.jpg)
លោក កឹម សុខា និងសហការីដើរចេញពីតុលាការរាជធានី ពីខែមករា។ ហុង មិនា
ភ្នំពេញៈ អង្គជំនុំជម្រះសាលាដំបូងរាជធានីភ្នំពេញនឹងពិចារណាក្នុងការពន្លឿននីតិវិធីសវនាការរឿងក្តីរបស់លោក កឹម សុខា អតីតប្រធាននៃអតីតគណបក្សសង្គ្រោះជាតិដែលត្រូវបានចោទពីបទ «សន្ទិដ្ឋិភាពជាមួយបរទេស» ឬ «ឃុបឃិតជាមួយបរទេសដើម្បីផ្តួលរំលំរដ្ឋាភិបាលកម្ពុជា» តបតាមការស្នើសុំរបស់សហមេធាវីរបស់លោក កឹម សុខា។
ក្រោយបញ្ចប់សវនាការពេញមួយព្រឹកនៅថ្ងៃទី ២៣ ខែកុម្ភៈ លោក ចាន់ ចេន សហមេធាវី លោក កឹម សុខា ប្រាប់ក្រុមអ្នកសារព័ត៌មាននៅខាងមុខសាលាដំបូងរាជធានីភ្នំពេញថា លោកបានស្នើសុំទៅអង្គជំនុំជម្រះឱ្យពន្លឿននីតិវិធីសវនាការលោក កឹម សុខា ដែលជាកូនក្តីរបស់លោកឱ្យបានលឿនតាមដែលអាចធ្វើទៅបាន ព្រោះបើអូសបន្លាយកាន់តែយូរ វានឹងធ្វើឱ្យខូចប្រយោជន៍ និងប៉ះពាល់ដល់សិទ្ធិកូនក្តីរបស់លោក។ តបតាមការស្នើសុំនេះ ប្រធានក្រុមប្រឹក្សាជំនុំជម្រះបញ្ជាក់ក្នុងអង្គសវនាការថា លោកនឹងយកទៅពិចារណា និងពិនិត្យមើលកម្មវិធីរបស់តុលាការ។
បើតាម លោក ចាន់ ចេន រឿងក្តីរបស់លោក កឹម សុខា បានអូសបន្លាយពេលជាង ៤ ឆ្នាំមកហើយ ដោយរាប់គិតចាប់ពីថ្ងៃចាប់ខ្លួនរហូតមកដល់បច្ចុប្បន្ន។ ទាំងសហមេធាវី និង លោក កឹម សុខា និងប្រជាពលរដ្ឋ ដែលជាអ្នកគាំទ្រលោក កឹម សុខា នៅតែទាមទារ និងនៅតែចង់បានឱ្យតុលាការធ្វើការពន្លឿននីតិវិធី ជំនុំជម្រះនេះឱ្យបានច្រើនដង។ បើអាចគឺធ្វើជារៀងរាល់ថ្ងៃពីថ្ងៃចន្ទដល់ថ្ងៃសុក្រ ឬក៏យ៉ាងហោចណាស់ធ្វើឱ្យបាន ៣ ដងក្នុង ១ សប្តាហ៍ដែរ។
លោកបន្តថា បើសវនាការធ្វើតែ ១ ព្រឹក ក្នុង ១សប្តាហ៍បែបនេះ គឺមិនដឹងថារឿងក្តីនេះ អូសបន្លាយ ពេលវេលាទៅដល់ខែណា ឬ ឆ្នាំណានោះទេ។ ការអូសបន្លាយពេលវេលាយូរបែបនេះ វាធ្វើឱ្យប៉ះពាល់ដល់សិទ្ធិរបស់កូនក្តីលោកដែលច្បាប់ជាតិ និងអន្តរជាតិចែងពីសិទ្ធិទទួលបានការជំនុំជម្រះដោយយុត្តិធម៌ និងឆាប់រហ័ស និងជាពិសេសវាប៉ះពាល់ដល់ផលប្រយោជន៍ផ្ទាល់ខ្លួនរបស់លោក កឹម សុខា ផងដែរ។
លោកថ្លែងថា៖ «យើងនៅតែសំណូមពរ នៅតែទាមទារ និងចង់បានឱ្យតុលាការបន្ថែមកម្មវិធីសវនាការ ដើម្បីផ្តល់យុត្តិធម៌ដល់កូនក្តីយើងខ្ញុំ ព្រោះ ឯកឧត្តម កឹម សុខា អត់បានប្រព្រឹត្តអ្វីខុសដូចការចោទប្រកាន់នោះទេ។ រឿងនេះ យើងបានសំណូមពរតាំងពីដំណើរការសវនាការដំបូងប៉ុន្តែ អម្បាញ់មិញនេះ ប្រធានក្រុមប្រឹក្សាជំនុំជម្រះលោកមានប្រសាសន៍នៅក្នុងអង្គសវនាការដែរថា គាត់នឹងពិនិត្យមើលនូវសំណើរបស់យើងខ្ញុំជាសហមេធាវី ក៏ដូចជាកម្មវិធីរបស់តុលាការ»។
