.jpg)
ពានរង្វាន់ដែលផ្ដល់ឱ្យក្រសួងអប់រំ និងអាជ្ញាធរប្រឆាំងគ្រឿងញៀនពីថ្ងៃទី ២៣ កុម្ភៈ។ រូបថត ក្រសួងព័ត៌មាន
ភ្នំពេញៈ ក្រសួងអប់រំ យុវជន និងកីឡា និងអាជ្ញាធរជាតិប្រយុទ្ធប្រឆាំងគ្រឿងញៀនទទួលបានពានកោតសរសើរពីសម្ព័ន្ធត្រួតពិនិត្យផលិតផលថ្នាំជក់ (SEATCA) ក្នុងនាមជាស្ថាប័នរដ្ឋាភិបាលដែលអនុវត្តបានល្អលើការត្រួតពិនិត្យផលិតផលថ្នាំជក់នៅកម្ពុជា។
កម្មវិធីប្រគល់ពានកិត្តិយសការអនុវត្តល្អដល់ស្ថាប័នទាំងនេះបានធ្វើឡើងតាមរយៈវីដេអូអនឡាញកាលពីថ្ងៃទី ២៣ ខែកុម្ភៈ ដែលរៀបចំដោយសម្ព័ន្ធត្រួតពិនិត្យថ្នាំជក់អាស៊ីអាគ្នេយ៍ (SEATCA) ដែលមានការចូលរួមពីបណ្ដាប្រទេសអាស៊ាន សង្គមស៊ីវិល ដែលពាក់ព័ន្ធនឹងតំណាងស្ថាប័នដែលទទួលបានពានកិត្តិយស។
សម្ព័ន្ធត្រួតពិនិត្យថ្នាំជក់អាស៊ីអាគ្នេយ៍បានលើកឡើងថា ខ្លួនបានដាក់ឱ្យដំណើរការរបាយការណ៍ថ្មីបំផុតចំនួន ២ នៅក្នុងកម្មវិធីនេះ។ SEATCA
ក៏បានឱ្យដឹងដែរថា ជាមួយគ្នានោះតារាងពិន្ទុ FCTC និងរបាយការណ៍សន្ទស្សន៍ និងស្ថាប័នដែលបានទទួលពានកោតសរសើរពីសម្ព័ន្ធត្រួតពិនិត្យផលិតផលថ្នាំជក់ក៏ត្រូវបានប្រកាសផងដែរ។
SEATCA បានបញ្ជាក់ក្នុងកម្មវិធីនោះថា «ក្នុងព្រឹត្តិការណ៍នេះ យើងបានទទួលស្គាល់អ្នកទទួលពានរង្វាន់ជើងឯកគ្រប់គ្រងថ្នាំជក់នៅក្នុងតំបន់អាស៊ាន។ ប្រទេសសមាជិកអាស៊ានគឺបានចូលរួមផ្សព្វផ្សាយ និងត្រួតពិនិត្យផលិតផលថ្នាំជក់បានយ៉ាងល្អ»។
បើតាមការប្រកាសរបស់ SEATCA ក្នុងកម្មវិធីកាលពីម្សិលមិញគឺមិនមែនតែកម្ពុជាទេដែលបានទទួលពានកោតសរសើរនេះ។ ជាក់ស្ដែងក្រសួងស្ថាប័ននៃប្រទេសសមាជិកអាស៊ានដូចជា ក្រសួងសុខាភិបាលថៃ សិង្ហបុរី និងហ្វីលីពីន និងក្រសួងអប់រំ វប្បធម៌ស្រាវជ្រាវ និងបច្ចេកវិទ្យាឥណ្ឌូនេស៊ីក៏ទទួលបានពានកោតសរសើរនេះផងដែរ។
លោកស្រី សឿ សុជាតា តំណាងក្រសួងអប់រំយុវជន និងកីឡាដែលបានចូលរួមទទួលពានក្នុងកម្មវិធីនេះបានថ្លែងថា ការទទួលបានពានកោតសរសើរពីសម្ព័ន្ធត្រួតពិនិត្យផលិតផលថ្នាំជក់ក្នុងពេលនេះគឺជាការលើកទឹកចិត្តក្នុងការជំរុញដល់ប្រទេសកម្ពុជាឱ្យមានការខិតខំបន្ថែមទៀតក្នុងការត្រួតពិនិត្យផលិតផលថ្នាំជក់។
