ព្រះសីហនុៈ នគរបាលប្រឆាំងបទល្មើសគ្រឿងញៀនខេត្តព្រះសីហនុ គ្រោងបញ្ជូនបុរសជនជាតិចិនម្នាក់ទៅសាលាដំបូងខេត្តនៅថ្ងៃទី ២៥ កុម្ភៈ បន្ទាប់ពីចាប់ខ្លួនបាន ២ ថ្ងៃ នៅក្រុង-ខេត្ត ព្រះសីហនុ ជាមួយម្សៅថ្នាំញៀន ១៥ កញ្ចប់តូច និងច្នាំគ្រាប់ពណ៌ផ្កាឈូកប្រភេទ WY ៤ គ្រាប់ទៀត ខណៈការដាក់កម្លាំងត្រួតពិនិត្យអាវុធជាតិផ្ទុះ និងបទល្មើសផ្សេងៗនៅពេលយប់ក៏កំពុងត្រូវបានពង្រឹងផងដែរ។
លោក តាក់ សារិទ្ធ ស្នងការរងទទួលផែនការងារនគរបាលប្រឆាំងគ្រឿងញៀនខេត្តព្រះសីហនុ ប្រាប់នៅថ្ងៃទី ២៤ កុម្ភៈថា ជនសង្ស័យឈ្មោះ Ma lian Fei ភេទ ប្រុស អាយុ ៤០ ឆ្នាំ ស្នាក់នៅបណ្តោះអាសន្នក្នុងភូមិ ១ សង្កាត់ ៤ ក្រុង-ខេត្ត ព្រះសីហនុ។ កម្លាំងនគរបាលក្រុងព្រះសីហនុគ្រោងកសាងសំណុំរឿងបញ្ជូនទៅសាលាដំបូងខេត្តនៅថ្ងៃទី ២៥ កុម្ភៈ។
លោកថ្លែងថា៖ «ការឃាត់ខ្លួនជនសង្ស័យគឺ នគរបាលក្រុងព្រះសីហនុជាអ្នកអនុវត្តផ្ទាល់។ នៅ (ថ្ងៃទី ២៥ កុម្ភៈ) ទើបសមត្ថកិច្ចបញ្ជូនជនសង្ស័យទៅតុលាការ ប៉ុន្តែខាងក្រុងជាអ្នកធ្វើ»។
បើយោងតាមគេហទំព័ររបស់អធិការដ្ឋាននគរបាលក្រុងព្រះសីហនុ ថ្ងៃទី ២៣ ខែ កុម្ភៈ ឆ្នាំ ២០២២បានសរសេរថា ការឃាត់ខ្លួនជនសង្ស័យនេះ គឺដឹកនាំបញ្ជាពីលោក ជួន ណារិន្ទ ស្នងការនគរបាលខេត្តព្រះសីហនុ។ ចំពោះជនសង្ស័យរូបនេះត្រូវបានកងសន្តិសុខ ឆាយណាថោន (ឈ្មោះទីតាំង) ស្ថិតនៅភូមិ ៦ សង្កាត់ ៤ ក្រុង-ខេត្តព្រះសីហនុរាយការណ៍មក កម្លាំងប្រឆាំងគ្រឿងញៀននៃអធិការដ្ឋាននគរបាលក្រុងព្រះសីហនុដើម្បីឃាត់ខ្លួន។
ចំពោះវត្ថុតាងដែលសមត្ថកិច្ចដកហូតបានមាន៖ ម្សៅក្រាមពណ៌សថ្លា សង្ស័យសារធាតុញៀន ១៥ កញ្ចប់ ច្នាំគ្រាប់ពណ៍ផ្កាឈូកប្រភេទ WY ចំនួន ៤ គ្រាប់ និងទូរស័ព្ទដៃ ១ គ្រឿង។
ពាក់ព័ន្ធនឹងការទប់ស្កាត់បទល្មើស និងពង្រឹងសន្តិសុខ ក្នុងខេត្តព្រះសីហនុនេះដែរ លោក ជួន ណារិន្ទ ប្រាប់ ភ្នំពេញ ប៉ុស្តិ៍ កាលពីថ្ងៃទី ២១ កុម្ភៈថា នគរបាលខេត្តព្រះសីហនុ កំពុងដាក់កម្លាំងចម្រុះចុះត្រួតពិនិត្យអាវុធជាតិផ្ទុះ និងរកអ្នកបើកបររថយន្តដែលប្រើប្រាស់សារធាតុញៀន ដើម្បីពង្រឹងសន្តិសុខនៅតាមគោលដៅស្មុគស្មាញមួយចំនួនក្នុងក្រុង-ខេត្តព្រះសីហនុ។
លោកថា ការដាក់គោលដៅត្រួតពិនិត្យពាក់ព័ន្ធនឹងការពង្រឹងសន្តិសុខសណ្តាប់ធ្នាប់សាធារណៈនៅក្នុងខេត្តព្រះសីហនុ ដែលតែងតែអនុវត្តជារឿយៗនេះគឺជាវិធានការជំនាញរបស់ស្នងការដ្ឋាននគរបាលខេត្ត។ ការងារនេះគឺ មិនមែនជាការដាក់កម្លាំងចុះត្រួតពិនិត្យជាប្រចាំទេ តែជាការត្រួតពិនិត្យតាមពេលវេលា និងតាមភូមិសាស្ត្រដែល លោកសន្និដ្ឋានថា ទីតាំងនោះអាចមានបញ្ហាអ្វីមួយកើតឡើង ឬមួយអាចមានគ្រោះថ្នាក់ចរាចរណ៍ក្នុងតំបន់ស្មុគស្មាញ។
លោកថ្លែងថា៖ «យើងត្រួតពិនិត្យនេះពាក់ព័ន្ធរកសារធាតុស្រវឹងផង រកអ្នកប្រើប្រាស់សារធាតុញៀន និងត្រួតពិនិត្យរកអាវុធជាតិផ្ទុះផង នេះជាជំនាញរបស់ខ្ញុំតែប៉ុណ្ណឹង។ យើងមើលសភាពការណ៍បច្ចុប្បន្ននេះគ្រោះថ្នាក់ចរាចរណ៍កើតមានច្រើន ហើយយើងក៏ត្រូវរកអ្នករក្សាទុក និងប្រើប្រាស់អាវុធខុសច្បាប់ផង។ នេះគឺជាវិធានការរបស់គណៈបញ្ជាការឯកភាពខេត្ត និងជាវិធានការរបស់ស្នងការនគរបាលខេត្ត»៕