លោកបញ្ជាក់ថា៖ «យើងសង្ឃឹមថា សវនាការនឹងឆ្លើយតបនូវអ្វី [ដែលជា] ការស្នើសុំរបស់សហមេធាវី ក៏ដូចជាអ្នកគាំទ្រលោក កឹម សុខា»។
ពាក់ព័ន្ធនឹងបញ្ហានេះ លោក ផ្លង់ សុផល អ្នកនាំពាក្យអយ្យការអមសាលាដំបូងរាជធានីភ្នំពេញប្រាប់ភ្នំពេញប៉ុស្តិ៍យ៉ាងខ្លីថា៖ «ខ្ញុំអត់ទទួលព័ត៌មានហ្នឹងផង»។ លោកបន្តថា សវនាការរបស់លោក កឹម សុខា នៅថ្ងៃទី ២៣ កុម្ភៈ បានដំណើរការទៅជាធម្មតា ហើយសវនាការបន្តទៀតនោះនឹងត្រូវធ្វើនៅថ្ងៃទី ២ មីនា ឆ្នាំ ២០២២ វេលាម៉ាង ៨: ៣០ នាទីព្រឹក។
លោក ផែង ហេង សហមេធាវី លោក កឹម សុខា ម្នាក់ទៀតប្រាប់ក្រុមអ្នកសារព័ត៌មានដែរថា សវនាការលោក កឹម សុខា នៅថ្ងៃទី ២៣ កុម្ភៈបានបន្តចាក់វីដេអូ ទី ១៦,១៧ និងបង្ហាញភ័ស្តុភាងជាឯកសារមួយចំនួនទៀត។ ប៉ុន្តែ មានភាពតានតឹងពាក់ព័ន្ធនឹងនីតិវិធីខ្លះដោយតំណាងអយ្យការព្យាយាមចោទសួរលើបច្ចេកទេស។
លោកថ្លែងថា៖ «យើងដាក់ភ័ស្តុតាងនេះ បញ្ជាក់ថា គណបក្សសង្គ្រោះជាតិក្តី លោក កឹម សុខា ក្តី អនុវត្តទៅតាមនីតិវិធី ដែល គ.ជ.ប. បានកំណត់ និងមិនមែនគណបក្សសង្គ្រោះជាតិទេ ដែលមើលឃើញ និងចាប់កំហុស ដំណើរការបោះឆ្នោត និងលទ្ធផលនៃការបោះឆ្នោតនោះ សូម្បីតែអង្គការតម្លាភាពក៏មើលឃើញមានភាពមិនប្រក្រតីដែរ។ យើងតវ៉ា ទៅតាមក្របខ័ណ្ឌច្បាប់ មិនមែនទៅធ្វើសន្ទិដ្ឋភាពជាមួយបរទេស និងមិនមែនធ្វើបដិវត្តន៍ពណ៌ ដូចការលើកឡើងតំណាងអយ្យការនោះ»។
លោក កឹម សុខា ត្រូវបានចាប់ខ្លួនកាលពីថ្ងៃទី ៣ ខែកញ្ញា ឆ្នាំ ២០១៧ ក្នុងគេហដ្ឋានរបស់លោកនៅសង្កាត់បឹងកក់២ ខណ្ឌទួលគោក រាជធានីភ្នំពេញ និងត្រូវបានបញ្ជូនទៅដាក់ក្នុងពន្ធនាគារត្រពាំងផ្លុង ខេត្តត្បូងឃ្មុំ ដោយចោទប្រកាន់ពីបទ «សន្ទិដ្ឋភាពជាមួយបរទេស» ឬឃុបឃិតជាមួយបរទេសដើម្បីផ្តួលរំលំរដ្ឋាភិបាលកម្ពុជា ដោយគិតមកដល់ពេលនេះ គឺមានរយៈពេល ៤ ឆ្នាំ ហើយ។
លោក កឹម សុខា ត្រូវបានដោះលែងឱ្យនៅក្រៅឃុំ កាលពីថ្ងៃទី ១០ ខែវិច្ឆិកា ឆ្នាំ ២០១៩ ប៉ុន្តែដាក់ឱ្យស្ថិតក្រោមការត្រួតពិនិត្យតាមផ្លូវតុលាការ ទី ១. មិនត្រូវចេញក្រៅព្រំប្រទល់ដែនដីនៃព្រះរាជាណាចក្រកម្ពុជា។ ទី ២. មិនត្រូវធ្វើសកម្មភាពនយោបាយ និងទី ៣. ត្រូវឆ្លើយតបនឹងការកោះហៅពីគ្រប់សមត្ថកិច្ច៕
វីដេអូ៖