លោកបានបញ្ជាក់ថា៖ «ខ្ញុំសង្ឃឹមថាពាននេះនឹងជួយជំរុញដល់ក្រុមការងាររបស់ខ្ញុំ ដៃគូសហការទាំងអស់របស់ខ្ញុំក្នុងការបន្តការពាំនាំការកាត់បន្ថយ និងបញ្ចប់ការប្រើប្រាស់ថ្នាំជក់ និងការហាមឃាត់ថ្នាំជក់សម្រាប់ប្រទេសកម្ពុជាយើង»។
កាលពីខែកុម្ភៈ ឆ្នាំ ២០២១ កន្លងទៅក្រសួងអប់រំ យុវជន និងកីឡាបានចេញនូវសេចក្ដីណែនាំមួយចំពោះអង្គភាពចំណុះក្រសួង និងគ្រឹះស្ថានសិក្សាគ្រប់កម្រិតទាំងសាធារណៈ និងឯកជនដោយហាមឃាត់ការចាប់ដៃគូសហការជាមួយឧស្សាហករថ្នាំជក់ ការទទួលការឧបត្ថម្ភគាំទ្រ ឬចុះអនុស្សរណៈយោគយល់គ្នាជាមួយឧស្សាហករថ្នាំជក់ ការផ្ដល់ទីកន្លែង ឬទីធ្លាគ្រឹះស្ថានសិក្សាសាធារណៈ និងឯកជនសម្រាប់រៀបចំកម្មវិធីផ្សព្វផ្សាយ ឬពិព័រណ៍ដែលជាកម្មវិធីរបស់ឧស្សាហកម្មថ្នាំជក់ និងត្រូវចូលរួមលុបបំបាត់សកម្មភាពប្រើប្រាស់ផលិតផលថ្នាំជក់តាមគ្រប់រូបភាព។
សេចក្ដីប្រកាសព័ត៌មានរបស់អង្គការចលនាដើម្បីសុខភាពកម្ពុជាបានឱ្យដឹងថា សេចក្តីណែនាំនេះត្រូវបានដាក់ចេញ ក្រោយពីក្រុមហ៊ុនថ្នាំជក់មួយចំនួនបានធ្វើសកម្មភាពឧបត្ថម្ភក្នុងគ្រឹះស្ថានសិក្សាក្នុងគោលបំណងកេងចំណេញផ្សព្វផ្សាយឈ្មោះក្រុមហ៊ុន និងផលិតផលរបស់ខ្លួនដល់សិស្ស និស្សិត។
ទន្ទឹមគ្នានេះ រាជរដ្ឋាភិបាលកម្ពុជាដោយមានអាជ្ញាធរជាតិប្រយុទ្ធប្រឆាំងគ្រឿងញៀនជាសេនាធិការនៅខែមីនា ឆ្នាំ ២០២១ បានចេញនូវសេចក្ដីណែនាំ ហាមឃាត់ការនាំចូល ការជួញដូរ ការធ្វើអាជីវកម្ម និងការប្រើប្រាស់ផលិតផល អេចឈ៍ ធី ភី (HTPs) ក្នុងប្រទេសកម្ពុជាបន្ថែមលើការហាមឃាត់ ការប្រើប្រាស់ ការធ្វើអាជីវកម្ម និងការនាំចូលផលិតផលស៊ីហ្សា (SISHA) និងបារីអេឡិចត្រូនិក (E-Cigarette) ដែលបានដាក់ចេញកាលពីខែកុម្ភៈ ឆ្នាំ ២០១៤។
