ្ទៃប្រាប់ភ្នំពេញប៉ុស្តិ៍នៅថ្ងៃទី ២២ កុម្ភៈ ថា រហូតមកទល់នឹងបច្ចុប្បន្ន ព្រះមហាក្សត្រនៃកម្ពុជាបានផ្តល់នីតិសម្បទាធ្វើនយោបាយឡើងវិញដល់មន្ត្រីជាន់ខ្ពស់នៃអតីតគណបក្សសង្គ្រោះជាតិចំនួន ៣២ រូប ក្នុងចំណោម ១១៨ រូប ដែលត្រូវបានហាមឃាត់ការធ្វើសកម្មភាពនយោបាយសម្រាប់រយៈពេល ៥ ឆ្នាំ តាមអំណាចសាលដីកាលេខ ៣៤០ (ឆ) ចុះថ្ងៃទី ១៦ ខែវិច្ឆិកា ឆ្នាំ ២០១៧។
លោកបន្តថា អ្នកដែលទទួលបាននីតិសម្បទាធ្វើនយោបាយឡើងវិញក៏ទៅបង្កើតគណបក្សនយោបាយថ្មី និងអ្នកមួយចំនួនទៀតក៏បានចូលរួមជាមួយនឹងគណបក្សផ្សេងៗទៀតផងដែរ ទៅតាមការយល់ឃើញនិងឆន្ទៈរបស់ពួកគេ។ ជាមួយគ្នានេះក៏មានមន្ត្រីជាន់ខ្ពស់នៃអតីតគណបក្សសង្គ្រោះជាតិចំនួន ៤ រូប រួមមាន លោក ញឹម គឹមញ៉ុល លោក ជូង ជូងី លោក ជា ជីវ និង លោកស្រី អ៊ុង សុវណ្ណា ក៏មិនត្រូវបានអនុញ្ញាតផ្តល់នីតិសម្បទាឡើងវិញដែរ ដោយសារពួកគេមិនអនុវត្តតាមសាលដីការបស់តុលាការកំពូល ចុះថ្ងៃទី ១៦ ខែវិច្ឆិកា ឆ្នាំ ២០១៧។
លោកថ្លែងថា៖ «យើងមិនទាន់ទទួលលិខិតស្នើសុំនីតិសម្បទាធ្វើនយោបាយពីមន្ត្រីនៃអតីតសង្គ្រោះជាតិផ្សេងទៀតនៅឡើយទេ។ ប៉ុន្តែនៅពេលដែលមានសំណើមកដល់ក្រសួង គឺយើងនឹងពិនិត្យមើលសំណើនោះ រួចស្នើទៅព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ដើម្បីឱ្យព្រះអង្គចេញព្រះរាជក្រឹត្យត្រាស់បង្គាប់ផ្តល់នីតិសម្បទាធ្វើនយោបាយឡើងវិញជូនដល់ពួកគាត់ហើយ»។
លោក គិន ភា ប្រធានវិទ្យាសា្ថនទំនាក់ទំនងអន្តរជាតិនៃរាជបណ្ឌិត្យសភាកម្ពុជា និងជាអ្នកតាមដានស្ថានការណ៍នយោបាយនៅប្រទេសកម្ពុជាប្រាប់ភ្នំពេញប៉ុស្តិ៍ ថា ការស្នើសុំសិទ្ធិធ្វើនយោបាយឡើងវិញពីសំណាក់មន្ត្រីជាន់ខ្ពស់នៃអតីតគណបក្សសង្គ្រោះជាតិជាបន្តបន្ទាប់ និងនៅមុនការបោះឆ្នោតជ្រើសរើសក្រុមប្រឹក្សាឃុំ-សង្កាត់ខិតជិតមកដល់នេះ គឺជាជម្រើសដ៏ល្អរបស់ពួកគាត់ ព្រោះពួកគាត់គឺជាអ្នកនយោបាយ។
លោកបន្តថា ពួកគាត់ គឺជាអ្នកនយោបាយ ហើយមិនមានសិទ្ធិធ្វើនយោបាយ គឺពួកគាត់មិនអាចទៅធ្វើអ្វីកើតនោះទេ។ ដូច្នេះ បើពួកគាត់មានបំណងក្នុងការបន្តជីវិតនយោបាយ និងចង់ជួយប្រជាពលរដ្ឋ តាមរយៈការធ្វើនយោបាយរបស់ពួកគាត់ មានជម្រើសដែលល្អបំផុត គឺនាំគ្នាស្នើសុំធ្វើនយោបាយឡើងវិញ។
មួយវិញទៀត បើមានមន្ត្រីនៃអតីតសង្គ្រោះជាតិកាន់តែច្រើនស្នើសុំសិទ្ធិធ្វើនយោបាយឡើងវិញ បង្ហាញពីទិដ្ឋភាព ២ សំខាន់ គឺបង្ហាញថា ទី ១ ស្ថានភាពនយោបាយក្នុងប្រទេសកាន់តែល្អប្រសើរ និងទី ២ បង្ហាញថា អ្នកនយោបាយដែលជាប់បម្រាមទាំងនោះលែងស្តាប់ការឃោសនារបស់លោក សម រង្ស៊ី បន្តទៀតហើយ។
លោក គិន ភា ថ្លែងថា៖ «ខ្ញុំគិតថា វាយតម្លៃជារួម វាល្អហើយ ដែលស្នើសុំសិទ្ធិធ្វើនយោបាយឡើងវិញនេះ និងអ្នកដែលមិនទាន់បានស្នើសុំ គួរតែនាំគ្នាស្នើសិទ្ធិធ្វើនយោបាយឡើងវិញទៅ។ កុំរង់ចាំសាកសព [គណបក្ស] ដែលស្លាប់ទៅហើយ វារស់ឡើងវិញនោះ វាមិនអាចទៅរួចទេ»។
អតីតថ្នាក់ដឹកនាំ និងមន្ត្រីជាន់ខ្ពស់នៃអតីតគណបក្សសង្គ្រោះជាតិ ចំនួន ១១៨ រូប ត្រូវបានហាមក្នុងការធ្វើសកម្មភាពនយោបាយរយៈពេល ៥ ឆ្នាំដោយសាលដីកាតុលាការកំពូល កាលពីចុងឆ្នាំ ២០១៧ ក្រោយពីគណបក្សសង្គ្រោះជាតិត្រូវបានរំលាយ៕
វីដេអូ៖
