.jpg)
ជនជាប់ចោទ ឈ្មោះ ប៉ាវ រ៉ាវី សកម្មជនអតីតគណបក្សសង្គ្រោះជាតិ។ រូបថត ហ្វេសប៊ុក
ភ្នំពេញៈ តុលាការកំពូលនៅថ្ងៃទី ២៣ កុម្ភៈបានប្រកាសសាលដីកាភ្លាមៗបន្ទាប់ពីបើកសវនាការជំនុំជម្រះប្រមាណជា ១ ម៉ោងដោយសម្រេចច្រានចោលបណ្តឹងសុំនៅក្រៅឃុំរបស់សកម្មជនអតីតគណបក្សសង្គ្រោះជាតិម្នាក់ពាក់ព័ន្ធសរសេរខិត្តប័ណ្ណប្រមាថសម្លាប់លោកនាយករដ្ឋមន្ត្រី ហ៊ុន សែន ប្រព្រឹត្តកាលពីខែសីហាឆ្នាំ ២០២១ នៅភូមិទួលពង្រ ឃុំស៊ីធរ ស្រុកខ្សាច់កណ្តាល ខេត្តកណ្តាល។
បន្ទាប់ពីបញ្ចប់សវនាការ និងក្រោយពីថយទៅពិភាក្សាប្រមាណជាង ១០ នាទីក្រោយមក លោកចៅក្រម ជីវ កេង ប្រធានក្រុមប្រឹក្សាជំនុំជម្រះហើយដែលបានផ្តល់សិទ្ធិដល់លោកចៅក្រម ១ រូបទៀត បានអានសាលដីកាថា ជនត្រូវចោទឈ្មោះ ប៉ាវ រ៉ាវី ភេទប្រុស អាយុ ៤៨ ឆ្នាំ។
ក្រោយពីក្រុមប្រឹក្សាជំនុំជម្រះបានស្តាប់សារណារបស់ជនត្រូវចោទ ដែលមេធាវីអវត្តមានក្នុងសវនាការ និងក្រោយពីបានស្តាប់សេចក្តីសន្និដ្ឋានរបស់តំណាងមហាអយ្យការ តុលាការកំពូលពេលបើកសវនាការជំនុំជម្រះ និងក្រោយពីបានពិភាក្សាគ្នាមក ក្រុមប្រឹក្សាជំនុំជម្រះយល់ឃើញថា ប្រការដែលសភាស៊ើបសួរនៃសាលាឧទ្ធរណ៍ភ្នំពេញសម្រេចមិនអនុញ្ញាតឱ្យនៅក្រៅឃុំនេះជាការត្រឹមត្រូវហើយ។
លោកថ្លែងថា៖ «សាលដីការបស់សភាស៊ើបសួរនៃសាលាឧទ្ធរណ៍មានលក្ខណៈត្រឹមត្រូវតាមច្បាប់ហើយ ហេតុដូច្នេះតុលាការកំពូលសម្រេចតម្កល់សាលដីកាឧទ្ធរណ៍ភ្នំពេញនៅដដែល»។
តាមអង្គហេតុរបស់អាជ្ញាធរស្រុកខ្សាច់កណ្តាលបង្ហាញថា ជនត្រូវចោទឈ្មោះ ប៉ាវ រ៉ាវី រស់នៅភូមិទួលពង្រ ឃុំស៊ីធរ ស្រុកខ្សាច់កណ្តាល ជាសកម្មជនរបស់អតីតគណបក្សសង្គ្រោះជាតិ។ កាលពីខែសីហា ឆ្នាំ ២០១៩ ជននេះបានសរសេរខិត្តប័ណ្ណហើយដើរចែកប្រជាពលរដ្ឋនៅក្នុងមូលដ្ឋានរបស់ខ្លួនរស់នៅ ដោយនៅក្នុងខិត្តប័ណ្ណនោះមានសរសេររិះគន់ដល់ប្រមុខរាជរដ្ឋាភិបាល។
អង្គហេតុបង្ហាញបន្តថា នៅក្នុងខិត្តប័ណ្ណនោះបានសរសេរគាំទ្រថ្នាក់ដឹកនាំអតីតគណបក្សសង្គ្រោះជាតិលោក សម រង្ស៊ី ឱ្យវិលចូលស្រុកវិញ និងនិយាយប្រមាថសម្លាប់លោកនាយករដ្ឋមន្ត្រី ហ៊ុន សែន។ លោក ប៉ាវ រ៉ាវី ត្រូវនគរបាលស្រុកខ្សាច់កណ្តាលចាប់ខ្លួនកាលពីថ្ងៃទី ៦ សីហា ឆ្នាំ ២០២១ និងបានបញ្ជូនទៅសាលាដំបូងខេត្តកណ្តាល។
សំណុំរឿងនេះត្រូវបានតំណាងអយ្យការចោទប្រកាន់កាលពីថ្ងៃទី ៣ វិច្ឆិកា ឆ្នាំ ២០២១ ពីបទញុះញង់ឱ្យប្រព្រឹត្តអំពើដែលបង្កឱ្យមានភាពវឹកវរធ្ងន់ធ្ងរដល់សន្តិសុខសង្គមតាមមាត្រា ៤៩៤ មាត្រា ៤៩៥ នៃក្រមព្រហ្មទណ្ឌ ។ បន្ទាប់មកចៅក្រមស៊ើបសួរបានចេញដីកាឱ្យឃុំខ្លួនក្នុងពន្ធនាគារខេត្តកណ្តាល។ ដោយមិនសុខចិត្តនឹងការសម្រេចនេះជនត្រូវចោទបានប្តឹងឧទ្ធរណ៍ហើយត្រូវសភាស៊ើបសួរសាលាឧទ្ធរណ៍ភ្នំពេញបើកសវនាការ និងប្រកាសសាលដីកានៅថ្ងៃទី ២២ ធ្នូ ឆ្នាំ ២០២១ សម្រេចមិនដោះលែងឱ្យនៅក្រៅឃុំ ដូចការសម្រេចរបស់តុលាការខេត្តកណ្តាល៕
វីដេអូ៖