អង្គការចលនាដើម្បីសុខភាពកម្ពុជាបានលើកឡើងថា ការដាក់ចេញនូវសេចក្តីណែនាំនេះគឺដើម្បីឆ្លើយតបទៅនឹងការផ្សព្វផ្សាយលក់ផលិតផល អេចឈ៍ ធី ភី និងបារីអេឡិចត្រូនិក តាមបណ្តាញព័ត៌មានសង្គមដែលនាំឱ្យស្ថាប័នទាំង ២ នេះទទួលបានពានកោតសរសើរពីសម្ព័ន្ធត្រួតពិនិត្យផលិតផលថ្នាំជក់ ក្នុងនាមជាស្ថាប័នរដ្ឋាភិបាលដែលអនុវត្តបានល្អ។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡាបានប្រាប់ភ្នំពេញប៉ុស្តិ៍ថា អវត្តមានគ្រឿងញៀនខុសច្បាប់ និងគ្រឿងស្រវឹងក្នុងគ្រឹះស្ថានសិក្សា ជាការចូលរួមលើកកម្ពស់សុខភាពបុគ្គល គុណភាពអប់រំ និងគុណភាពជីវិត។ លោក បន្តថា ក្រសួងអប់រំ យុវជន និងកីឡាស្វាគមន៍ និងថ្លែងអំណរគុណចំពោះការលើកទឹកចិត្ត និងកិច្ចសហការជាមួយគ្រប់ភាគីពាក់ព័ន្ធដើម្បីលើកកម្ពស់សុខភាពរបស់អ្នកសិក្សា និងភាគីពាក់ព័ន្ធតាមរយ:គ្រប់រូបភាព។
លោកបានបញ្ជាក់ថា៖ «គ្រឿងញៀនខុសច្បាប់ និងគ្រឿងស្រវឹងអាចបណ្ដាលឱ្យមានគ្រោះថ្នាក់ដល់សុខភាព និងអាយុជីវិតរបស់អ្នកសិក្សា និងភាគីពាក់ព័ន្ធ។ ក្រសួងអប់រំ យុវជន និងកីឡាបាននិងកំពុងបន្តសហការជាមួយគ្រប់ភាគីពាក់ព័ន្ធដើម្បីលើកកម្ពស់ការយល់ដឹងពីផលប៉ះពាល់នៃការប្រើប្រាស់គ្រឿងញៀនខុសច្បាប់ និងគ្រឿងស្រវឹង។ ក្រសួងអប់រំ យុវជន និងកីឡាសហការជាមួយដៃគូការងារផ្សេងៗដើម្បីផ្សព្វផ្សាយពីផលប៉ះពាល់ និងវិធានការមានប្រសិទ្ធភាពក្នុងការកាត់បន្ថយគ្រោះថ្នាក់បណ្ដាលមកពីការប្រើប្រាស់គ្រឿងញៀនខុសច្បាប់ និងគ្រឿងស្រវឹង»។
សូមជម្រាបថា ជារៀងរាល់ឆ្នាំពិភពលោកត្រូវខាតបង់សេដ្ឋកិច្ចប្រមាណជា ១ ទ្រីលានដុល្លារសហរដ្ឋអាមេរិក (១០០០ ០០០ ០០០ ០០០USD) និងមានមនុស្សប្រមាណ ៧ លាននាក់បានស្លាប់ ហើយចំនួននេះនឹងកើនឡើង ១ ភាគ ៣ ដង នៅក្នុងឆ្នាំ ២០៣០ ប្រសិនបើមិនមានការទប់ស្កាត់ប្រកបដោយប្រសិទ្ធភាពទេនោះ។ ក្រឡេកមកប្រទេសកម្ពុជាយើងវិញ ថ្នាំជក់បានសម្លាប់ប្រជាជនប្រមាណ ១៥ ០០០ នាក់ ជារៀងរាល់ឆ្នាំ និងខាតបង់ថវិកាប្រមាណ ៦៤៩ លានដុល្លារសហរដ្ឋអាមេរិកជារៀងរាល់ឆ្នាំគឺស្មើនឹង ៣ ភាគរយ នៃ GDP របស់កម្ពុជា។ នេះបើយោងតាមការអះអាងរបស់អង្គការចលនាដើម្បីសុខភាពកម្ពុជា៕
